سەرداھى: چوغ ياپرىقى [ئۇلانما كۆچۈرۈش]

چوغ ياپرىقى
1
مەن چانىماق بولغاندا ئاخىر،
كۆيۈۋاتقان ئوتنىڭ تىلىنى.
كېچە كىرىپ كەلدى ئىچىمگە،
سېلىپ قات-قات كىيىملىرىنى.

پىچىرلايدۇ گۈللەرگە ھىلال،
قاپقاراڭغۇ بۇلاق ئىچىدە.
ئىچىمدىكى دەرەختىن چۈشۈپ،
ئىتتەك قاۋاپ چىقتى بۇ كېچە.

چېقىلغۇچە سايرايدۇ دۇتار،
دار ئالدىدىن ئۆتكەندە كۆڭۈل.
تاش ئىچىدە تاشتەك سۈزۈلۈپ،
چۈش كۆرىدۇ قۇرۇپ قالغان گۈل.

شاراقلىتىپ زەنجىرلىرىنى،
غالجىرلىققا قايتىدۇ خىيال.
مېنىڭ چەكسىز يالغۇزلۇقۇمغا،
ئوت قالايدۇ قىرىق بىر ئايال.
2
دەرىزىدە گۈللەيدۇ سۈكۈت،
جىگدە گۈلى كۆيدى ساپسېرىق.
قەپىسىدە نالىدار بۇلبۇل،
ئوتقا قاراپ قاچتى بىر بېلىق.

دەريالارنىڭ قاقاسلىقىدا،
ئوت تۇتاشتى بىر پاچە تاشقا.
تاڭ ئاتقىچە يىغلىدى دۇنيا،
باھار كىرسە ئون توققۇز ياشقا.

سۇنىڭ نەمخۇش جىمجىتلىقىدا،
ئاقار لەيلەپ ئاشىقنىڭ جېنى.
كۈيلەر مەڭگۈ تىلنىڭ سۆڭىكى،
مۇھەببەتنىڭ جۇل-جۇل تېنىنى.

كارۋاتتىكى بىر تال چوغ گۈلى،
ئايغا قاراپ ئېچىلدى قات-قات.
قان بولىدۇ ئۇنىڭ غۇنچىسى،
مېنى ياشاپ بولغاندا ھايات!
3
ئولتۇراتتىم بۇلاق بويىدا،
چۈشۈمدىكى بىر قىزنى ساقلاپ.
كىرىپ قالدىم ئۇنىڭ بېغىغا،
مەجنۇنتالنى ئات ئېتىپ ئويناپ.

جان بېرەتتى كۆزىدە ئاھۇ،
چاچلىرىدا كۆيەتتى كېچە.
كىرپىكىدە تىلسا يۈرەكنى،
لەۋلىرىدە كۈلەتتى غۇنچە.

ئاي توساتتىن قالاتتى ئۆلۈپ،
نۇر تامغاندا ئايدەك چېھرىدىن.
تال ئېگىلسە تالدەك بويىغا،
تولغۇناتتى دەريا مېھرىدىن.

مەن ئايلنىپ سالقىن شامالغا،
ئاختۇراتتىم زىناقلىرىنى.
ئۇنىڭ گۈلدەك تەبەسسۇمىغا،
قۇيۇپ ئىچتىم پىراقلىرىنى.
4
پەرۋازدىكى ئەركىن قۇش ئىدىم،
مېنى دىلبەر قاندەك سايراتتى.
ئىچىمدىكى تاشتىن قاراڭغۇ،
ئاھۇ كۆزى يۈرەككە پاتتى.

خىيالىدا يەڭگىل پەر قېقىپ،
يېتىۋالغۇم كەلگەن چۈشىدە.
قىسمەت ئۈزۈپ ئارغامچىسىنى،
پورەكلىدى ھىجران غۇچچىدە.

ئاچچىق-ئاچچىق بوزلايدۇ ناخشام،
قۇرۇپ قاقشال بولدى يەنە تەن.
سۈمۈرمەكتە بۇلاق تۈۋىدە،
كۆز يېشىمنى بىر تۈپ ياسىمەن.

ئايغا بەردىم ئاشىقلىقىمنى،
پەرىشاندۇر كۆيۈك باياۋان.
سايىسىدا كىرپىكلىرىمنىڭ،
سارغايماقتا بىر پارچە ئاسمان.
5
ئۇخلاتمىغان يارنىڭ دەردىدۇر،
قونۇۋالدى ئاسمانغا يۇلتۇز.
مەن ئولتۇرۇپ تۈننىڭ شېخىدا،
سەھەرگىچە سايرايمەن يالغۇز.

