تۇداخۇنغا مەرسىيە(ئاۋازلىق) [ئۇلانما كۆچۈرۈش]

.
ئەدىھەم ئىبراھىم
ئوغۇل بالا ئىدىڭ ھەقىقى،
يەنە پۈتۈنسۈرۈك چاقچاقچى.
تىلىڭ بىلەن جاھان سوراتتىڭ،
ئىدىڭ نوچى،ئەمەستىڭ پوچى.

بۈك-باراقسان ئورمانلىرىڭدا،
چاقچاقلىرىڭ قالدى مۇڭلىنىپ.
قاتناپ تۇرغان ئاپتۇبۇسلىرىڭ،
سەن يوق مانا قالدى خۇيلىنىپ.

بۇ ھاياتتا كۈلەلمىگەنلەر،
كۈلەتتىغۇ سېنىڭ بارىڭدا.
سەن بېرەتتىڭ تاشقىمۇ مېھىر،
سۇنمايتتى نۇر ھايات پارىڭدا.

يېنىپ تۇرساڭ كۆكتە نۇرلىنىپ،
كىممۇ سېنى ساقىيدۇ دىگەن.
كەتتىڭ بىزنى ھەسرەتتە قويۇپ،
بۇ ئۈلۈمنىڭ كۆزى يوق ئىكەن.
2012-يىل30-ئېيۇل

بۇ يازمىنى ئاخىرىدا   خالمۇرات1 تەھرىرلىگەن. ۋاقتى  2012-7-31 08:59  

ھەر جانغا ئۈلۈم بار ، ھەر جانغا سىناق



( خەلق قىززىقچىسى تۇداخۇنغا مەرسىيە )



ھەر جانغا ئۈلۈم بار ، ھەر جانغا سىناق،

ۋاقتلىق كەلگەننىڭ ھېكمىتى باردۇر .

شەيئىلەر ئارتۇق كەم يارالغان ئەمەس

بىز قىلغان ئەمەلنىڭ قىممىتى باردۇر .


1

تۇنۈگۈنلا بار ئىدىڭ بانكا ئالدىدا ،

ئۈچ چاقلىق رىكشاڭنڭ ئۈستىدە  كۈلۈپ .

قۇلاقلار بەزىدە پاڭ بولسۇن دەيمەن ،

ھەمىمىز مۇشۇنداق كېتەمدۇق ئۈلۈپ؟


دۇئاغا كۆتۈردۈم قولومنى ئاستا ،

ئاللاھدىن تىلىدىم چىن ئىمانىڭنى .

كۆز يۇمدۇڭ ئاددىيلا ئەي ئۇلۇغ ئىنسان ،

مىڭلاپ قول كۆتۈرسۈن بۇ جىنازاڭنى .


شۇنچىلىك رەھىمسىز تەقدىر قىسمىتى،

ئايرىماس چوڭ - كىچىك ئەجەل قامچىسى .

تۆنۈگۈن كۆرۈشكەن دوست - يارەنلەردىن ،

كېتىدۇ خوش دىمەي يەنە قانچىسى ؟


بار ئىدى تۇداخۇن ئىشلىرىڭ سېنىڭ ،

ئۈچ چاقلىق ھارۋاڭدا بىجىرىدىغان .

بار ئىدى ھويلاڭدا پەمىدۇر - لازىلار ،

ھېيتلاردا ھۆپپىدە قىزىرىدىغان .



ناتىۋان قىزلىرىڭ كۆز يېشى تۆكسە ،

تاغدىكى بۇلاقلار شىلدىرلىمىدى .

ھازىدار بولغاندەك تۇتۇلۇپ ھاۋا ،

كېچىسى يۇلتۇزلار جىمىرلىمىدى.



كىم دەيدۇ پەقەتلا سېنى چاقچاقچى ،

سېخيلىق تونىنى كىيىپ تۇراتتىڭ .

مىللەتنىڭ روھىدىكى ئىللەتنى سۆكۈپ،

يولدىكى تاشلارنى تېرىپ تۇراتتىڭ .


بويۇڭنى قىسقا دەپ ئويلاپ قاپتىمىز ،

ۋاقتىڭمۇ قىسقىكەن نەدىن بىلەيلى ؟

قولۇڭدىن بىر تۇتۇپ خوش دىيەلمىدۇق

ۋا دەرخ، بۇ ئىشنى كىمدىن كۆرەيلى ؟


ئاللاھنىڭ  رەھمىتى كەڭدۇر دوستلىرىم ،

رەھمەتلىك يېرىدە ياتسۇن خاتىرجەم .

شۇندىمۇ يۈرەكلەر قانداق چىدايدۇ ؟

ھەجەپ بىر بىمەزگىل چېلىندى < ئەجەم >.



ياخشىلار بىمەزگىل كەتسە ئەپسۇسكەن ،

ئارىمىز شالاڭلاپ كېتىۋاتىدۇ .

ئورنىغا تىكسەكمۇ پەرۋىش قىلماق تەس ،

جۇدالىق يۈرەككە پېتىۋاتىدۇ.

2


ئەلۋېدا تۇداخۇن ئىمان ئامانەت ،

ھەر كىمگە بۇ كۈن بار ئۆتنە ئالەمدە .

بۇ ئۇلۇغ كۈنلەردە سېخى - مەرت بولوپ ،

ئۆتەيلى مۆمىنلەر بولوپ ياردەمدە !


ئابلەت مