تويۇڭغا مۇبارەك بولسۇن ئەزىزەم 

گۈلزىرە مەخمۇت

   تويۇڭغا مۇبارەك بولسۇن ! مۇشۇ دەقىقىدە ھېسياتىمنى قانداق تەسۋىرلەشنى بىلەلمەيۋاتىمەن ، تىلىم ئاجىزلىق قىلىدۇ ئىپادىلەشكە . قانداق دەبدەبىلىك سۆزلەر بىلەن مۇشۇ چاغدىكى ھېسياتىمنى ئىپادىلىسەم بولاركىن  ، ھاياجانلانغىنىمدىن نېمە دېيىشنى بىلەلمەي قالدىم ، خۇشاللىقىمدىن يىغلىغۇم كەلدى . سېنىڭ تويۇڭنى ئاخىرى كۈتىۋالدۇق ، ئاشۇ ھاياجانلىق دەقىقىلەرنى ئاخىرى كۈتىۋالدۇق !

 كىمدۇر بىرى مۇنداق يازغانىكەن :  توي - ئىككى يۈرەكنىڭ بىرگە سوقۇشى ، ئىككى خىل ھاياتنىڭ بىرلەشمىسى . ئۇ مۇقەددەس ۋەدە . مەنچە بولغاندا ، توي ئۇ مۇھەببەتكە بولغان مەسئۇلىيەتچانلىق ، ئۇ بىر يېڭى ھاياتنىڭ باشلىنىشى . سەن يېڭى ھاياتىڭغا قەدەم ئېلىش ئالدىدا تۇرۇۋاتىسەن . يېڭى ھاياتىڭنىڭ تېخىمۇ مۇھەببەتلىك ئۆتۈشىنى ئۈمۈد قىلىمەن . ساڭا قىيالمايمەن ، يىراقلارغا كېتىشىڭنى خالىمايمەن ، ئەسلا خالىمايمەن . سېنى قېشىمدا بولسا ئىكەن دەپ ئارزۇ قىلىمەن ، سېنى يىراقلارغا كەتمىسىكەن دەيمەن ، قېشىمدا ئېلىپ قېلىشنى نەقەدەر خالايمەن ، بۇنى پەقەت بىر ئۆزۈم بىلمەن . لېكىن ئۇنداق قىلالمايمەن ! چۈنكى ، سېنىڭ بەختىڭنى كۆرۈشنى ئۈمۈد قىلىمەن .قەدرىڭ نەدە بولسا بەختىڭ شۇ يەردە ئەمەسمۇ ! سەن بەختلىك بولساڭ ، مەنمۇ بەختلىك مەن دوستۇم !

   سەن مېنىڭ بەش يىللىق ساۋاقدىشىم ، تۆت يىللىق ياتاقدىشىم ، سىردىشىم ، ئىككى يىللىق خىزمەتدىشىم . سەن ھاياتىمنىڭ ئايرىلماس بىر قىسمى ! سەن بىر تۇغقان قېرىندىشىمدىنمۇ ئەزىز ! ھاياتىمدا سېنىڭ بولۇپ قالغىنىڭدىن بەختلىكمەن ، سېنىڭ بولۇپ قالغىنىڭدىن سۆيۈنىمەن ! سېنى تۇغقان ئاناڭغا كۆپ تەشەككۈرلەر بولسۇن ! سەن ماڭا نۇرغۇنلىغان ئىشلارنى ئۆگەتتىڭ ، ھاياتىمنى ئۆزگەرتتىڭ . ئېسىڭدىمۇ ؟ ئىككىمىز دەسلەپتە قانداق ئىدۇق ؟ ئۇرۇشمىغۇچە تېپىشماپتۇ دەپ ، ئۈزلۈكسىز چۈشىنىش ، ئىشىنىش ئارقىلىق ئايرىلماس دوستلارغا ئۆزگەردۇق . ساڭا قاراپ باشقىچە بىر ھاياتنى چۈشىنىشكە باشلىدىم . بارا-بارا ساڭا ئوخشاش ئۆيدىكىلەرگە كۆيۈنۈشنى ، باشقىلارنىمۇ ئويلاشنى ، كۆپرەك تەبەسسۇم قىلىشنى ، كەڭ قورساقلىقنى .....ئۆگەندىم ! سەن تۇرمۇشتىكى ئۇستازىم بولدۇڭ ، ھايات يولۇمدىكى سەپەردىشىم ، مۇڭدىشىم بولدۇڭ . سەن ماڭا دوستلۇق مېھرىنى ھەقدادىغىچە يەتكۈزدۈڭ ، مېنى ھەتتا قېرىندىشىڭدىنمۇ ئۈستۈن كۆردۈڭ ھەم ئىزچىل شۇنداق قىلىپ كەلدىڭ . سەن مەدھىيلەشكە لايىقسەن ئەزىزەم ! ئەلۋەتتە ، ئىككىمىزنىڭ ئوتتۇرىسىدا ھەرخىل زىددىيەتلەرمۇ ، كۆڭۈلسىزلىكلەرمۇ ئاز يۈز بەرمىدى ! بەزىدە ھەتتا بىر-بىرىمىزگە قېيداپ ئىزدەشمەيدىغان ئىشلارمۇ بولدى . ئۇرۇشتۇق ، تالاشتۇق ، گەپلەشمىدۇق ، ئاغرىندۇق.....بىراق ، يەنىلا بىر-بىرىمىزگە قىيالمىدۇق ، بىر-بىرىمىزنىڭ يۈرىكىنى ئاغرىتىشقا چىدىمىدۇق !  ئوتتۇرىمىزدىكى دوستلۇق ھەرخىل سىناقلاردىن ھالقىپ ئۆتۈپ ، تېخمۇ مۇستەھكەملەندى !

   ھاياتىمىدىكى نۇرغۇنلىغان ئەسلىمىلەرنىڭ باش رولچىسى سەن ئىدىڭ ئەزىزەم . مانا ئەمدى  يېڭى تۇرمۇشۇڭ باشلىنىش ئالدىدا . سەندىن پەخىرلىنىمەن ، سەن چوقۇم تېخىمۇ ياخشى ياشايسەن ! باسقان ھەربىر قەدەملىرىڭنىڭ ئوڭۇشلۇڭ بولىشىغا تىلەكداشمەن . مەيلى سەن قەيەردە بول ، مەن سەن بىلەن بىللە ، مۇھەببىتىم ھەم ساڭا ھەمراھ ! بەختلىك بولغىن ئەزىزەم ، سېنى سۆيىمەن !

2016-يىلى 16ـ نويابىر

تۆت قۇلاق قەلىمىدىن