نەۋرەمگە ‹‹شېئىر›› غەنىزات غەيۇرانى [ئۇلانما كۆچۈرۈش]

[code][/code]                   نەۋرەمگە
                    (شېئىر)
   (نەۋرەم جەۋلاننىڭ سۈننەت تويى مۇناسىۋىتى بىلەن ھەممە نەۋرىلىرىمگەھەم نەۋرىلىرىم يېشىدىكى بارلىق ئۆسمۈرلەرگە بېغىشلايمەن)
      
              غەنىزات غەيۇرانى
      
         مەنمۇ سەندەك بالىدىم،
        ئاتمىش يىللار ئىلگىرى.
        تۇغقان ئېزىز ئائانامنىڭ،
        دىل پارىسى، جىگىرى.
      
     مانا ئەمدى ياشىنىپ،
     بولدۇم نەۋرىلىك - بوۋا.
    ‹‹ئۆمۈر ئاتقان ئوق›› دېسە،
     چۈشەنمەپتىمەن، توۋا.

     ئۆمۈر يولى بەك قىسقا_
    ئىكەن، كۆپكەن داۋىنى.
    ئۇچرايدىكەن شۇ يولدا،
    ئىتى، قويى، قاۋىنى.

     مەنمۇ سەندەك داۋاندىن،
     بېسىپ ئۆتتۈم نەچچىنى.
    بەزىسىدىن تېچ ئۆتتۈم،
    بەزىسى توستى مېنى.

    توسقانلىرى دۆشكەللەپ،
    ئىتلىرىغا  تالاتتى.
    تېچ ئۆتكىنىم ئۇزىتىپ،
   ئاق يول تىلەپ قالاتتى.

   ھايات يولى بەزىدە،
  تۇتتى قولۇمنى سىلاپ.
  كۆپ ھاللاردا سوغىتى،
  بولدى دەرد-ئەلەم ئازاب.

  كۆرۈپ ئۆتتۈم ھەممىنى،
  كۆرمىگىنىم گۆر قالدى.
  ماڭا دەپ گۆر قازغانلار،
  ‹‹نىجاتچىڭ بىز›› دېۋالدى.

   سورىدىم مەن تەڭرىدىن:
   ‹‹ھاياتلىق دېگەن دەردمۇ؟
   تۇغۇلماقلىق جىنايەت،
   ياشىماقلىق قىسمەتمۇ؟

   بەخت دېگەن نېمە ئۇ؟
  مەنسۇپ قايسى بەندەڭگە؟
  كىملىرىڭنى بۆلەيسەن،
  غەپلەت باسار كۆرپەڭگە؟››

  ئالالمىدىم تەڭرىدىن،
سوئالىمغا نەق جاۋاب.
نىدا كلدى بىر چاغدا
‹‹جاۋابىنى ئۆزۈڭ تاپ.››

ئۇزاق-ئۇزاق ئويلىدىم،
تاڭغا ئۇلاپ كېچىنى.
يىڭنە چۈشكەن قۇدۇقنىڭ_
ئاختۇرغاندەك ئىچىنى.

بىردىن دىلىم يۇرىدى،
تۈندە چىراغ ياققاندەك.
يېنىكلىدىم سوئالنىڭ_
جاۋابىنى تاپقاندەك.

مۇنداق ئىكەن جاۋابى:
ئۆزى كېلەر بەخت يوق.
قاچان قۇرۇق ئارزۇغا،
بولغانىدى قورساق توق.

ھايات دېگەن ئۆتكۈنچى،
كۈرەش ئۇنىڭ جەريانى.
كۈرەشكەنلەر ياشايدۇ،
يېلىنغانلار قۇربانى...

كەچۈر ،نەۋرەم سورىماي،
ئەمدى كونا خاماننى.
چۈشىنىسەن ئۇزىماي،
سەنمۇ تۇرمۇش، جاھاننى.

سەنمۇ يىگىت بولىسەن،
كۆزنى يۇمۇپ  ئاچقۇچە.
بەلكىم بولار تۇرمۇشقا،  
كۆز قارىشىڭ باشقىچە.

شۇڭا نەۋرەم قۇلاق سال،
ساڭا ئېيتار سۆزۈم بار.
بولۇشۇڭنى تىلەيمەن،
ئۆز خەلقىڭگە غەمگۇزار.

ئېسىڭدە تۇت خەلقىڭنى،
مەيلى ئوت يا سۇغا كىر.
ئەل كۈتكەندەك ئادەم بو.
  تىلى بىلەن دىلى بىر.

ئاچ قالساڭمۇ باشقىنىڭ،
رىزىقىنى تالاشما.
تىرناق تىرەپ ئۆمىلەپ،
يۇقىرىغا ياماشما.

شۆھرەت ئۈچۈن ئۆزگىنى_
ئىتتىرىشتىن ھەزەر قىل.
تاپان يالاپ ياشاشتىن،
مەرد ئۆلۈمنى ئەۋزەل بىل.

سەن ئۇيغۇرنىڭ بالىسى،
مەڭگۈ شۇنداق بولۇپ قال.
مەيلى يىغلا، مەيلى كۈل،
ۋەتىنىڭدە تۇرۇپ قال.

كەلگۈسىڭگە، بەختىڭگە،
ئىشەنچىڭنى سوۋۇتما.
مەخمۇت، يۈسۈپ، سادىردەك،
ئەجدادىڭنى ئۇنۇتما.
              1995- يىل ئۈرۈمچى.
(قەشقەر ئۇيغۇر نەشرىياتى، شىنجاڭ ئېلېكترون ئۈن-سېن نەشرىياتى 2009- يىلى 12- ئاي 1- نەشرى) ‹‹غەنىزات غەيۇرانى ئەسەرلىرى›› توپلىمىدىن ئېلىندى.

  


   







0

نەۋرەمگە ‹‹شېئىر›› غەنىزات غەيۇرانى

    ماۋزۇ ، ژانىر ۋە ئاپتور نېمىشقا ئارقىمۇ ئارقا ئۇلاپ يېزىلىدىغاندۇ؟  شېئىر سۆزى نېمىشقىمۇ قوش تىرناق ئىچىگە مەھكۇم قىلىنىدىغاندۇ؟


بۇ يازمىنى ئاخىرىدا   ARKZAT تەھرىرلىگەن. ۋاقتى  2012-9-23 15:41  

      توغرا دەيسىز، خەت ئۇرسام ئەشۇنداق بولۇپ قېلىۋاتىدۇ، قانداق قىلسام ئوڭشىلار، مەسلىھەت بەرگەن بولسىڭىز.

   شېئىرنى ئوقۇپ كۆڭلىم تىندى، ئىملا خاتالىقلىرى ئوڭشىلىپتۇ، سىزگە كۆپ رەخمەت، كۈنلىرىڭىز خۇشال ،ئىجادىيەتلىرىڭىز ئۇتۇقلۇق بولسۇن!