چىقالمايمەن تامدىن ئارتىلىپ،
ئاي ئۆيىگە باغلىۋالدى ئىت.
تەتۈر ئېچىپ ئىشىكلىرىنى،
كارۋىتىمدا ئۇخلايدۇ ۋاقىت.

نېمە دەيتتىم كۆنگەن كۆڭۈلگە،
دەرتتىن ئۆزگە نەدۇر دورىسى؟!
باغرىمدىكى يېشىل ئوتلارغا،
كىيىكلەرنىڭ چۈشەر شولىسى.

قەبرىستانغا قاچتى بىر جەسەد،
مۇھەببەتنىڭ ئۆڭدى قاسرىقى.
چوغ تىلىگەن قىزنىڭ كۆزىدە،
كۆيەر تۈتەپ جاننىڭ ياپرىقى.

2011.1.16

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 15:30  

ئوت

دەردىمگە ئېچىلدى گۈلنىڭ ھەسرىتى،

قاناشقا باشلىدى يەنە بۇ يۈرەك.

كېچىنىڭ قاراڭغۇ ھاياجىنىدا،

ئۆزۈمنى ھېس قىلدىم يالغۇز دەرەختەك.

غەملەرنىڭ قىپقىزىل جاراھىتىنى،

مېھرىمدە نەچچە رەت چىقىتىممەن سىيلاپ.

دىلبەرنىڭ سىيماسى ئاجىز كۆزۈمدە،

بىر تامچە كۆز ياشتەك تۇرار يالتىراپ.

ئاۋازىم سىڭمەكتە تاملارغا چەكسىز،

پاتمىدى تۇپراققا بۇغدايدەك سۆزۈم.

كەپتەرنىڭ بۇقۇلداپ ئۈنلىشىنى كۆر،

ھىجرانكار دەملەرنىڭ يەكتاسى ئۆزۈم!

تېنىمدە ئاققان ئۇ سۇسىز دەريادا،

چېچىنى تارايدۇ بىر پارچە بۇلۇت.

كۆيدۈرسەڭ كۆيدۈرگىن قانغۇدەك دىلبەر،

كۆيدۈرەر ئەڭ دەھشەت قەبرىدىكى ئوت...

2010.8.2

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 15:54  

سۇنىڭ يارىسى
1
دۇنيا قېرىپ كەتمەستىن بۇرۇن،
ئونبەش كۈنلۈك ئايدەك قىز ئىدى.
قىزنىڭ چوغدەك بارمىقى ئارا،
يازنىڭ يېشىل چۈشى تەرلىدى.

سۇنىڭ يۇمشاق خىياللىرىدا،
سۆيگۈ بەلكىم ۋەتەنسىز دەرەخ.
تۇرمۇش يازغان كىتاب قېتىدا،
كاۋاپ بولۇپ كۆيمەكتە يۈرەك.

قۇمنىڭ قىزىق ھارارىتىنى،
سۈمۈرىدۇ ئاۋايلاپ ھىلال.
چېقىپ تەننىڭ دەرىزىسىنى،
تۈن قوينىغا شۇڭغۇيدۇ شامال.

يارنىڭ يىرتىق قولياغلىقىدا،
كۆڭۈل دىگەن بىر غېرىچ ئاسمان.
چىقىپ كەلسە ئۆيىدىن بۇلۇت،
قۇش كۆزىدىن تاراملايدۇ قان.
2
دىل كۆلىدە ئوتنىڭ ئۆركىشى،
سۇنىڭ كۆكسى بارار چىڭقىلىپ.
سۆرەپ تەننىڭ غېرىپلىقىنى،
كۈزگە كىردىم كۈزدەك سارغىيىپ.

كۈزنىڭ مەسۈم پەرىشانلىقى،
گۈل بەرگىدىن چۈشتى دومىلاپ.
ئۇسساپ ياتقان تەكىلماكاندەك،
تۇرمۇش ياتار باغرىمدا ئۇخلاپ.

تىل شاخلىرى سۇندى قايرىلىپ،
تۆكۈلدى سۆز قاردەكلا يۇمشاق.
ئاينىڭ قۇرغاق ھاياجىنىدا،
كۆيۈپ كەتتى بىر تال يوپۇرماق.

