ئەھەدى---ئىككى غەزەل [ئۇلانما كۆچۈرۈش]

              ئىككى غەزەل
ئەھەدى

ئاھ، مېنىڭ باشىمغا مىڭ سەۋدانى جەم قىلدى پەلەك ،
گاھ ئىشىق شاھزادىسى ، دىۋانە ھەم قىلدى پەلەك .

مۇپتىلا ئەيلەپ گۈزەل ماھى تاباننىڭ   ئىشقىغا ،
بەردى ئارماننى تولا، دەرماننى كەم قىلدى پەلەك .

نە بولۇر لەۋ جامىدىن بىر قەترە  زەمزەم   ئوتلىسام ،
جانۇ - جىسمىمنى تۈگەل ھىجرانغا يەم قىلدى پەلەك .

ناگىھان يەتسە ۋىسالنىڭ شېخىغا سۇنغان   قولۇم ،
شۇھامان مىكرى بىلەن جەبرى - سىتەم قىلدى پەلەك .

يار ۋىسالىن   تۇتىيا ئەيلەپ  مېنى خەس   بورىيا ،
ئاز كېلىپ يىغلاتقىنى  قوشلاپ ئەلەم قىلدى پەلەك .

ئۆتكىچە ئەللىك يەنە ئالتە  داۋاندىن   يامىشىپ ،
باشتا ساچىمدىن تولا  بىسيارى غەم قىلدى پەلەك .

شۈكرى قىل ، نىمجان يىتىم ئاشىقلىغىڭدىن  ئۇرما ئاھ ،
بەلكى قىسمەتتە سېنى‹ غېرىپ-سەنەم › قىلدى پەلەك
                     (2)
نە بالا بولدى، ئاۋۇپ كەتتى ئەجەپ مەندە   خىيال ،
باشتا ساچىمدىن تولا، ھەتتاكى جان - تەندە خىيال.

بىلمىدىم ، قايدىن كېلىپ چاپلاشتى بۇ سەۋدا ماڭا ؟
كەتكىنىم قىزىق ، ھۇشۇمدىن گاھى سۈرگەندە خىيال .

كاژ پەلەك بىر جانغا مىڭ جەۋرى - سىتەم قىلدى نېتەي ،
قىلمىسۇن جان قايغۇسى تۇتقاندا قاي بەندە خىيال ؟

داغى ھەسرەتتە چاناغىم ياشقا تولغاي لىپمۇ - لىپ ،
كەچمىشىمنى يېتىلەپ ئالدىمغا كەلگەندە    خىيال .

ئۆتتى  ئۆمرۇم  ئىشق چۆلىدە  خاكسار دىۋانىدەك ،
ئاھ ، نېچۇك سۈرمەي قاباھەت چۈشنى كۆرگەندە خىيال ؟

دەشتى ھىجراندا تىنەپ يۈرسەم يىگانە  ئاھ  ئۇرۇپ ،
قىلمىغايمەنمۇ   خىيالەن   يارنى  سۆيگەندە  خىيال  ...

قىلماڭىز‹‹ خىيالپەرست›› دەپ تەلۋە نىمجاننى مازاق ،
قىلمىغاي   بەلكىم كىشىنىڭ روھى  ئۆلگەندە  خىيال.

  غەزەلنىڭ تىل پاساھىتى بىلەن بەدىئىي كامالىتى ئارۇز ئىشتىياقىدىكى ئاشىقلارنىڭ ‹‹جېنىنى ئېلىپ جاڭگالدا قويغىدەك››...

  ئاللاھ مەرھىمىتىدىكى قەلەم نۇسرەتلىرىگە كۆز تەگمىسۇن...

قەلبىڭىزدىن تۆكۈلگەن مۇڭلۇق ناخشىلار ئۈزۈلۈپ قالمىغاي .

ئابدۇلئەھەت قادىرى ئاكامنىڭ تېنىگە سالامەتلىك، ئىجادىيىتىگە تېخىمۇ بەرىكەت يار بولغاي!

      كىتاپخاننىڭ شېئىردىن ئۆزى ئويلاپ يۈرگەن تۇيغۇلىرىنى تېپىۋىلىپ مەستخۇشلۇققا چۆمۇلىشى شېئىرنىڭ مۇۋاپىقىيەت داۋانلىرىدىن ھالقىغىنى بولسا كېرەك.قەلەمىڭىزگە يەنىمۇ زور نۇسرەتلەر يار بولسۇن!

ھەشقاللا ئابلەت ئاكا!

ئەجەپ ئېسىل يېزىلغان غەزەلكەن.

ئۇستاز  ئابدۇلئەھەد قادىرىنىڭ غەزەللىرىنى تولىمۇ زور ئىشتىياق بىلەن ئوقۇيمەن، بۇ غەزىلىڭىزدىنمۇ  ئالەمچە ھوزۇر ئالدىم ، رەھمەت سىزگە.