«ئالىمجان ئىسمائىل ئەسەرلىرى ئىلمىي مۇھاكىمە يىغىنى» ئېچىلدى [ئۇلانما كۆچۈرۈش]

شىنجاڭ يازغۇچىلار جەمىئىيىتىنىڭ تەشكىللىشى ۋە شىنجاڭ ياشلار _ ئۆسمۈرلەر نەشرياتىنىڭ يېقىندىن ھەمكارلىشىشى بىلەن چاقىرىلغان "ئالىمجان ئىسمائىل ئەسەرلىرى ئىلمىي مۇھاكىمە يىغىنى'' 2011-يىلى 11-ئاينىڭ 3-كۈنى چۈشتىن ئاۋال "شىنجاڭ ئاخبارات سارىيى'' يىغىن مەركىزىدە ئۆتكۈزۈلدى.

      يىغىنغا ئاپتونوم رايۇنلۇق ئەدەبىيات _ سەنئەتچىلەر بىرلەشمىسىنىڭ رەئىسى، يازغۇچىلار جەمئىيىتىنىڭ رەئىسى ئازات سۇلتان رىياسەتچىلىك قىلدى ۋە مەملىكەتلىك خەلق قۇرۇلتىيى دائىمىي كومىتىتىنىڭ مۇئاۋىن ۋېييۈەنجاڭى ئىسمايىل تىلىۋالدى ۋە مۇناسىۋەتلىك ئورۇن ھەم شەخسىلەر ئەۋەتكەن تەبرىك خەت _ تېلىگىراممىلارنى ئېلان قىلدى.شىنجاڭ يازغۇچىلار جەمئىيىتىنىڭ پەخرى رەئىسى مەمتىمىن ھوشۇر يازغۇچىنىڭ ھاياتى ۋە ئىجادىيەت ئەھۋالىنى تونۇشتۇردى. شىنجاڭ ياشلار _ ئۆسمۈرلەر نەشرياتىنىڭ باش مۇھەررىرى ئابلىز قېيۇم  ئالىمجان ئىسمائىل ئەسەرلىرىنىڭ يېڭىدىن نەشر قىلىنغان 10 توملۇق تولۇق توپلىمىنىڭ نەشر قىلىنىش ئەھۋالىنى تونۇشتۇرۇپ ئۆتتى ۋە شىنجاڭ پىداگوگىكا ئۇنۋېرسىتىتى ئەدەبىيات سارىيى، شىنجاڭ يازغۇچىلار جەمئىيىتى ئىجادىيەت، ماتىريال مەركىزى، شىنجاڭ ئۇنۋېرسىتىتى كۇتۇپخانىسى، ئاپتونۇم رايۇنلۇق كۇتۇپخانا، شىنجاڭ ئىجدىمائىي پەنلەر ئاكادىمىيەسى ئەدەبىيات تەتقىقات ئورنى قاتارلىق ئورۇنلارغا كىتاپ تەقدىم قىلدى. ئاندىن ئىلمىي مۇھاكىمە باشلىنىپ، مۇھەممەت پولات، ئابدۇرۇسۇل ئۆمەر،ماخمۇت مۇھەممەت، ئابدۇبەسىر شۈكۈرى قاتارلىقلار يىغىنغا تەييارلىغان ئىلمىي ماقالىلىرىنى ئوقۇپ ئۆتتى. ئاخىرىدا ئالىمجان ئىسمائىل سۆزگە چىقىپ يىغىننى تەشكىللىگەن ئورۇنلار ۋە يىغىن قاتناشچىلىرىغا رەھمىتىنى بىلدۈردى.

       چۈشتىن كېيىن شىنجاڭ ياشلار _ ئۆسمۈرلەر نەشرياتىنىڭ ساھىپخانلىقىدا ئەدىبنىڭ 10 توملۇق تولۇق توپلىمىنىڭ نەشردىن چىققانلىقى ۋە  70 ياشقا كىرگەنلىكىنى تەبرىكلەش پائالىيىتى ئۆتكۈزۈلدى. ئەدىبكە تون كەيدۈرۈلدى، ھەرقايسى ئورۇنلار ۋە ئۇرۇق _ تۇققان، دوستلىرىنىڭ كۆڭۈللىرى ئىزھار قىلىندى.

بەك ياخشى پائالىيەت بوپتۇ.