بوپتۇ دىگىن تۈگەيدۇ بىر كۈن

يۈسۈپجان سايرامى    ( زىنھار  )

غۇنچىلار چىچەكلەپ ئېچىلار بىر كۈن ،
ياپراقلار تۆكۈلۈپ توزار ھەم بىر كۈن  .
خوش بولۇپ كەتمىگىن ئامەتلىرىڭدىن  ،
تۈگەيدۇ جانۇ ھەم جاھانمۇ بىر كۈن  .

يۈرەكلەر پۇچلىنىپ سەرسان بولسىمۇ ،
گۈللەر ئارىسىدا گەر تىكەن بولسىمۇ  .
خۇشاللىققا قايغۇلار جۆر بولسىمۇ  ،
بوپتۇ دىگىن  تۈگەيدۇ بىر كۈن .

كوچىلاردا يىگانە سەرسان بولساڭمۇ ،
تېڭىرقاپ ھەريان غەمكىن يۈرسەڭمۇ  .
ساختىغا ئالدىنىپ ئەلەم يىسەڭمۇ  ،
بوپتۇ دىگىن تۈگەيدۇ بىر كۈن .

تىمتاس كېچە تەنھا قالساڭمۇ ،
پىنھانلاردا ياشلار تۆكسەڭمۇ  .
خىيانەتكە ئۇچراپ تۇرساڭمۇ  ،
بوپتۇ دىگىن تۈگەيدۇ بىر كۈن.

ئالدىڭ ئېگىز داۋان بولسىمۇ  ،
قەدەم ئالساڭ تاشلار توسسىمۇ.
تىكەن كىرىپ قانلار تولسىمۇ ،
بوپتۇ دىگىن تۈگەيدۇ بىر كۈن   .

پارچە نانغا زار_زار  بولساڭمۇ  ،
كۈن نۇرىغا تەشنا بولساڭمۇ  .
گەرچە مېيىپ ئاجىز بولساڭمۇ ،
بوپتۇ دىگىن تۈگەيدۇ بىر كۈن  .

دوستۇم دىگەنلەر ئىشەنمەس بولسىمۇ ،
يات كۆرۈپ ياكى دۈشمەن بىلسىمۇ  .
زەھىرىنى چېچىپ تىغىنى ئۇرسىمۇ  ،
بوپتۇ دىگىن تۈگەيدۇ بىر كۈن  .

كۆزىڭىدە قان ياش ئۇيۇپ قالسىمۇ،
كۆرمەس بولۇپ نۇرسىز قالسىمۇ.
بېشىڭ قات-قات غەمدە قالسىمۇ  ،
بوپتۇ دىگىن تۈگەيدۇ بىر كۈن  .

2016-يىلى 12-ئاينىڭ 17-كۈنى (سەھەر)
##ئاپتۇر ئەمگىكىگە ھۆرمەت قىلىڭ ##