ياردەك پاكىز قارنىڭ ئۈستىدە،
قىزىل گۈلدەك پورەكلەيدۇ ئىز.
قار چۈشمەكتە، قاردەك مۇلايىم
كىرىپ كەلدى قەلبىمگە بىر قىز.
3
يەرنىڭ سۈزۈك چۈشلىرى ئارا،
قان رەڭگىدە ئۆركەشلەيدۇ سۇ.
قۇمۇشلۇققا كىرىپ كەتتى ئەر،
كۆكتە پەرۋاز ئەيلەيدۇ ئاھۇ!

سۆزلىگەندە سۇنىڭ يارىسى،
ئاياللارنىڭ غېرىپلىقىنى.
سايدا قالغان بىر تال تاش ئىدى،
داغدا قالدى مىڭ ئەرنىڭ جېنى!

داغدا قالدى مىڭ ئەرنىڭ جېنى،
پېلەك بەرمەس ئەجىرسىز خەمەك.
تۇرمۇش يەنە كۈيلەر ئۆزىنى،
رەستىلەردە بىر دۆۋە سۆڭەك...!!

2010.12.5

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 15:46  

   ئايغا بەردىم ئاشىقلىقىمنى   . . .   بەك يېقىملىق ئاڭلاندىيا  ؟؟؟؟؟؟؟؟؟

تاملاردا ئاپتاپنىڭ جاراھىتى بار

1
دەرەخلەر يىغلاڭغۇ، شاماللار بەڭۋاش،
ئاي چىقىپ ئۆيىدىن ئونبەشكە تولدى.
ئىشتانسىز بىر بالا لاي ئويناۋېتىپ،
مۇھەببەت قەسرىگە شاھزادە بولدى.

چوغ ئاقتى شىرىلداپ خىياللار ئارا،
تاراسلاپ ئۈزۈلدى دۇتتار تارىسى.
بىر تال گۈل ئېچىلدى توزۇپ كەتكىلى،
يۈرەكتە قالىدۇ ئۇنىڭ يارىسى.

قۇشلارنىڭ كۆزىدە نازغىيدۇ سەھەر،
بىر ناخشا يۈرەكنى تىلىپ ئۆتىدۇ.
چوغلانغان نەپەسلەر كۈل بولماقتا كۈل،
بىر يۇلتۇز ئاسماندىن يەرگە كۆچىدۇ!
2
مۇھەببەت شورلۇقتا ئېچىلغان چوغلۇق،
ۋە ياكى چىمەندىن بالقىغان بىر قۇش.
ئولتۇرۇپ كۆڭۈلنىڭ بوسۇغۇسىدا،
ئىككىمىز ئۆز-ئارا باشلايمىز ئۇرۇش.

خىياللار قىقاس سېپ كېلەر باستۇرۇپ،
يالغۇزلۇق قىلىچتەك پاتىدۇ جانغا.
قىپقىزىل قان ئىچرە ئەتلەس تەنلىرىڭ،
يىلاندەك يۆگىشەر بارماقلىرىمغا.

سۆزلەرنىڭ كۆزلەرنى ئۆپۈشلىرىدە،
گۇناھنى سۆزلەيمىز بېقىشىپ تىمتاس.
مېھرىمدىن نەم بولغان قولياغلىقىڭدا،
يېشىڭدەك شۇررىدە ئېرىيدۇ قىساس.
3
كۆزۈڭدە كۈۋەجەر بىر كاسە شاراب،
ئىچىمەن ئالدىڭغا ئېتىلىپ بېرىپ.
كۆڭۈلنىڭ شېخىدا مەي بولدى سەبرەم،
كەل، جېنىم! قولۇڭغا بېرەي ئىرغىتىپ.

قىرىق تال ئۆرۈلگەن چېچىڭغا تەققاس،
كېچىنىڭ قاراڭغۇ كۆكسىدىكى دار.
قارىغىن كۆڭۈلنىڭ دەرىزىسىدىن،
تاملاردا ئاپتاپنىڭ جاراھىتى بار...

تاملاردا ئاپتاپنىڭ جاراھىتى بار،
يېپىپ قوي ئۈستىگە قولياغلىقىڭنى.
كۆچىدۇ يۈرەككە تۈننىڭ قارىسى،
كۆرسە ئاي ئونبەشكە تولغانلىقىڭنى...


2010-يىلى 23-ئاۋغۇست

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 15:59  

كۆيۈۋاتقان قار
1
خىيالنىڭ سۈپسۈزۈك پىيالىسىگە،
باھاردەك ئىللىغان مېھرىمنى قۇيدۇم.
شەپەقتەك قىزاردى بىر تۈپ ھاياجان،
مەن ئۈچۈن ئېچىلغان بىر گۈلنى تۇيدۇم.

قىپقىزىل بۇغدايدەك يالىلدايدۇ چوغ،
ئىشىكتە، تاملاردا، يۈرەكتە يەنە.
دەرىزە تۈۋىدە يوللارغا باقتىم،
قۇشلارنىڭ ھۈركىشى قىلار تەنتەنە.

كۆڭۈلنىڭ قاراڭغۇ شاخلىرىدا نۇر،
تولغۇنۇپ دېڭىزدەك دولقۇنلايدۇ تەن.
كىمگىدۇر ئېيتماقچى بولغان سۆزۈمنى،
يادلىدىم نەچچە رەت ئىخلاسىم بىلەن.

گۈزەل بىر ئاۋازدا چېكىلدى ئىشىك،
نىلۇفەر بەرگىدەك تىترىدى دىلتار.
چېچىنىڭ ئۇچىنى ئويناپ قولىدا،
ئون سەككىز يېشىغا كىرىپ كەتتى يار.
2
ھۈپپىدە ئېچىلغان چىغىرتماق گۈلى،
پەرىشان قەلبىمدە ئويغۇتىدۇ غەم.
قاراڭغۇ كېچىنىڭ چاچلىرىدا ئاق،
سەھەرنىڭ مەڭزىدىن سىرغىيدۇ ئەلەم.

دۇتارنىڭ تارىدا بارماقلار تىمتاس،
ئۇدارغا چۈشمەيدۇ مەن ئېيتقان ناخشا.
كېچىشكە نەھاجەت تەندىن، ۋەتەندىن؟!
ياشاش ئۇ باشقا گەپ، مۇھەببەت باشقا.

بۇ غەمناك قەلبىمنىڭ قاقاسلىقىدا،
گۈل ئۈنسۈن پورەكلەپ ۋە ياكى تىكەن.
ۋاقىرايمەن شامالغا، سۇلارغا، تاڭغا،
-مەن ئاشىق!...پەرھاتنىڭ تېغىدىن چۈشكەن.
3
تەشۋىشكە بوي تارتقان بىر تۈپ دەرەخكە،
ساپسېرىق ئىسمىنى يازدى سىنتەبىر.
ئىشەندىم چۈشۈمنىڭ يالغانلىقىغا،
شېئىرنىڭ ئىچىدىن ئاختۇرۇپ تەبىر.

كۆڭۈلنىڭ چۇۋۇلغان دەرىزىسىنى،
يېپىپ ھەم ئۆزۈمنى ئالدىم دالدىغا.
بىر قىزنىڭ ئۇزىغان قەدەملىرىدە،
يوللارنىڭ پايانى بويالدى قانغا.

بىر چەكسىز ئاقلىقنىڭ قارشى يۈزىدە،
كۆيمەكتە چاراسلاپ ئاپئاق-ئاپئاق قار.
قۇرىدى تىلەكلەر كۆكلەتكەن ئورمان،
شۇ قەدەر تىپتىنىچ ئۆلۈپ كەتتى يار!

2010.9.7

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 16:03  

[b]تاملاردا ئاپتاپنىڭ جاراھىتى بار ...
تىمىلا شېئىرى تۇيغۇغا تۇيۇنۇپتۇ،تىل ئشلىتىشىڭىزگە قايىلمەن.

كۆزۈڭدىكى چەكسىز باياۋان

ساڭا قاراپ ئولتۇردۇم ئۇزاق،
توزۇۋاتقان گۈلدەك پەرىشان.
يۈرىكىمگە كىرمەكتە ئېقىپ،
كۆزۈڭدىكى چەكسىز باياۋان.

كىرپىكىڭدە گىرىمسەن قىسمەت،
ياشتەك سۈزۈك تۇراتتى قاناپ.
ئاۋازىڭنىڭ زۈلمىتى ئارا،
مەن تۇيغۇمنى ئۆلتۈردۈم چاناپ.

