ئەلتۇغ:كۆمۈر يەيدىغان قاغا(ساتېرا) [ئۇلانما كۆچۈرۈش]

كۆمۈر يەيدىغان قاغا

(ساتېرا)

ئاڭلىغان مەن سېنى يەيدۇ دەپ،
توڭ ياڭاق، نىجاسەت ياكى تاپ.
بۈگۈن بىر سوئال بار كاللامدا،
مەن سوراي ئەي دەيۈز، بەر جاۋاب:

بۈگۈنمۇ قونۇپسەن ئامبارنىڭ،
ئۈستىگە بىر ئوبدان ئەپلىشىپ.
يېسەڭمۇ بىر پاتمان كۆمۈرنى،
قالماپسەن تۈڭلۈككە كەپلىشىپ.

ئۆتكەن يىل بىز قىشنى بەكمۇ تەس،
ئۆتكۈزگەن سوغۇقتىن جاقىلداپ.
سەن شۇ چاغ ئۆگزىدە بوپ گۇۋاھ،
يۈرگەنغۇ سەيلى قىپ، قاقىلداپ.

مەكتەپنىڭ ئىشچىسى كۆمۈرنى،
تارقاتقاندا ئۈچ كۈندە بىر چېلەك.
يەتمىسە بالىلار ئۆيىدىن،
ئەكەلگەن تاراڭگا، شاخ-تېزەك.

ھەر كۈنى قۇيۇلغان قۇلاققا،
تېجەشلىك بولۇشنىڭ شوئارى.
ئېيتقىنا، شۇ سەبىي بالىنىڭ،
ئالدىڭدا نېمىتى گۇناھى؟!

ئاشقانتى توپ-توغرا بەش توننا،
پاك-پاكىز يەپسەن ياز پەسلىدە.
ھە،شۇڭا ئىچىڭمۇ تېشىڭدەك،
قاپ-قارا ئىكەنغۇ ئەسلىدە!

چۈمكىگەن تۈڭلۈكنى نەچچە رەت،
ئەنسىرەپ قورقۇنچ ئىچىدە.
ياكى سەن ياسىتىپ بىر ئاچقۇچ،
ئاچتىڭمۇ ئىشىكنى كېچىدە؟

بۇ قىشمۇ يەۋالساڭ ھېيىقماي،
توشامدۇ مەكتەپنىڭ كۆمۈرى؟
بۇرنا كۈن سەن قونۇپ يوقالغان،
مەكتەپنىڭ رېشاتكا تۆمۈرى!

ئۇۋاڭغا كۆتۈرۈپ قاچتىڭمۇ،
ئىئانە قىلىنغان ئوتۇننى؟
بىلمىدىم قاغىلار مۇشۇنداق،
خۇش قىلىپ يۈرەمدۇ خوتۇننى؟!

يۇقىرى تەكشۈرسە ناۋادا،
تۆھمەتكە قالارمۇ بوغالتېر؟
«سەن يېگەن!» دېسە كىم ئىشىنەر،
بولمىسا تۇمشۇقۇڭ قاڭالتېر؟!

ھە، شۇڭا يېسەڭمۇ مەيلىتتى،
تۇمشۇقۇڭ ئۆتكۈدەك ئاشلىقتىن.
بىچارە مالىيە مۇدىرى،
بەك خېجىل بوپ قالدى باشلىقتىن...

بۇ يازمىنى ئاخىرىدا   ئەلتۇغ تەھرىرلىگەن. ۋاقتى  2012-9-22 21:25  

بۇ يازمىڭىز بىلەن بۇندىن ئىككى يىل ئىلگىرغۇ دەيمەن ،جەنۇپتىكى بىر مەكتەپتە سىنىپ ۋە ئىشخانىلارغا كۆمۈر بەرمەي ئوقۇتقۇچى-ئوقۇغۇچىلارنى زار قاخشىتىپ، ئاخىرى مەكتەپ مۇدىرى ئۈستىدىن شىكايەت قىلىپ تورلارغا يولىغان بىر يازما ئېسىمگە كەلدى. قارىغاندا بۇ ساتىرادەل شۇ ۋەقەگە ئاساسەن يېزىلغاندەك قىلىدۇ . ھەرنىمىگە نەپسى چوغ تارتىدىغانلار بولىدىكەن ......

مۇنداق قاغىلار ھەر بىر ئورگاندىن تېپىلامدىكىن دەيمەن...

ئىجادىيىتىڭىزگە ئۇتۇق تىلەيمەن

رەھمەت پەرىدە خانىم، ياخشى تىلەكلىرىڭىزگە!

ھەي...«قاغىلار»مۇ ساۋاتلىق بولغان بولسا، مۇشۇ يازمىنى كۆرگەن بولسا...دەپ ئويلىدۇم.بىراق ھېچگەپ يوق،بۇنىڭ ئامالى بار،بىز شۇ «قاغىلار»ئاڭلىسا ،ئاڭلىمىسا بىزنىڭ ئۇلار توغرىسىدا نېمە يازغانلىقىمىزنى، بىر ئۇقۇپ بەرسەكلا ئۇلارنىڭ رەڭگى «قارا»دىن «ئاق»قا ئۆزگىرشىمۇ مۇمكىن.مەزمۇندىن ساترانىڭ خۇسۇسىيتى تۇلۇق نامايەن بۇلۇپتۇ.ئەمما ،تىلىنىڭ راۋانلىقىغا ئازراق ئىشلىسىڭىز بولغىدەك(بۇ مېنىڭ قارىشىم).يەنە ياخشىللىرى بارمۇ؟ مەنمۇ سىزنىڭ قىزغىن ئۇقۇرمىنىڭىز.

