يامغۇر
نەسىر
رەيھانگۈل ئېزىز ئىزچىل 

ئادەمنىڭ كەيپىياتىدەك بىردەم تۇتۇلۇپ ، بىردەم ئېچىلىپ ، ھەپتىدە بىر قانچە كۈن چاڭ - تۇزان بولىدىغان ئاپىرىل كۈنلىرىدىكى ھاۋا كىشىنى يا ئىسسىغىلى قويماي يا توڭلىغىلى قويماي ، ئۆزىنىڭ مۇشۇنداق تۇراقسىزلىقى ئۈچۈن تەنتەنە قىلىپ داۋاملاشماقتا ئىدى .
گۈل - گىياھ ،  دەل - دەرەخلەرنىڭ يېڭىدىن چىقارغان يۇپۇرماقلىرى ئەمدىلا تۇغۇلغان بوۋاقنىڭ يۇمىران بارماقلىرىدەك شۇ قەدەر يۇمىران ۋە يېڭى بۇلۇپ ، باھار پەسلىگە ئۆزگىچە ھۆسىن قوشاتتى .
بارلىق مەھەلىلەر ئۆزى ئۆستۈرگەن بالىلارغا نىسپەتەن ئاجايىپ چىرايلىق ۋە ئىللىق بولغانغا ئوخشاش ، مىنىڭ مەھەللەممۇ ھازىرغىچە مەن ئۈچۈن ئىنتايىن گۈزەل ئىدى . بۇلۇپمۇ مەھەللىمىزدىكى  سۆگەتزارلىقنىڭ  يۇپۇرماقلىرى مەھەللىگە يېشىللىق ئاتا قىلىپ ، كىشىنى ئۆزىگە ئاجايىپ جەلىپ قىلاتتى .
بىر قۇشقاچ ھەر كۈندىكىگە ئوخشاشلا سۈبھىدىكى جىمجىتىلىققا ئەركىلەپ ، زۇق - شوخ بىلەن توختىماي سايراپ ،  مىنى تىزىراق ئورنۇڭدىن تۇر ، سەھەر بىلەن سالاملاشقىن دەپ ۋىچىرلايتتى .
بۈگۈنمۇ يەنە شەپەق نۇرىنىڭ ئاستىدىكى بۇ سۆگەتزارلىقىنڭ ئۇدۇلىدىن ئۆتۈپ كىتىۋېتىپ ، بۇنداق چاڭ - تۇزانلىق ھاۋادا بىر قېتىم يامغۇر ياغقان بولسا ياخشى بولاتتى دەپ ئويلۇدۇم .
تۈن بۈگۈنگە نىسپەتەن قەدىمىيلىككە ئايلانغان گۇگۇمنى ئۇزۇتۇپ قۇيۇپ ، قاراڭغۇلۇقنىڭ بىر قىسىمنى ئىچىگە سولىۋېلىپ ، ئەزەلدىن ئۆلۈپ باقمىغان ، بىرىدە باي - باياشات ، بىرىدە ئاچ قورساق ، بىرىدە تاقىر ، بىرىدە باغۇ - بوستان ، بىرىدە تىپتىنىچ بىرىدە جېدەل - ماجىرا ، بىرىدە كۈندۈز بىرىدە كېچە بولىدىغان ، ئەرلىك بىلەن ئاياللىقىنىڭ خارەكتىرىنى ئۆزىدە مۇجەسسەملىگەن ،  قەيسىرانە يەرشارى ئايالنىڭ بۆشۈكىدىكى بارچە جاننى ئويقۇغا غەرىق قىلىپ ، ئۆزىنىڭ مۇقەددەس ۋەزىپىسىنى ھەر كۈندىكىدەك ئادا قىلىۋاتاتتى .
بۇلۇت ۋە يۇلتۇزلارنى ، چاڭ - تۇمانلارنى ئۆيلىرىگە ئۇزۇتۇپ قۇيۇپ ، ئارام ئېلىۋاتقان سۈپسۈزۈك ساما بېقىنىدىكى نۇرلۇق ئاينىڭ چۈمپەردىسىنى ئېلىۋېتىپ ، ئالقىنىدىن ئورۇن بەرگەن ئىدى .