چاچلىرىڭدا ئېسىلالمدىم،
شاختىكى ئۇ بىر تال ئالمىدەك.
تەشنالىقتەك قۇرۇپ تۈگىدى،
لېۋىڭدىكى لالىرەڭ چېچەك.

كېچە كېلىپ ئولتۇردى ئاخىر،
ئىككىمىزنىڭ يېنىدا جىمجىت.
ئۆڭۈپ بارار سۆزلەرنىڭ رەڭگى،
ئەنسىز قاۋاپ تۇراتتى بىر ئىت.

ئىستەكلەردەك قاراڭغۇ ئورمان،
گاھى كۈلۈپ، گاھ ئۆچەر ھىلال.
چارچىغاندەك قويار قاراسلاپ،
بىز يۆلىنىپ تۇرغان مەجنۇنتال.

سۇدەك ئۇسساپ بارماقتا ۋاقىت،
قوللىرىڭنى تۇتتۇم ئۇشتۇمتۇت.

كۆيۈپ كەتتى باغرىمدا سۇمبۇل،
يامغۇر بولۇپ ياغماقتا بۇلۇت...

2011.7.6

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 16:28  

ياز دەرىزىدە

ياز
بىر تۈپ دەرەخ دەرىزىدىكى
ئۆسۈۋاتقان قۇياشتەك ئېگىز.

بىر پارچە يەر
تەرلەۋاتقان ئۆزىدىن چىقىپ
قىستىلىپ كىرەر يازنىڭ ئىچىگە.
بارماقلىرى قاراڭغۇ تۈننىڭ
يازنىڭ ئوت پۇراۋاتقان چاچلىرىنى سىيلاپ تۇرۇپ
سۇنۇپ كەتتى دانىمۇ-دانە!

ياز
كېچە ھەم كۈندۈزدىكى ياز.
دەرىزىدە شىلدىرلاپ تۇرار
ئۇنىڭ يېشىل يۇپۇرماقلىرى.

مەن
دەرىزە تۈۋىدە يازغا قارايمەن
ياز ماڭا.
يازغا قاراپ چاچ تارىغان كىم؟!
خىيالىمدىن بىر ئېرىق سۇ ئېقىپ ئۆتىدۇ
قاناتلىرى يارا!

ئىشىكنى ياپتىم!
سۇدەك قاغجىراۋاتقان تەننىڭ ئىشكىنى.
ئىچىمگە كىرىۋالدى ئىسسىق بىر تال تاش!
سۆڭەك-سۆڭەكتە يازنىڭ يارىسى...

2011.6.26

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 16:31  

ئىچىمدىكى تاش

تاملارنىڭ ئەسەبىي جىمجىتلىقىغا،
گۈللەرنىڭ سايىسى پاتىدۇ چوڭقۇر.
مۇھەببەت دىگەن شۇ بىر تال خەت ئۈچۈن،
كۈنلەرنىڭ قېتىنى ئاختۇردۇم بىر قۇر.

سارغايغان بۇلۇتنىڭ يىراقلىقىدا،
پەرىشان ھىسلاردىن ئۆرلىمەكتە ھور.
ئاتلاردەك كىشنەيدۇ چۆللەرنىڭ ئاھى،
چۈشمەكتە شارقىراپ ئاسمانغا يامغۇر.

ئۇسسىغان لېۋىمدە بىر پىيالە چوغ،
ئىچىشكە تەمشىلەر مېنى گۈپپىدە.
چانىدىم قىياقتەك كىرپىكلىرىمنى،
پالتىنىڭ يۈرىكى بولغىچە زېدە.

قاراڭغۇ دەرەختىن چۈشتۈم سىيرىلىپ،
چۈش ئىچرە تولغۇنۇپ ياتار قەلەمقاش.
كېچىنىڭ چېچىغا قولۇمنى بەردىم،
تاغ بولدى ئىچىمدە ئۆسكەن قارا تاش!

2011.6.24

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 17:07  

بىر دەرەخنىڭ رىۋايىتى
1
تەرلەيدۇ پۇرقىراپ ئۇسسىغان دېڭىز،
چۆللەردە كىشنەيدۇ ئېگەرلەنگەن ئات.
مىڭ يىللار بۇرۇنقى يالىڭاچ سۆڭەك،
توغراقنىڭ باغرىدەك يېرىلغان قات-قات.

