ئايال

ئابدۇۋەلى تۇرسۇن

 سەن ھىممىتى ياراتقۇچىنىڭ ،

نەسىللەرگە ۋەتەن قىپ بەرگەن.

 ئىنسانلىقنىڭ جەۋھەرلىرىنى ،

 يۈرىكىڭنىڭ تېگىگە كۆمگەن.

سەن ھاياتنىڭ سۆيگۈ داستانى،

ئاشىقلارنىڭ پۈتمەس مەنزىلى.

 سەن مېھىرنىڭ كۈلگەن ئاسمانى،

 نۇر ئېمىدۇ تەشنا دىل گۈلى.

سەن تارىخنىڭ ئالتۇن قەلىمى،

 ئىزلىرىڭدىن يارىلار كەچمىش .

 نەرە تارتقان باھادىرلارمۇ ،

 غەزىبىڭدىن قىلىدۇ تەشۋىش.

سەن كېلەچەك ئويغانغان باھار ،

 ھەر چېچەكتىن ياڭرايدۇ كۈلكەڭ .

 باغرىڭ سېنىڭ بىر مۇنبەت تۇپراق ،

كارۋانلارغا مەڭگۈلۈك ئۆتەڭ.