چۈنكى مەن بىر قىز (گۈزەلنۇر ياسىن) [ئۇلانما كۆچۈرۈش]

چۈنكى مەن بىر قىز
بىلەمسەن؟ مەن بىر قىز، جىسمانىيتىم باھاردا بىخ سۈرگەن يۇمران مايسىدەك تۇلىمۇ ئاجىز بىر قىز، بىراق مەن كەلگۈسى ئانىلار كارۋىنىغا قېتىلىپ،ئەجداتنى ئەۋلادقا ئۇلايمەن.بىر ئائىلىنىڭ شەجەرىسىنى قۇرۇپ،بىر پۈتۈن ۋەتەننىڭ ئوبرازىنى سىزىپ چىقىمەن.
قەلبىمدىكى بۈيۈك ئارمانلار چەكسىزلىككە تۇتاشقان.كەلگۈسى بولمىش ئانىلىق خىسلەتلىرىم دۇنيانى مېھرى بىلەن باغاشلىغان.
مىنىڭ ئۆزۈمگە خاس ئەقىدە، ئىخلاسىم،تۇرمۇش مىزانىم بار.مەن ئەلنىڭ قىزىمەن، ئەلنىڭ كۆزى مەندە،شۇڭا مەن« ئەل، ھايا، نۇمۇس»دەپ ياشايمەن.
بىلەمسەن؟،مەن مۇھەببىتىمنى پاش قىلىپ،قوللىرىڭنى تۇتۇپ رەستىلەردە يۈرەلمەيمەن،بىزەڭلەرچە كۆزلىرىڭگە تىكىلىپ قاراپ كۈلەلمەيمەن.چۈنكى ئەجداتلىرىمدىن ئۇدۇم قالغان پاك مۇھەببەتنىڭ ئىپادىللىرى ھەرگىزمۇ مۇنداق ئەمەس.مەن ئەنە شۇ يىگىتلەرنىڭ ئوتلۇق قاراشلىرىغا چوغدەك قىزىرىشنى جاۋاب قىلىپ كەلگەن، نۇزۇگۇم،  ئىپارخان،مايمىخان ،زۆھرە ،سەنەم، شىرىنلەرنىڭ ئەۋلادى مەن. بەلكىم، ئىپپەتنىڭ چۈمبىلىنى قايرىۋېتىپ،نۇمۇسسىزلارچە ئىرىشكەن بۇ خىلدىكى مۇھەببەت ماڭا ئەۋلادلارنىڭ قارغىشىدىن باشقا ھېچ نەرسە ئاتاقىلالماسلىقى مۇمكىن.
بىلەمسەن؟،سەن بىلەن ۋالىس تانسىلارغا چۈشەلمەيمەن. ،چۈنكى مەن مېنى ئوتتۇرسغا ئالغان ئاسمان زىمىندىن ئۇيىلىمەن. بەلكىم سەن بۇ گىپىمنى تۇلىمۇ ئىپتىدائىيلىق دەپ چۈشۈنىشىڭ مۇمكىن.بىراق،مەن ئۈچۈن قىز-ئۇغۇللار ئەدەپ بىلەن ئارىلىق تاشلاپ ئوينايدىغان ئاشۇ لەرزان ئۇيغۇر ئۇسسۇلى بولسىلا كۇپايە.
ساڭا ھەمراھ بۇلۇپ رەڭلىك سورۇنلارغا بارالمايمەن.چۈنكى كەلگۈسى ئانىلىق قىممىتىمنىڭ چەكسىزلىكىدە تۇرۇپ،ئەتىكى بۈيۈك ئوبرازىمغا داغ تەككۈزۈش ھەرگىزمۇ مېنىڭ قىزلىق سالاھىيتىم ئەمەس.چۈنكى مېنىڭ ھەقىقىي قىممىتىم قانداقتۇر سېنىڭ مەسلىك ھەلەڭلەپ تۇرىدىغان،تېتىقسىز يۇمۇرلارنى ئېيتىشىپ ھارمايدىغان غەپلەت سورۇنلىرىڭدا ئەمەس.بەلكى كەلگۈسى ئۈچۈن ئۈنتۈنسىز بىلىم ئىگەللەيدىغان،بىلىم ۋە تەپەككۇرغا سەلتەنەت بېغىشلايدىغان مۇقەددەس سۇبۇستانىيە بۇلۇشۇمدا.