قۇملارنىڭ كۆكسىدە تىك تۇرغان پىچاق،
دەھشەتلىك ۋاقىراپ قۇرۇپ كەتكەن كۆل.
تارىخنىڭ ئىشكىدىن ئۆتمەكتە مەغرۇر،
ئەڭ كونا ئىدىيە سېسىتقان كۆڭۈل.

چۈش كۆرەر ئۇخلىماي قاراڭغۇ ئورمان،
دەرىزە تۈۋىدە چاقنايدۇ كېچە.
بىر تال تاش ئۆزىنىڭ قاقاسلىقىدا،
بۇقۇلداپ سايرايدۇ تالقان بولغۇچە.
2
قاراڭغۇ قىسمەتلەر گۈللەيدۇ جىمجىت،
ئۆلمەيدۇ بۇلبۇل ھەم گۈلنىڭ ۋەسلىدە.
مۇھەببەت قىپقىزىل تۇراتتى قاناپ،
يارىدەك سۈپسۈزۈك كارۋات ئۈستىدە.

ئەسلەرگە تاراسلاپ ئۇرۇلغان بەلكىم،
يامغۇردۇر ۋە ياكى بىر قىزنىڭ يېشى.
قىپقىزىل قان قىلغان تەن ساھىلىنى،
قامچىدۇر ۋە ياكى شۇ قىزنىڭ چېچى.

يولۇچى لىق تولغان بېكەتتۈر ئاخىر،
بىر مېتىر يەر بىلەن ئاسمان ئارىسى.
مۇھەببەت ئىشكىدىن ئۆتمەكتە تىمتاس،
بۇرۇتى خەت تارتقان ئەرنىڭ قارىسى.

كۆڭۈل ئۇ بىر پارچە قاغجىرىغان يەر،
ۋە ياكى دەريادا ئۆركەشلىگەن چوغ.
ئىشىقنىڭ چۆلىنى كەزگەن پىيادە،
مەشرەپنىڭ قىسمىتى تاڭلاردىن ئۇلۇغ!
3
رىۋايەت سۆزلەردىن قېچىپ چىقاتتى،
ئوت كەتكەن قۇمۇشلۇق كۆيەتتى تۇتەپ.
دەردىگە ئېگىزلەپ ئۆسكەن بىر دەرەخ،
چېچىنى تارايتتى ئىچىگە پەسلەپ.

شاخلاردا شىلدىرلاپ ئاقاتتى كېچە،
تاشلاردەك يەلپۈنەر ئۇسسىغان خىيال.
قاراڭغۇ كۆزلەردە نۇرانە كەچمىش،
قۇملارنىڭ تەكتىدىن پارلايدۇ يال-يال.

بۇلۇتنىڭ يېشىدا يۇيۇناتتى ئاي،
يۇلتۇزلار ئاسمانغا كەتتى چېچىلىپ.
مۇھەببەت ئالدىدا مەردۇ-مەردانە
بىر ئايال دەرەخكە ئۆلدى ئېسىلىپ!

2011.6.3

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 17:14  

قاراڭغۇ جەريان

دەرىزە تۈۋىدە يىغلايدۇ يامغۇر،
بىر پارچە قاقاس يەر تۆت تامنىڭ ئىچى.
كۈۋەجەپ تۇرغىنى كارۋات ئۈستىدە،
دېڭىزدۇر ۋە ياكى يارىمنىڭ چېچى!

قاراڭغۇ كېچىگە يۆلىنىپ جىمجىت،
مۇھەببەت ھەققىدە سۈرىمەن خىيال.
بىر تال دان تۇپراققا پاتتى-تۈگىدى...
قىپقىزىل بۇغدايدەك پىشماقتا ئايال.

سۆزلەيمەن ئوغلۇمغا ھايات ھەققىدە،
مەن تېخى مەستلىكتىن يېشىلمەي تۇرۇپ.
ۋاقىتنىڭ ھارۋىسى غىچىرلاپ ئاستا،
توختايدۇ ئىشكىمدە چاقلىرى سۇنۇپ!

2011.5.13

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 17:16  

دۇنيا بىر تۈپ قېرىماس دەرەخ

گۈل سۆزلەيدۇ گۈزەللىكىنى،
قۇياش چىقسا قاراڭغۇ ئۆيدىن.
پايانىغا چوڭقۇرلايدۇ يەر،
تاغ سۆيۈنەر يۈكسەكلىكىدىن.

