تىل دەرىخىم سۇنماقتىدۇر قاراسلاپ [ئۇلانما كۆچۈرۈش]

تىل دەرىخىم سۇنماقتىدۇر قاراسلاپ

تۇرغۇن پەيزۇللا يۇلغۇن

بىر ئاۋاز

بىر ئاۋاز قىيادىن ئاتتى ئۆزىنى،
قانىدى ئۇرۇلۇپ تاشلاردىن تاشقا.
  سۈكۈتى يېرىلدى جىرالارنىڭكى،
سوقۇلۇپ بىر ئاۋاز تاغلاردىن تاغقا.

ياشلىرى تۈگمەننى چۆرگىلىتىدۇ،
ئوت كۆيەر سېغىنىش باياۋىنىدا.
بىر ئاۋاز لەپپىدە ئۆرلىدى كۆككە،
بىر ئاۋاز تىك تۇردى تىك چوقىلاردا.

بىر ئاۋاز شامالدەك كەلدى لەپىلدەپ،
ھەسرەتلەر قالدۇرۇپ كەتتى بىر ئاۋاز.
شاماللار يېشىلدۇر سۆزلەرگە ئوخشاش،
ئىسەدەپ، بۇقۇلداپ يىغلىماقتا ياز.

كۈنلىرىم ئۆتمەكتە ئوتلۇق ئارماندا

شاماللار باغرىدا ئىسقىرتار گۈلخان،
يۈرەكنى قاماللاپ كۆيدۈرۈپ ئۈتۈپ.
بوغۇلدۇم قاتمۇ-قات دەردكە ، ئەلەمگە،
مەڭگۈلۈك ئارمانلار ئىچىگە چۆكۈپ.

ئۆزۈمنىڭ يۇرتىدا بولدۇم مۇساپىر،
يوقسۇللۇق تاش بولۇپ سوقۇلار ماڭا.
مۇدىھىش جۇدالىق قەلبىمنى غاجاپ،
باغرىمغا ئۇرىلار ئايلىنىپ تاشقا.

ياشايمەن ئىگەمگە قىلىپ تەۋەككۈل،
ئاھ ، كىملەر دۈشمىنىم، كىملەر دوست ماڭا؟
بىر يۈرەك مىڭ پارە بولۇپ ھەر تىنىق،
كۈنلىرىم ئۆتمەكتە ئوتلۇق ئارماندا.


تىل دەرىخىم سۇنماقتىدۇر قاراسلاپ

ئارمانلىرىم يىغلىماقتا بۇقۇلداپ،
تىل دەرىخىم سۇنماقتىدۇر قاراسلاپ.
غەم تاغلىرى چىقىۋالغان بېشىمدىن،
رەخمىتىنى ئايىماقتا نۇر، ئاپتاپ.

نىدا قىلدىم رەقىپ قازغان ئۆرەكتە،
زىخ تىققاندەك ئاغرىپ تۇرار يۈرىكىم.
ئارمان قىلىپ يىتەلمىگەن تىلەكتە،
زاغرا ناندەك يېرىلماقتا جىگىرىم.

تىل دەرىخىم تالاي قېتىم چاتىلىپ،
زېدە بولدى ، يارا بولدى ، ۋاي كەمتۈك...!
غېرىپ دىلغا چەكسىز ئەلەم چىڭقىلىپ،
ھوۋلىماقتا ئورمىنىمدا سوغ ، ئۈششۈك.

دەردلىك سېغىنىش

پىچاق تۇتسا تىترەيدۇ دىر-دىر،
قىلىچىدىن ئايرىلغان قوللار.
بەندىلەردىن رەنجىمە ئىگەم،
ناپاكلىقتىن ئىگىز-پەس يوللار.
***
ئەسلىتىدۇ سادىرنى تاغلار،
ئەركەكلەرگە غورۇر بىرىدۇ.
نۇزۇگۈمنىڭ ھۆرلۈك چۇقانى،
دەشتىلەردە يىغلاپ يۈرىدۇ.