ساڭا ئەگىشىپ نامسىز كوچىلاردا يۈرەلمەيمەن.بىلسەڭ،مەن تۇغۇلغاندا زىمىن يىنىك تىترىگەن ئىمىش.بەلكىم بۇ پايانى ۋە باھاسى يوق پاكلىقىمنىڭ زىمىنغا تۈرەلگەندىكى سۈر-ھەيۋىسىدىن بولسا كىرەك.ئەنە شۇ زىمىننى تىترەتكەن پاكلىقىم مېنى كەلگۈسىگە ئاپىرىدىغان يول خېتى.نامسىز كوچىلاردا ساڭا ئەگىشىپ يۈرۈپ،يول خېتىمنى يۈتتۈرۋەتكىنىم، ئۆزۈمنى يۈتتۈرۋەتكىنىم.ئۆزۈمنى يۈتتۈرۋەتكىنىم،ئۈلۈمگە يۈزلەنگىنىم.
بىلەمسەن!، مەن پۇلغا قىزىقمايمەن.چۈنكى قىزلىق ئىپپىتىم ئالدىدا پۇل ئاددىي قەغەزلا خالاس.شۇڭا ماڭا مال-دۇنيارىڭنى پاش قىلما،تاۋارلاشقان مۇھەببەتكە كۆنۈپ،يانچۇقلىرىڭغا كۆزلىرىمنى تىكەلمەيمەن.نۇزۇگۇم ئەينى چاغدا ئىپپەت ئۈچۈن باياشات تۇرمۇشتىن كېچىپ،قاراڭغۇ قۇمۇشلۇقلارنى ماكان قىلغان، مەن ئەنە شۇ نۇزۇگۇمنىڭ ئەۋلادى.ئۇنىڭ بۈيۈك روھى مەن سەۋەبلىك قۇرۇنمىسۇن! مەغرۇر قەددى مەن سەۋەبلىك ئېگىلمىسۇن،تالاي جەسۇر قىزلىرىمىز تىكلىگەن بۈيۈك ئوبراز مەن سەۋەبلىك ئۆلمىسۇن.
بىلەمسەن! مەن سىڭلىڭغا ئوخشايمەن.شۇڭا مېنى قەدىرلە! مەن ۋە ماڭا ئوخشاش تالاي قىزلارنىڭ پاكلىقى،ئىپپىتى،سەن ۋە ساڭا ئوخشاش تالاي ئوغۇللارنىڭ غورۇرىغا غۇرۇر قوشسۇن.پاكلىقىمىز تىللاردا داستان بۇلۇپ ئەۋلادلىرىمىز ئەبەدىي پەخىرلەنسۇن
بىلەمسەن! مەن ئاناڭغا ئوخشايمەن. شۇڭا مېنى ھۆرمەتلە!چۈنكى مەن كەلگۈسى ئانىلىق كارۋانلىرىغا قېتىلىپ ،سەن ۋە ساڭا ئوخشاش تالاي باتۇر ئوغلانلارنى تەربىيلەيمەن.
شۇ ئېسىڭدە بولسۇنكى،يەنە بىر ئۇغۇزنى،يەنە بىر مەھمۇدنى،يەنە بىر يۈسۈپنى ئەنە شۇ سەن قەدىرلىگەن،ھۆرمەتلىگەن قىزلارلا يېتىشتۈرەلەيدۇ.چۈنكى مىللەتنىڭ كەلگۈسى، مىللەت كەلگۈسىنىڭ بولمىش ئانىللىرى بولغان قىزلارنىڭ قۇلىدا.