ئۇسساۋاتقان سۇدۇر يا ئەمەس،
قۇم كۆچىدۇ جىمجىتلىقىغا.
ھايات سۆرەپ ماڭغان ھارۋىدىن،
كۈلكىسىنى ئاختۇرار يىغا.

يول ئىچىدە باردۇر يەنە يول،
سوزۇلغان ھەم قىيامەتكىچە.
كىم ئۇ دەرەخ يالىڭاچ دىگەن؟!
كىيىمنى سالماقتا كېچە.

ئېغىر تىنىپ ياتار تاش شەھەر،
ئۆلۈك قېچىپ چىقتى دوزاختىن.
تۇخۇمىنى سېتىپ بولغان قىز،
ئاكىسىنى ئىزلەر قاۋاقتىن.

چۆلدىن قېچىپ ئۆلىۋالدى سۇ،
دەريا ئاقار ئۆزىگە تولۇپ.
ۋەتەن دىگەن بىر پارچە ئېتىز،
سۆيمەك قىيىن قىردا ئولتۇرۇپ.

دۇنيا بىر تۈپ قېرىماس دەرەخ،
شاخ-شېخىدا سايرار تۈمەن قۇش.
قوراشتۇرۇپ سۆڭەكلىرىنى،
يەنە داۋام ئېتەر بۇ تۇرمۇش!


2011.5.14

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 17:18  

كۆڭۈلنىڭ ئىشكىدە گۈللەر دىۋانە

ئاسماننىڭ ئۈستىدە ئاسمان ياتىدۇ،
قەبرىدە ياتقىنى ئادەمدۇر پەقەت.
ئۆلۈمنى ئۆگىنىش قىيىن بىر جەريان،
توپىغا ئايلىنىپ توزۇيدۇ جەسەت.

كېچىنىڭ قاراڭغۇ قۇيرىقى ئارا،
يارىدەك سۈپسۈزۈك چېچەكلەيدۇ چۈش.
ئېسىلىپ شامالنىڭ بارماقلىرىغا،
ئاقارغان چېچىنى تارايدۇ ئۆتمۈش.

تارىخنى سۆزلەيدۇ يۇلغۇن چېچىكى،
بارخانلار ئولتۇرار چۆكۈپ ئېسىگە.
بىر تال تاش چىلىنىپ ياتىدۇ جىمجىت،
بىر قىزنىڭ قىياقتەك كىرپىكىلىرىگە.

ئەڭ گۈزەل خىيالدۇر ئۆلۈمنى ياشاش،
قۇملارنىڭ تەكتىدە ئۇخلار سەلتەنەت.
بىر ئۆمۈر ئوقۇپ ھەم تۈگىتەلمىگەن
كىتاب-ئۇ مۇئەللىم ئۆگەتمىگەن خەت.

پىچاقتۇر چۆلدىكى يىگانە دەرەخ،
پىراقتۇر چۆلدىن ھەم قېچىپ چىققان دار.
بىر ئەرنىڭ كۆكسىدىن چۈشتى سىيرىلىپ،
كۆزىنى چىڭ يۇمغان بىر قۇچاق باھار.

ئەينەكنىڭ قېتىدا ئۆچەر تەبەسسۇم،
سۆزلەرنىڭ سۆڭىكى چېقىلغان چۇل-چۇل.
ئىچىگە پەسلىگەن بىر پارچە بۇلۇت،
چۆللەرنىڭ لېۋىدە ئوينايدۇ ئۇسۇل.

ياتىدۇ تەنلەرگە يۆگىنىپ مەھكەم،
دىللارنى لال قىلغان دەھشەتلىك ناخشا.
كۆڭۈلنىڭ ئىشكىدە گۈللەر دىۋانە،
دەردىنى يوشۇرۇن سۆزلەيدۇ تاشقا.

تۇرسىمۇ قاندەكلا قىزىپ ھاياجان،
يوشۇرۇپ ئۈلگۈردى ئەنجۈر ياپرىقى.
يىلىكى بوشىغان قېرى مەدەنىيەت،
بىر كونا ھارۋىدۇر بۇزۇلغان چاقى.

مۇھەببەت تاملىرى چاك كەتكەن قەلئە،
ئاپتاپتەك پارلايدۇ ساختا ئېتىقاد.
تاشىدۇ ئۆركەشلەپ گۇناھ دېڭىزى،
قېرىغان كېمىچى سالار دات-پەرياد.