چېھرىدىن تەبەسسۇم جىلۋىلىنىپ تۇرغان ئايالنىڭ يۇپيۇمىلاق يۈزىدەك نۇرلۇق تولۇنئاي  سۆگەتزارلىقنىڭ ئۈستىدە ، گويا ماڭا قاراۋاتقاندەك دەرىزەمدىن كۆرۈنۈپ تۇراتتى .
مەن تۈندىكى بۇ گۈزەل مەنزىرە بىلەن بىر گەۋدىگە ئايلىنىپ ، ئۇخلىغان بىلەن ئۇخلىمىغاننىڭ دەل ئوتتۇرىسىدا ، گاھ ئۈلۈككە گاھ تىرىككە ئوخشاش ئۇيقۇنىڭ شەربەتكە تولغان ئىستاكانىغا چىلىشىپ ، چۈش كېمەمگە چىقىپ ئارزۇلىرىمنى قوغلۇشۇپ ، رىئاللىق بىلەن فانتازىيە ئارلىشىپ كەتكەن ، ئەزەلدىن بېرىپ باقمىغان بىر مەنزىلگە مېڭىشقا تەييارلىنىۋاتقىنىمدا ، يۇپۇرماقلار شىرىق - شىرىق قىلىپ ماڭا كۆزۈڭنى ئاچ دىدى .
كەينىدىنلا ناھايتى بوش ئاۋازدا ئۈزۈلدۈرمەي چېلىنغان چاۋاك ساداسىغا ئوخشايدىغان ئاۋاز ئاڭلاندى  .
ئورنۇمدىن تۇرۇپ دەرىزە سىرتىدىكى دەرەخزارلىققا قارىسام ، يامغۇر توختىماستىن مەن كەلدىم دەپ ئۆزىنى مەلۇم قىلىۋېتىپتۇ .
تاڭ سۈزۈلگىچە ياغقان يامغۇر سۆگەت يۇپۇرماقلىرىنى يۇيۇندۇرۇپ ،  ياپيېشىللىقنى ئاتا قىلىپ ، بۈيۈك تەبىئەتنىڭ ھەقىقىي گۈزەللىكىنى كىشىلەرگە نامايەن قىلىپ ،  ھەر قەلىپ ئىگىلىرىگە ھاياتىنىڭ ئۇنتۇلماس دەقىقىلىرىنى ئەسلەتكۈزۈپ ،  ھاياجانغا چۆمدۈرمەكتە ئىدى .  
سەھەردە يۇپۇرماقلاردىن چوكىلداپ چۈشىۋاتقان يامغۇر سۈيى خۇددى ئۈنسىز بىرىنىڭ غېرىبانە كۆز يېشىدەك  غەمكىنلىكنى ئەسلىتەتتى .
كىشىلەر ھەمىشە يامغۇرنى كۆز يېشىغا ئوخشۇتۇشۇپ ، بۈگۈنىدىن تولىمۇ يىراق بولغان خىلۋەت بىر جايغا كۆمۈپ قويغان ھاياتىنىڭ ئۇنتۇلماس دەقىقىلىرىدىكى يۈرەك سۆزىنى خىيالى بىلەن ئوچۇملاپ ئېلىپ ، مۇھەببەتنىڭ كۈچلۈك  ھىدى كىلىپ تۇردىغان ھەرخىل لىرىكىلىق ئەسەرلەرنىڭ ئارىسىغا تىزىپ ،  كۆڭلىدىكى ئادىمىگە ھەرخىل كۆرۈنمەس يوللار ئارقىلىق ئەۋەتىكەندىن كىيىنلا كۆڭۈللىرى ئارام تاپىدۇ .
كۈن چىققاندا بولسا ئۆزلىرى تەقلىد قىلىۋالغان ياخشى كەيىپىيات ئىچىدە ،  قەلبىگە قارمۇ - قارشى ھالدا ، يىغلامسىرىغانغا ئوخشاپ كېتىدىغان كۈلۈمسىرەش ئىچىدە ، ھىچقانداق غەم - ئەندىشىسى يوقتەك ياشىيالايدۇ .
شۇنىڭغا قارىغاندا يامغۇر كىشىلەرنىڭ قەلبىدىكى ھەقىقىي كۆز يېشىنى چىقىرۋېلىشى ئۈچۈن ياخشى بىر پەيىت بولسا كېرەك .