''مەن'' ھەقىقى ئۇيغۇر قىزىغا خاس سۆز  قىلىپتۇ، ''مەن''گە ئوخشاش قىزلىرىمىز ياشىسۇن،ئۇلارغا كۆز تەگمىسۇن.بۇ ئەسەرنى كۆرگەن يىگىتلىرىمىزنىڭمۇ ئۆزى ھەققىدە ئويلىنىپ بېقىشىنى تەۋسىيە قىلىمەن.ئەسەردىكى "مەن"_ئۇيغۇر قىزى ھەقىقى سۆزلەپتۇ،ئاپتۇرنىڭ دىتىغا ئاپىرىن، قەلىمىنىڭ تېخىمۇ بەرىكەتلىك بۇلىشىغا تىلەكداشمەن. بۇ يازمىنى ئاخىرىدا   ئەلرام تەھرىرلىگەن. ۋاقتى  2012-9-22 16:23  

     مەزمۇنى ياخشىكەن.

ئۇ بىر ھۆرمەت ئىگىسى، ئۇ بىز قەدىرلەشكە تىگىشلىك  ئىنسان...
ھەر بىر چاقچاقچى ئەركەك ھەر قىسما بىزەڭ سۆزلەر بىلەان چاقچاق- يۇمۇرلارنى، ئەپسانىلەرنى توقۇۋاتقىنىدا، ئانىسىنى، ھەمشىرەلىرىنى، قىزىنى ئويلىماي تۇرۇپ دەمدىغاندۇ دەپ قالىمەن...

بۇ ئەسەر ناھايتى ياخشى چىقىپتۇ .

ھەر بىر قىزنىڭ ئۇقىشىغا تىگىشلىك تېما بوپتۇ . ئاپىرىن ھەدە.

بۇ ناھايىتى كۇچلۇك يېتەكلەش تۈسىنى ئالغان تېمىكەن، ‹‹مەن›› ناھايىتى پاساھەتلىك ئىبارىلەر بىلەن ئۇيغۇر قىزلىرىدا ھەقىقى بولۇشقا تېگىشلىك سۈپەتلەرنى تولۇق مۇئەييەنلەشتۈرۈپتۇ، قەلەم ئىگىسىگە كۆپ رەخمەت!
ئەمما، جەمئىيىتىمىزدە قىزلىق ئىپپىتىنى ئاللىبۇرۇن يوقاتقان ساناقسىز ‹‹قىز››لىرىمىز  بۇ تېمىنى كۆرەرمۇ ........ ؟
ئۇلارنىڭ ئەس-يادى پۇل ۋە كۆڭۈلنىڭ ئىسكەنجىسىدە (شەيتاننىڭ ئالقىنىدا)تۇرسا............
ئۇلارنىڭ ئاتا-ئانىلىرى بولسڭمۇ كۆرسە بەلكىم پايدىسى بولار............
بۇ يازمىنى ئاخىرىدا   مۇزاتى تەھرىرلىگەن. ۋاقتى  2012-9-22 20:09  

ئەسىرىڭىزنى ئوقۇپ  بەك سۆيۈندۈم. قۇلىڭىزغا دەرد بەرمىسۇن.

ئەسىرىڭىزنى ئوقۇپ تاھىر تالىپنىڭ « چۈنكى مەن ئادەم » دېگەن شېئىرىنى ئەسلەپ قالدىم . ئەجرىڭىزگە رەھمەت .

ئىجادىيىتىڭىز بەرىكەتلىك بولسۇن! نەتىنجە تىرىشقانلارغا مەنسۇپ

  يېقىندىن بۇيان گۈزەلنۇر نىڭ شېئىر ۋە نەسىرلىرىنى كۆرۈپ، ئۇيغۇر ئەدەبىياتى گۈلزارلىقىدا يېڭىدىن ئېچىلغان بىر گۈلنى، ئۇنىڭ غۇبارسىز بەرگىدە گۈزەل بىر نۇرنىڭ جىلۋە قىلىۋاتقانلىقىنى كۆرگەندەك بولدۇم.مەن مۇشۇنداق ئوقۇغۇچىلىرىمدىن پەخىرلىنىمەن.

     قىزلارنى ياراملىق قىلىپ تەربىيەلىگەنلىك، مىللەتنى تەربىيەلىگەنلىك. قىزلارنى، جۈملىدىن ،ئاياللارنى ھۆرمەتلەش ئىنسانىي خىسلەت، بىر قىسىم كىشىلەردىكى ئاياللارنى كەمسىتىشتەك ناچار ئىللەت قامچىلىنىپتۇ، قەلىمىڭىز بەرىكەتلىك بولغاي!

جەميىتىمىزدە سىزدەك قىزلار كۆپ بولغان بولسا مىللىتىمىزنىڭ كەلگۈسىدىن غەم يەپ ئولتۇرۇشنىڭ پە قەتلا ھاجىتى يوق ئىدى.لىكىن يەنىلا ئەپسۇسلىنىمەن .......

بۇ بىز  ياش ئوغۇل- قىزلارغا بىر يىتەكلەش رولىنى ئوينايدىغان ياخشى تىما بوپتۇ، قەلىمىڭىز بەرىكەتلىك بولغاي