سالماقتا بىر-بىرلەپ كىيىملىرىنى،
ئەزەلدىن يالىڭاچ ياشىغان تۇرمۇش.
بىر قىزنى تالىشىپ مىڭ يىلدىن كېيىن،
ئىككى ئەر ئۆز-ئارا باشلايدۇ ئۇرۇش...

2011.5.16

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 17:21  

غەزەللەر
1
مېنى دەردۇ-بالا بىرلە خاراب ئەتمىشلىرىڭ باردۇر،
چىقىپ ھىجران تۈنىدىن گاھ، يەنە كەتمىشلىرىڭ باردۇر.

چېچىڭنىڭ قامچىسى تەگدى، ئەزىز باشىمنى قان ئەيلەپ،
يارا بولغان يۈرەكىمدە گۈزەل كەچمىشلىرىڭ باردۇر.

غېرىپ جانىمنى دان ئەتتىم، قېنىم بولغايغۇ ئۇسسۇزلۇق،
قۇرۇق-قاخشال سۆڭەكىمدە قانات كەرمىشلىرىڭ باردۇر.

قاراڭغۇ كەچلىرى سەنچۈن كۆيۈپ تۇرغان چىراق تۇرسام،
ئۆزۈڭ يۇلتۇز كەبى گاھى يېنىپ ئۆچمىشلىرىڭ باردۇر.

دىلىستانىمدا قۇش بىلسەم، يىراق چۆللەرنى ياد ئەتتىڭ،
مېنىڭ قەدرىمگە ئەي دىلبەر ھامان يەتمىشلىرىڭ باردۇر.
2
يورۇق تاڭلارغا زار قىلما، كېچەڭدە نۇر-چىراقتۇرمەن،
ئىشىق دەرياسىدا چوغدەك تولۇپ ئاققان پىراقتۇرمەن.

ئەنە، پەرۋانە ئوت ئىچرە ئۆلۈمنى ئىختىيار ئەتتى،
مېنى ھىجرانغا يار قىلما، بىسى قان-قان پىچاقتۇرمەن.

لېۋىڭ غۇنچە، غېمىڭ شۇنچە، كۆزۈڭگە جان بېرەي قانچە؟!
سېنى ساقلاشقا پىنھاندا قويۇق ئۆسكەن قىياقتۇرمەن.

تۈمەن گۈللەر ئارا سەندىن دىلىم رەنجى شىپا تاپمىش،
كۆيۈكنىڭ ۋەجىدىن بىلسەڭ سامان رەڭگى سىياقتۇرمەن.

كۆڭۈل ئايۋانىغا قونغىن، ئۇرۇپ خەندان تازا سايرا،
گۈلىستانغا ئاياز كۈتكەن دىلى كوردىن يىراقتۇرمەن.

غېرىپ چۆللەرنى سەيلەتتىڭ، يۈرەكنى قانۇ-خۇن ئەتتىڭ،
چېچىڭنىڭ دارىغا دىلبەر ئېسىلغان چىڭ شىراقتۇرمەن...!
3
كۆيۈپ ئىشقىڭدا تولغاندىم، كۆڭۇل ئىزھارغا زار ئەتمە،
جېنىمنى سايرىتىپ قان-قان، سۇنۇق دۇتارغا تار ئەتمە.

مۇھەببەت مەنزىلىن كۆزلەپ، تاغۇ-دەريا ئېشىپ كەلدىم،
بوسۇغاڭ تۈۋىدە ئاخىر يەنە يىغلارغا يار ئەتمە.

تىلىم جان بەرسە ئالدىڭدا، غېمىم كۆكلەيدۇ باغرىمدا،
چېچىڭدا ئوينىتىپ جاننى ئېگىز ئاسماققا دار ئەتمە.

دىلىم غەمناك، تېنىم جۇل-جۇل ئىشىكىڭدە قەلەندەرمەن،
رەھىم ئەيلە ماڭا بىر رەت، پۇچۇق شۇ نانغا خار ئەتمە.

مېنىڭ ئاھىم يىتىپ بەلكى بولۇر تالقان قورام تاشمۇ،
يېشىم ئۆزرە غۇلاچ تاشلاپ ئۈزۈشكە ئىختىيار ئەتمە.

گۈلىستاننى تەرك ئەتتىم، كۆيۈك سايدا سېنى دەيمەن،
كۈلۈپ باققىن دەرىزەڭدىن، يولۇمنى ئۇنچە تار ئەتمە.

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-4-9 17:25