چۈنكى مەن ئىنسان
(  ياسىنجان مۇھەممەت)

مەن ھايات يولىدا ئۆتكۈنچى مىھمان  ،
كەلگۈسى ئىقبالغا يۈرۋاتقان كارۋان ·
يات ماڭا ئارتۇقچە ھەشەمەت ئ‍ىكرام ،
چۈنكى مەن ساپ قەلىب ئاددى بىر ئىنسان·

بىلمەيمەن ئۆزگىگە ئ‍ورا كولاشنى ،
بىراۋنى خۇشامەت گۈلىگە ئ‍وراشنى،
بىلمەيمەن رەڭۋازلىق ھەم كۆز بوياشنى،
چۈنكى مەن ساپ قەلىب ئاددى بىر ئىنسان·

ئۈمۈد ۋە غايىنى پۈكۈپ يۈرەككە ،
تىنىمسىز كۆرەشكەن تولۇپ غەيرەتكە.
ئىستەيمەن يىتىشنى ئىزگۈ تىلەككە ،
چۈنكى مەن ساپ قەلب ئاددى بىر ئىنسان.

كۆرسەم گەر بىراۋنىڭ سوغۇق چىھرىنى ،
كۈتمەسمەن زەررىچە ھىممەت،مىھىرنى ،
كۆتۈرمەس غورۇرۇم مىننەت،كىبىرنى ،
چۈنكى مەن ساپ قەلب ئاددى بىر ئىنسان·

قىرىنداش-دوستلۇقنى بىلىمەن ئ‍ەلا ،
ياشىدىم مەرتلىكنى قىلىپمەن ھەمرا·
شۇلاردىن ھاياتىم تاپىدۇ مەنا·
چۈنكى مەن ساپ قەلب ئاددى بىر ئىنسان·

ئاتامنىڭ ئىزىدىن چەتنەپ باقمىدىم ،
نەپسانىيەت سۈيىدە  لەيلەپ ئ‍اقمىدىم·
ئەركەك مەن ھەقىقى ئ‍ەردەك ياشىدىم،
چۈنكى مەن ساپ قەلب ئاددى بىر ئىنسان ·