كەچۈر

(تۇيۇق)
مۆمىنجان مۇھەممەدئىمىن

  ئۆزۈمنى كەچۈرۈشتىن ئاۋال ساڭا كەچۈرگىن دېگۈم كەلدى . مىنى كەچۈر .
  قەلبىمدىكى ۋەيرانىچىلىقنى سەن كۆرەلمەيسەن ، شۇنداقتىمۇ سەندىن ئەپۇ سورىغۇم كەلدى .  ھەممە ئىش گۈزەل بولىدۇ دەپ ئويلاپ ، يوپۇرماقلارغا ، تاملارغا ، ھەتتا سەن بېسىپ ئۆتكەن يوللارغىچە سىنىڭ ئىسمىڭنى يېزىپ، مېيىقىمدا كۈلەتتىم . كېچىلىرى چاقناۋاتقان ھەممە يۇلتۇزنى ساڭا ئوخشۇتۇپ، ئۇزۇندىن ئۇزۇن مۇڭدىشىپ چىقاتتىم . كۈندۈزلىرى كۆزۈمنى ئازراقلا يومۇپ قويساممۇ ئۇيقۇغا كىتىدىغان مەن ئاشۇ قىسقىغىنە ۋاقىتتا تالاي چۈشلەرنى كۆرەتتىم، ئۇنىڭدا سەن بولاتتىڭ .  ئىشقىلىپ ھەر ئىشلار بولاتتىيۇ، نەتىجىدە بەرىبىر بولۇپ چىقاتتى ، لېكىن شۇنداقتىمۇ ئۇ ئىشلارنىڭ بولىۋىرىشىنى ئۈمىد قىلاتتىم .
   راستلا كەچۈرگىن . ھەممە نەرسىنى گۈزەل دەپ ئويلىۋالىدىغىنىمنى، ئۆزۈمنى شۇنچە قەيسەر چاغلىۋالىدىغىنىمنى، ھەممە ئىشقا ئۈمىد بىلەن قاراپ، كۈلۈپ ياشاۋاتقىنىمنى كەچۈرگىن . ھەمىشە ئۇخلايدىغىنىمنى، توختىماي خاتىرە يازىدىغىنىمنى كەچۈرگىن ، بارچە ئۈمىدنى سەندىنلا كۈتكىنىمنى ھەم كەچۈرگىن . ئۈمىد كۈتىۋىرىپ، ئۈمىدنىڭ نىمىلىكىنىمۇ ئۇنتۇپ قالغىنىمنى ، سۆيىمەن دەپ ئاخىرقى ھىسابتا قەلبىڭدە نەپرەتنىڭ بىخلىرىغا سۇ قۇيۇپ سالغىنىمنى كەچۈرگىن .
مىنى كەچۈرگىن . مەن ئەمدى يىغلاشنى ، يېقىلىشنى ، ئۈمىدسىزلىنىشنى ، يالغۇز قېلىشنى ، كېچىسى ئۇخلاپ، كۈندۈزى ياشاشنى ئۈگىنەي . دۇنيادا سەندىن بۆلەك يەنە ئۆزۈم بارلىقىنى ، ئۆزۈمنى تونۇشنى ۋە ئۆزۈمنى سۆيۈشنى ئۆگىنەي . ئۈمىدسىز قالغىنىمدا سىمالىرىڭنىڭ تەسەللىي بىرىشىنى ، قىسقىسى سىنى كۈتۈشنى ئەمەس ، ئۆزۈمگە ئۆزۈم يىغلاپ، ئۆزۈمگە ئۆزۈم پىچىرلاپ، ئۆزۈمگە ئۆزۈم جاۋاپ بولۇشنى ئۆگىنەي .
ھەئە، مىنى كەچۈرگىن ، كەچۈرۈم سوراشقا كىيىن قالغىنىمنى ھەم كەچۈرگىن ، بىراق شۇ مىنى       كەچۈرگىن . باشقىنىمۇ كۈتمەيمەن، خالىساڭ سۈكۈت قىلغىن، گەپ قىلما . خالىساڭ كەتكىن، قايرىلما . بىراق ئاخىرقى ھېدلىرىڭدىن مىنى كەچۈرگەنلىكىڭدىن بىر خەۋەر بەرگىن ئاندىن مەن ئۆزۈمنى كەچۈرەي .

  2017.3.27