سەلتەنىتى سۇنغان چوقىلار،
ھەسرەت بىلەن قويار سىلكىنىپ.
كەتمەن تۇتقان قوللاردا قاداق،
ئاھ تاپانلار كەتكەن يېرىلىپ.
مەڭگۈلۈك دەرد  ئۆرۈلگەن سېپىل،
سۇنغان قىلىچ ، داتلاشقان خەنجەر.
يىپەك يولى، مىڭ ئۆي ،تاش پۈتۈك
يىراق ئۆتمۈشتىن بىرىدۇ خەۋەر...
تۇلۇق تۇتقۇن دەردلەرگە يۈرەك،
تولغىنىدۇ مۇڭ ، نىدالاردا.
قورام تاشلار سۆزلەيدۇ قىسسە،
ئەكس سادا تاغ ، جىرالاردا .
« ئۆچۈڭنى ئال ياۋدىن ، زۇلمەتتىن،
ساتقىنلاردىن، كۈرەلمەسلەردىن.
ھەزەر ئەيلە تىل ، دىلى باشقا،
كۆڭلى قارا، تېگى پەسلەردىن. »
كېلەر شۇنداق يالقۇنلۇق سادا،
ئىچ-ئىچىمدە ئۇزۇن بىر نالە.
كۈلكىلەرمۇ  ئوخشار يىغىغا،
قانلار بىلەن يۇيۇلغان چۆلدە.

***
دەردلىرىمنى يىغلايدۇ قىزغىن،
بېشىمدىكى ھۆرلۈك چەمبىرى.
ھالىم قايان ، مەنزىلىم قايان؟
ئۈنلەر مەندە دەردنىڭ دەمدىرى.


بۇ يازمىنى ئاخىرىدا   يۇلغۇن تەھرىرلىگەن. ۋاقتى  2012-9-21 09:49  

نېمانچە ئېسىل مىسرالار بۇ ؟! ئەتتىگەندىلا بۇنچە ئېسىل شىئېردىن بەھىرلەنگىنىمدىن خۇش بولدۇم.يۇلغۇن ئەپەندىمگە سالاملار بولسۇن !

گۈزەل تىل، لىرىك ھېسيات، چوڭقۇر مەنالارغا تويۇنغان لىرىكىلىرىڭىز داۋام ئەتسۇن ئاكا!

      پىنھان تۇيغۇلارنىڭ ئويناق بالاغىتىگە قۇت بولسۇن، قېرىندىشىم!

تىلى يىقىشلىق لىرىكىلىرىڭىز ئۈزۈلمىگەي!

شېرلىرىڭىزنىڭ تېرەن قاينىمىغا شۇڭغۇپ تۇرۇپ ئوقۇپ باختىم . ھەقىقەتەن مەنىدار ۋە بەددى قىمىتى بار يازمىلاركەن .
ياخشى تىلىكىم مەدەت بولغاي ئۇكام!!

شىئېرىڭىزدىن سۆيۈندىم،بارىكاللا رەھمەت سىزگە،

ھەقىقەتەن ئېسىل شېئىرلاركەن.ھارمىغايسىز!...

تېرەن پىكىرلىك مسىرالار قەلبىمنى لەرزىگە سالدى،مەنا سەپىرىڭىزگە زور ئۇتۇقلارنى تىلەيمەن.

يۈرەكلەرنى لەرزىگە سالغان شېئىرلاردىن ۋۇجۇدۇم تىترىدى.

« ئۆچۈڭنى ئال ياۋدىن ، زۇلمەتتىن،
ساتقىنلاردىن، كۈرەلمەسلەردىن.
ھەزەر ئەيلە تىل ، دىلى باشقا،
كۆڭلى قارا، تېگى پەسلەردىن. »

مۇنۇ مىسرالار تارىخىمىزدىكى ساتقۇنلارغا ئېتىلغان ئوق! قولىڭىزغا دەرت كەلمىسۇن قېرىندىشىم!!!!!

يۇقارقى شېئىرىڭىزدا مېنى ئەپسۇسلاندۇرغان بىرمۇ مىسرا يوق، ھوزۇرلىنىپ ئوقۇدۇم، مۇشۇنداق تىرەن پىكىرلىك شېئىرلىىڭىزغا تەشنامەن. بۇ يازمىنى ئاخىرىدا   زوقلان تەھرىرلىگەن. ۋاقتى  2012-9-22 20:24  

نادىر كۈيلىرىڭىز ئۈزۈلمىسۇن..........

ۋاي بۇرادەر قەلىمىڭزنى خېلى بىلەپسىز جۇمۇ!

يۇلغۇن ئەپەندى  ئىپادىلەش جەھەتتە  بىر  ئۇسلۇپقا كىرىۋالغاندەك قىلىدۇ، بەزى ماۋزۇ، شېئىرلىرىنى كۆرۈپ يۇلغۇن ئەپەندىنىڭ شېئىرىمۇ  نىمە ؟ دەپ  قىياس قىلىدىغان بولدۇم.