خوتەن _ ئادىلجان ئابدۇرېھىم [ئۇلانما كۆچۈرۈش]

خوتەن

ئادىلجان ئابدۇرېھىم

خوتەن ،

سەن قەلبىمنىڭ كۆك ئاسمىنىدا ،

نۇر چاقنىتىپ تۇرغان بىر قۇياش .

ئېمىتىسەن مېھرىڭدىن ئوغۇز ،

باغرىڭ ئىللىق ئانامغا ئوخشاش .

چەكسىز كەتكەن ھەر بىر ئېقىنىڭ ،

تومۇرۇمغا تۇتاشتۇر - تۇتاش .

خوتەن ،

سەن روھىمنىڭ چاڭقاشلىرىغا ،

ئېقىپ كىرگەن پايانسىز ئوكيان .

قۇچاق ئىچىپ پەرۋازىمغا ھەم ،

جۇلالانغان نۇرانە ئاسمان .

چۈشلىرىمدە ئوقۇيمەن سېنى ،

ھەر بىر قىسسەڭ تۈگىمەس داستان .

خوتەن ،

سەن تارىخنىڭ ئاپئاق بېتىدە ،

چىن سۆيگۈدىن تۇغۇلغان ئەسەر .

ئاي،يۇلتۇزنى قىلىدۇ مەستخۇش ،

ھەر كېچەڭدە مىڭلىغان سەھەر .

تەلپۈنىدۇ يۈرىكىم ساڭا ،

تاش،تۇپرىقىڭ گۆھەردۇر-گۆھەر .

خوتەن ،

كۆزۈڭدىكى تەكلىماكاندا ،

يۇلغۇن بولۇپ كۆكلىدى ئىمان .

گىلەم كەبى توقۇلسام ساڭا ،

ئاتەش بولار تېنىقىم ھامان .

يۇرۇڭقاشتىن كىلىدۇ ئېقىپ ،

قاشتېشىدەك سۈزۈك ھاياجان .

خوتەن ،

سەن قەلبىمگە ھارارەت چېچىپ ،

تۇيغۇمدىكى كۆكلىگەن باھار .

ئارمانلىرىم چېچەكلەپ سەندە ،

پۇراق چېچىپ گۈلدەك ئېچىلار .

توغراق روھى ئوتتەك يېلىنجاپ ،

ۋۇجۇدۇمدا كۈي بولۇپ ئاقار ...

2012-يىلى 18-سېنتەبىر . غۇلجا_بايكۆل

بۇ يازمىنى ئاخىرىدا   ئا.ئابدۇرېھىم تەھرىرلىگەن. ۋاقتى  2012-11-5 19:51  

ھەر بىر مىسرالىرىڭىزدىن ،يۇرۇتقا بولغان قايناق ھىسيات ئۇرغۇپ تۇرۇپتۇ ،شىېرى مۇھىتمۇ شۇ قەدەر يارقىن ئەكىس ئىتىپتۇ قەلىمىڭزدىن بىر يىڭى ئۈمۈتنى كۆرگەندەك بولدۇم ھارمىغايسىز ...

خوتەن ،

كۆزۈڭدىكى تەكلىماكاندا ،

يۇلغۇن بولۇپ كۆكلىدى ئىمان .

گىلەم كەبى توقۇلسام ساڭا ،

ئاتەش بولار تېنىقىم ھامان .

يۇرۇڭقاشتىن كىلىدۇ ئېقىپ ،

قاشتېشىدەك سۈزۈك ھاياجان .
      

        بۇ  كۇبلىت  بەك يارىدى ماڭا.قەلەم قۇۋۋىتىڭلا  خىلى ئۆتكۈركەن.

خوتەن ھەققىدىكى گۈزەل تۇيغۇلىرىڭىزغا مۇبارەك، خوتەننى ياخشى شەرھىلەپسىز، جىڭ خوتەننىڭ ئەركەك سۈيىنى ئىچىپ چوڭ بولغان بالىلاردە، ھى.....ھى....

ۋەتەن ھەققىدە يېزىلغان ياخشى بىر شېئىر بۇلۇپتۇ. ئىچكى ھىسيات شېئىرغا سىڭىپ كەتكەچكە مەزمۇندىكى چۇڭقۇرلۇق ئادەمنى شەھىدانە خۇتەنگە تەلپۈندىرىدىكەن.رىتىم ۋە قاپىيەگىمۇ كۆپ ئەجىر سىڭدۈرۈپسىز،داۋاملىق تىرشىڭ.