بۇ قىشمۇ يەۋالساڭ ھېيىقماي،
توشامدۇ مەكتەپنىڭ كۆمۈرى؟


توشامدۇ  - يىتەرمۇ  

      بۇ قاغىلارغا ھاشارەتلارنى يوقىتىدىغان دۇرىلارمۇ كار قىلمايدىغان بولۇپ قالدى، مۇھىتنىڭ بۇلغىنىشىغا ئەگىشىپ ئۆزىنىڭ نەپسى بىلەنلا چەكلىنىپ قالماي، تەبىئەتنى قوغدايدىغان ئۇچار جانىۋارلارنىمۇ  يېمەلىكلەر بىلەن بۇلغىدى، شۇڭا پانالىق ئىزدەپ يۈرگەن سانسىزلىغان ئۇچار جانىۋارلار، ئۆزىگە پاكىز مۇھىت ئىزدەپ شەھەردە بەرپا قىلىنغان  باغۋارانلارغا كۆچتى، ئەممە بۇيەردىمۇ ئاشۇ جانىۋارلارغا ئەگىشىپ كەلگەن قاغىلار پەيدا بولۇپ،ساۋاتسىز بولغاندىكىن، مۇھىت ئاسراش، ئۇچارجانىۋارلارنى قوغداش توغرىسىدىكى قانۇن- نىزاملاردىن خەۋەرسىز ،جانبېقىشنىڭ كۇيىدا يۈرگەچكە، باشقا يۇرتلاردىكى ئۇچار-جانىۋارلار قانداق ياشاۋاتىدۇ، بىز قانداق ياشاۋاتىمىز دېگەن خىيال پەقەت كاللىسىغا كەلمىدى، ئەكسىچە،  شەھەردىكى ئۇچار-جانىۋارلارغا قىتىغۇرلۇق قىلىپ پەقەت ئارام بەرمىدى، بۇجىل نادانلىقتا قالغان ئاجىز جانىۋارلار نەگە ئاپتاپ چۈشسە شۇ يەرگە ئۇچۇپ بېرىپ ئاپتاپ سۇنۇشقا ئادەتلىنىپ كەتتى. .. ساتىرادىكى تەسۋىرلەنگەن پېرسوناژ  دەل بۇنىڭ تىپىك مىسالى... ‹‹ئىشلار ئوڭشىلىپ كېتەر ››دەپ سۈكۈتكە كۆنۈپ كەتتۇق، بەلكىم قۇربىمىز يەتمىگەنلىكتىن بولسا كېرەك، ياراتقان ئىگىسى  بىر ئامالنى قىلار، بەندىلەرنىڭ قولىدىن كەلمىگەندىكىن... ئىشىنىمەنكى، بۇ جازانىخور قاغىلار ھامىنى بىر كۈنى قانۇننىڭ جازاسىدىن قېچىپ قۇتۇلالمايدۇ.

بۇ قاغىلارنى سەل ئۇركىتىپ قويمىسا كۆمۇرگە تۇگۇل تۆمۇرنىمۇ يەپ تۇگىتىدىغان ئوخشايدۇ.

   چېرىكلىك ناھايتى ئۇستىلىق بىلەن ئىپادىلىنىپتۇ.

كۈچلۈك سىمۋۇل ئارقىلىق جەمىئيتىمىزدىكى ناچار ئىللەتلەرنى تولىمۇ ئوبرازلىق پاش ئىتىپتۇ ....  قەلىمىڭىزگە ئاپىرىن ئەلتۇغ ئاكا ....................

دەسلەپتە ساتىرانىڭ بېشىنى ئوقۇپلا -تۇۋا ! قاغىمۇ كۆمۈر يەمدىغاندۇ؟ - دەپ ھەيران قاپتىمەن. ئاخىرى چۈشۈنۈپ يېتىپ ئەلتۇغ ئەپەندىگە رەھمەت ئېيىتقۇم كىلىپ قالدى. نۇمۇسنى بىلمەيدىغان قاغىلارغا تاش ئاتىدىغانلار كۆپەيسە بۇلاتتى. بۇ يازمىنى ئاخىرىدا   تاشيولچى تەھرىرلىگەن. ۋاقتى  2012-9-23 20:33  

رەھمەت ئەزىزلەر! بۇ رەزگى قاغىلار بەزىدە گالىستۇك تاقاپ،  يارىشىملىق مەكتەپ فورمىسى كىيىۋېلىپ بەخىرامان ياشاۋېرىدىكەن. مەسىلىنى يۇقىرىغا ئىنكاس قىلسىڭىز خەق:‹‹ بۇ قاغا قانچىلىك يەۋالدى؟›› دېمەكتە يوق، ‹‹پالانچى ئەرز قىلغاچقا بىچارىگە(قاغىنغا)  ئۇۋال بولدى›› دېيىشكە ئادەتلىنىپ كەتتى. شۇڭىمۇ  ساتىرا-مەسەل يازغانلارنىڭ  مۇشۇنداق ئۇسسۇلنى قوللانغانلىقى بىكار ئەمەس.

تىلىنىڭ راۋانلغىدىن ئاجايىپ ھوزۇرلاندىم،رەھمەت سىزگە!

ھەقىقەتەن ياخشى يېزىلغان ساتىرا ئىكەن،ئەجرىڭىزگە تەشەككۈر!