كەل ئانا !

ئالىيە

كەل ئانا ! باغرىڭغا بىر ئاز باغرىمنى يېقىۋالاي ... مەن ئۈچۈن بىر ئوت بولۇپ كۆيگەن شۇ يۈرىكىڭگە يۈرىكىمنى يېقىۋالاي ... تىنىقلىرىڭدىن مەن ئۈچۈن كۆيگەن يۈرىكىڭنىڭ تەپتى كېلىۋاتىدۇ ئانا ! بىردەم قېنىپ قېنىپ پۇرىۋالاي ... ئۇندىن باشقا بىر يۈرەك مەن ئۈچۈن ئۇنچە كۆيمەس ئىكەن ! قېنى شۇ يۈرەك كۆزلىرىمگە سۈرتۈپ بىر تونىۋالاي ... كۆزلىرىڭدە بىر ئالتۇن كەبى ياش يالتىراپ قاپتۇ ئانا ! كەل مەن كۆزلىرىمگە قوشىۋالاي ... ئاي يۈزلىرىڭگە ئىز سالماقچى بولوشۇپتۇ ئۇ ياشلار ! مەن كېلىشىپ قويدۇم .. شۇ ئالتۇن كۆزلەردىن ئاي يۈزلەردىن مېنىڭكىگە كۆچۈپ كېلەر بولدى ئانا ! بوستان چاچلىرىڭ يۈزلىرىمگە يېيىلدى ، كەل شۇ چاچلارنى قول سېلىپ بىر تاراپ باقاي ... بىر يېرىك قول يۈزلىرىمنى سېيلىدى .. ئانا ! بۇ سېنىڭ قوللىرىڭكەن ، ھاياتىم بۈگۈنگە ئۇلاشقۇچە قانغۇچە بىر سۆيمەپتىمەن .. كەل ئانا ! مەن ئۈچۈن قاداق بولغان قوللىرىڭنى قانغۇچە سۆيۈپ يۈرىكىمگە تېڭىۋالاي .. گۈللەر قىسلىشقا تېگىشلىك شۇ چېكەڭگە ئاقلار قېسىلۋاپتۇ ئانا ! ئۇلار بىلەن كېلىشەلمىدىم ... ئەسكىكەن ئۇلار ! شۇ چېكەڭگە كۆنۈپ قاپتىمىش ... كەچۈرگىن جېنىم ئانا ! چېكەڭدىكى گۈللەرنىڭ قاچانلاردا سەندىن يۈز ئۆرۈپ شۇ ئەسكى ئاق چاچلارغا ئورۇن بەرگىنىنى بىلمەي ئۆتۈپتىمەن ... بىلسەممۇ بىلمەس بولىۋالغەندىمەن ! كەل ئانا ..ھېلىھەم كېچىكمىدىم ! گۈللەر بىلەن كېلىشەلىدىم .. شۇ چېكەڭگە ياراشتۇرۇپ ئىككىنى قىسىپ قوياي ! ئاۋۇ ئەسكى ئاق چاچلار خىجىل بولۇپ يوشۇرۇنۋالسۇن ! جېنىم ئانا ! مەن ئۈچۈن بەللىرىڭ ئىگىلىپ قاپتۇ ... كەل سەندىن مادار ئالغان شۇ ۋاپاسىز قوللىرىمغا پۇرسەت بەرگىن بىر ! يۇمشاققىنە بىرئاز تۇتۇپ قوياي ... بولدى بالام ، ھېرىپ قالىسەن دەپ تۇرۋالمىغىنە ئانا ! سەن ئۈچۈن سۇنۇپ كەتسىمۇ ئەرزىيدۇ بۇ قول ... ساڭا بىر ئۆمۈر خىزمەت قىلالىسا ،ئاندىن مېنىڭ جىسمىمغا يارالغىنىغا رازى بولىدۇ ئۇ قول ئانا ... ئانا ! بۇ نېمە .. تاپانلىرىڭ چاك چاك يېرىلىپ قاپتىغۇ ؟ ماڭا كۆرسەتمەي تىقىپ قويۇپسەن ھە ئانا تاپانلىرىڭنى! مەن ئۈچۈن ! مەن ئۈچۈن يېرىلغان تاپانلارغۇ ئۇ ئانا ! كەل شۇ تاپانلارنى بىر سۆيىۋالاي ... ئانا ! بالىلىرىڭ چوڭ بولدى ... كەل بىر ئاز ئارام ئالغىن ، بىردەم بولسىمۇ ئۇخلىۋالغىن ! شۇ ئىشلىرىڭنى بىز بىر ئاز قىلىۋالايلى ....: