ئالىمجان قاسىم : خىيال شامىلى [ئۇلانما كۆچۈرۈش]

خىيال شامىلى



ساناقسىز كۈنلەرنى ئۆتكۈزدۈم ساناپ ،
يامغۇرلار قەلبىمنى قىلار پەرىشان .
ئولتۇردۇم سۈكۈتنىڭ كىرپىكلىرىدە ،
ئىشىكىم تالاغا قىيا ئېچىلغان .

دەريانىڭ چۈشىگە كىرمەكتە سۇلار ،
ئاسماننىڭ قولىنى تارتماقتا يامغۇر .
بىر پارچە خىيالغا يۆلىنىپ تۇرۇپ
بۇ غەمكىن ھاياتنى قىلدىم تەسەۋۋۇر .

خىيالنىڭ قارايغان يېرىقلىرىدا
يۇمشاق بىر ئەسلىمە تارتىپتۇ يىلتىز .
باراقسان ئاينىغان گۈللەر ئىچىدە
ئازابنىڭ گۈلىلا ھەممىدىن ئېگىز .

زاماندىن زامانغا ئۆتمەكتە شۇ تاپ ،
تۇيغۇمدا يەلپۈنگەن بىر تال يوپۇرماق .
ئاقىدۇ پەقەتلا خىياللىرىدا
قۇرۇغان دەريالار شاۋقۇنلاپ ئۇزاق .

ئەڭ قىزغىن دۈشمەندۇر ساختا ھاياجان ،
ئىزھارسىز سۆزلەرلا ئەڭ گۈزەل ناخشا .
قولۇمدىن تارتماقچى بولار تۇيۇقسىز
شاماللار ئايلىنىپ چوڭقۇر دېڭىزغا ...





2012 - يىل 12 - ئاپرېل بۇ يازمىنى ئاخىرىدا   ئالىمجان قاسىم تەھرىرلىگەن. ۋاقتى  2012-4-13 17:53  

ئەڭ قىزغىن دۈشمەندۇر ساختا ھاياجان
ئىزھارسىز سۆزلەرلا ئەڭ گۈزەل ناخشا

سۆيگۈنىڭ پىنھانلىقى نەقەدەر گۈزەل ھە !

ئاز ۋە ساز يېزىلىدىغان مۇشۇنداق تارتىملىق  شېئىرىلىرىڭىزغا خۇشتارمەن ئاكا. سالامەت بولغايسىز!

بۇ يازمىنى ئاخىرىدا   mamat omar تەھرىرلىگەن. ۋاقتى  2012-4-13 18:21  

مىسرالاردىكى قايناق تۇيغۇلار بولۇپمۇ دەريانىڭ چۈشىگە كىرمەكتە سۇلار ،
ئاسماننىڭ قولىنى تارتماقتا يامغۇر .
بىر پارچە خىيالغا يۆلىنىپ تۇرۇپ
بۇ غەمكىن ھاياتنى قىلدىم تەسەۋۋۇر .

تىلدىكى ئەركىن قۇيىۋېتىش ،.مىسرالاردىكى سۈزۈك ھەسرەتلەر مېنى يەنە جەلپ قىلىۋالدى...

ئۆزگىچە تۇيغۇغا باشلاپ ، تىلنىڭ يارقىنلىشىپ تۇرغان ئۇپۇقىدا چاقناشنى شەكىللەندۇرگەن بۇ روھىڭغا ھىشقاللا ئىنىم !
قەلىمىڭ ھارمىسۇن ...

ئۇزۇن بوپتىكەن مىسرالىرىڭىزنى كۆرمىگىلى، بۇ شېئىرىڭىزنىمۇ ياقتۇردۇم~!

ئالىمجان، شىرىن سوۋغىلارنى ئاياپ ساندۇقتا ساقلاپ يېتىۋەرمەيلى!
تۇيغۇدىكى سۈزۈكلۈك ۋە چىنلىقتىن سۆيۈندۈم....

شاماللارنىڭ ئېسىلى ئىكەن،
ئەتىيازدا خىيال شامىلى.
ئىلھاملارنىڭ بولىقى ئىكەن،
ئالىمجاننىڭ شېئىر ساھىلى.

قالتىس شېئىركەن ،،،،،،،،،بەك ياقتۇردۇم.......قەلىمىڭىزگە بەرىكەتلەر بولسۇن....

شېئىرىڭىزمۇ تاتلىق چىقىپتۇ ، ئەمدى مەنمۇ خياللىرىمىغا قايتىپ ، كېچىنىڭ شامىلىدا خىزمىتىمگە ئۇزاپ قالاي ..............................!

بىر پارچە خىيالغا يۆلىنىپ تۇرۇپ
بۇ غەمكىن ھاياتنى قىلدىم تەسەۋۋۇر .

ھايات ھەققىدىكى  خىياللىرىڭىزنى بىلىپ  باققۇم كىلىدۇ، بەلكىم شامالغا ئوخشار ۋە ياكى سۇغا...
بەك چىرايلىق چىقىپتۇ بۇ شېئىر ،بەرىكەتلىك بولۇڭ!

ئالمجان ،شېئىرىڭىزنى بەك ياختۇرىمەن .قۇت تىلەيمەن

ئالىمجان شېئىرلىرىڭىزنى بەك ياقتۇراتتىم.بۇ شېئىرىڭىزدىكى لېرىكىلىق،گۈزەل تۇيغۇلار ئۆزگىچە تەسىر بەردى ماڭا.
ئىجاد بۇلىقىڭىز بۇلدۇقلاپ تۇرغاي.

      سالام ئالىمجان ،  .....   تىل ئىشلىتىشىڭىزدىن ھوزۇرلاندىم.    گۈزەل تۇيغۇلىرىڭىز ئۈزۈلۈپ قالمىغاي....

قىممەتلىك ۋاقتىنى چىقىرىپ شېئىرىمغا نەزىرىنى ئاغدۇرغان بارچە ئەزىز قېرىنداشلىرىمغا سالام! ھاياتلىق ۋە رېئاللىقىمىز ھەققىدىكى  ھەر بىر خىياللىرىمىزدا  ئۇچرىشىپ تۇرغايمىز...