غورۇر، ۋىجداننى مەڭگۈ يار قىلغان،
بىز خوتەننىڭ ئوغۇل -قىزلىرى.
نەگە بارسۇن، قەيەردە يۈرسۇن،
ئۇنتۇمايدۇ كىندىك قېنى تۆكۈلگەن،
ئانا يۇرتىنى،
خوتەن باللىرى....

              ئانا  ۋەتىنىمىزدىكى يۇرتلار بىر-بىرىدىن قىلىشمايدىغان گۈزەل يۇرتلاردۇر ،خۇتەن ئەنە شۇلارنىڭ ئىچىدىكى بىرسى.

                  قەلىمىڭىزگە نۇسرەت تىلەيمەن .

خۇتەن ھەققىدىكى ئېلھاملىرىڭىزدىن زوقلاندىم.ئىجادىيىتىڭىز بەرىكەتلىك بولسۇن!
بۇ يازمىنى ئاخىرىدا   دىلداش تەھرىرلىگەن. ۋاقتى  2012-9-23 02:42  

خوتەن
                                  (مۇخەممەس)
كۈللى ئالەم گۈلشىنىنىڭ جەننىتى،گۈلزار خوتەن،
ئەھلى ئىشقى مۇرادىنىڭ مەنزىلى،دىلدار خوتەن،
بىر ئۈزۈلمەس كۈي مىسالى مۇڭ غەزەل-ئەشئارخوتەن،
يازۇ-قىش ئوخشاشلا سۇلماس،پەسلى نەۋ-باھار خوتەن.
كەڭ جاھاندا بىرلا بار مېھرى ۋاپالىق يار خوتەن.

كۆر ئەنە مەغرۇرغىنا،ئۆزگە سىياقتا بىر كىشى،
رىشتى ئەلگە چىڭ چېتىلغان ئەلنىڭ ئوغلى- دىلكىشى،
سۆيۈنگەن ئۇندىن ئاۋام،ياققاچقا ھەر بىر دىت-ئىشى،
بولغاچ ئۇ ھەمدەم ھاياتقا ئاقمىغان ئەلنىڭ يېشى،
شۇ سەۋەپ خاردۇر ھامان بەدنىيەت ئەغيار خوتەن.

قاشتېشى جاھاندا بىر،قىلغان تۈمەننى مۇپتىلا،
ئەتلىسى نى-نى گۈزەللەرگە سالار داغى-بالا،
چاقنىتار كۆزنى مىسال چولپان كەبى مەشۇت-تالا،
«بىر گۈزەل جەننەت مىسالى،ئۇ ئەمەس تاقىر دالا»
بۇ دېمەك ھەقتۇر بىراۋلار،قىلمىغاي ئىنكار خوتەن.

ياڭىقى تىلغا ھوزۇر،تەنگە داۋا خىسلەت تولا،
ئەنجۈرى تىلنى يارادۇر،كەۋسىرى شەربەت تولا،
ئوخشىغاي شۇنچە تولۇق،تۆككەچكە تەر-مېھنەت تولا،
بۇ زېمىن مەردلىك بىلەن بېرەر شېرىن نىممەت تولا،
ئەلمىساقتىن بۇ بەدەللەر كەتمىگەن بىكار خوتەن.

قەغىزى مەشھۇر ئاڭا،كىملەر رىۋايەت پۈتمىگەن،
مەنزىلىگە ئىنتىلىپ كىملەر مۇلاقات كۈتمىگەن،
قانچە شائىرۇ-غەزەلخان ئۇنى كۈيلەپ ئۆتمىگەن؟
تا بۈگۈنگە كەلگۈچە ئۇ ئىنتىلىشلەر يۈتمىگەن،
يەنە كەتمەس ئىشتىياق قاينام كەبى قاينار خوتەن.

بار ئەنە ئۇندا مۇقام،سەنئەتخۇمارنىڭ بارچىسى،
«بىرنى بىر»لا دەيدىغان ئەھلى ئادالەت جارچىسى،
(قەلبى ساپ پاكىز-تازا،ھەربىر بۇلۇڭى-پارچىسى)
شۇ سەۋەب ياشنار ھايا،ئىنساپ،دىيانەت ئارچىسى،
قەلبىگە چاڭ قونمىغان قىزلاردەك بىغۇبار خوتەن.

بىر تالاي ئالىم-ئەدىپ يايغان ئۇنىڭ نامىنى كەڭ،
كەشپىيات،ئەمگەكۇ-مېھنەتلىرى ھەرخىل رەڭمۇ-رەڭ،
(سىز ئۇنى ئاددىيغىنا ئەمگەك ۋە يا خىزمەت دېمەڭ)
ئۇ بېھىش دۇنياسىغا نەپىس چېكىلگەن خالۇ-مەڭ،
بارچە خىسلەتلەر مۇجەسسەم بىر گۈزەل چاھار خوتەن.

