قىز بولساڭ (شېئىر) 

 رەجەپ يۈسۈپ 

شەرمى- ھايا ئەخلاقنى، مۇجەسسەم قىل قىز بولساڭ،
ئاتا -ئانا ئاكاڭنى، خاتىرجەم قىل قىز بولساڭ .
خار قىلمايدۇ ھىچ كىشى، ئەگرى ئەمەس تۈز بولساڭ ،
خەلقى ئالەم ئالدىدا، قىزدەك يۈرگىن قىز بولساڭ .

مال -دۇنياغا ئالدانماي، ۋاپانى سۆي قىز بولساڭ ،
ھەشەمەتكە خارلانماي، جاپانى سۆي قىز بولساڭ .
ئۇيغۇر ئوغلى ئالدىدا، گۈزەل ئەمەس ئۇز بولساڭ ،
ئۆلچەم قىلىپ ئەخلاقنى، ساپانى سۆي قىز بولساڭ .

غەيۋەتلەرگە ئىشەنمەي، ھەقنى بىلگىن قىز بولساڭ ،
يامانلارنى چۈشەنمەي، توغرا يۈرگىن قىز بولساڭ .
دوسىت -بۇرادەر ئالدىدا، سەنمۇ بىركۈن ئۆي قۇرساڭ ،
تاماشىغا يۈگۈرمەي، كىتاپ كۆرگىن قىز بولساڭ .

بەخىت ئىزدەپ يۈرمىگىن، قانائەتلىك قىز بولساڭ ،
تەخىت ئىزدەپ يۈرمىگىن، دىيانەتلىك قىز بولساڭ .
بەخىت دىمەك خاتىرجەم، ئەسكى ئۆيدە ئولتۇرساڭ ،
جۈپتىڭنى سۆي يارىغا، قىيامەتلىك قىز بولساڭ .

ئەركەك دىگەن ئاز ئەمەس، قولى چاققان قىز بولساڭ ،
باقالايدۇ زار قىلماي، بالا باققان قىز بولساڭ .
ئۈنسە يانتاق ھويلىدىن، ئىككىلەنمەي سۇندۇرساڭ،
سۈيەلەيدۇ خار قىلماي، ئۆينى تاپقان قىز بولساڭ .

2017-يىل 1-ئاينىڭ 1-كۈنى
نامسىز  تارقاتماڭ !