كۆر ئەنە پەرھاد سىياق،مەرتلەر ماكانى ئۇشبۇ جاي،
جەننەتول-مەئۋادىكى ھۈرلەر جانانى ئۇشبۇ جاي،
دۇر-گۆھەر،ئىپارۇ-ئەنبەر،مېھرى كانى ئۇشبۇ جاي،
كىملا كەلسە خۇش بولار كۆڭلى ۋە جانى،ئۇشبۇ جاي،
مىڭ گۈزەللەر بۇندا جەم،قىلغاي جاھان شىكار خوتەن.

بار بۈگۈن بەردەم ئوغۇل ماختار ئۇنى كۈيلەپ ئۇدا،
بىر ئەمەس بەلكى تۈمەنمىڭ تىلدا ياڭرار بۇ سادا،
بۇ ساداكى«ئەي خوتەن،كەرگىن غۇلاچىڭ سال ساما،
بولمىساڭ توي بەلكى ماتەم،چال مۇقام،كۈي،ساز ناۋا»
بارچە سەنئەت ئەھلىگە باشچى خوتەن،سەردار خوتەن.

كۈي مۇقامى لەززىتى چېكەر يۈرەكنىڭ تارىنى،
ئول مۇقامخۇمار خەلق ئۇندىن بىلەر ھېس-ئارىنى،
ئۇ ئاتا قىلغان مۇھەببەتتە باغاشلار يارىنى،
ئۇ كەبى راستچىل ئۇلار،دېمەيدۇ ئاق دەپ قارىنى،
بارچىگە ھەقدا ھەقىقەت پەرۋىشى،جاكار خوتەن.

بىر-بىرىگە ئوخشىمايدۇ بارچە گۈلنىڭ پۇرىقى،
چانغۇسى قۇياش نۇرىدا ئاجىز چىراق يۇرىقى،
(تەسۋىرىنى كەم دېسەم تەييار زاماننىڭ سورىقى)
بىخلىغاچ مەندە خوتەنلىكنىڭ ساداقەت ئۇرىقى،
ھەقنى ھەق كۈيلەپ دېدىل قىلدىم سۆزۈم ئىزھار خوتەن.

تۈگىمەس قانچە تەرىپلەپ ماختىساق ئېيتىپ غەزەل،
چۈنكى ئۇ بىر قەددى رەنا،تەڭدىشى يوق بىر گۈزەل،
سىڭدى تەشنا ئويلىرىمغا نامۇ-ئىسمى لىق تۈگەل،
بارى-باردۇر راست سۆزۈم،بەرمىدىم پەردازدا ھەل،
چىن گۈزەللىك بارچە ئۇندا بىر گۈزەل نىگار خوتەن.

                                              ئابلەت ئابدۇللا (بوستان)

  شېئىرىڭىز بەك ياخشى چىقىپتىكەن ،يانداپ قويدۇم.

بىر بىرىدىن ئىسىل يىزىلغان شىېرلاركەن ...

قاراتەنلىك، سىرىق تەنىلك، ئاق تەنلىك، قوڭۇر،يىشىل تەنلىكتىن باشقا يەنە بىز خوتەنلىك مۇ بار جۇمۇ...! قەلىمىڭ كۈنسىرى بەرىكەت تاپقاي ، قىرىندىشىم...!

شېئرىڭىزغا كۆپ ئەجىر سېڭدۈرۈپسىز ..خوتەننى بەكمۇ ئوبرازلىق تەسۋىرلەپسىز ...خوتەن دەرۋەقە شۇنداق  تەرىپلەشلەرگە ئەرزىگۈدەك يۇرت . شېئرىڭىزدىن تولىمۇ سۆيۈندۈم .
شېئرىمنى ياقتۇرغىنىڭىزغا كۆپ رەھمەت دوستۇم.  بۇنىڭدىن كېيىنكى ئىجدىيەتلىرىڭىزگە سۈزۈك ئاسمان ، نۇرانە پەللە تىلەيمەن !!!

ئەرتۈرك،ئابلەت ئوسمانلارنىڭ ئەجرىگە كۆپ تەشەككۈر! ئانا يۇرت سۆيگۈسىنى ھەقىقەتەن ياخشى ئىپادىلىنىپتۇ.

رەھمەت.شۇقۇتلۇق تېلەكلەر ھەممىمىزگە بولسۇن.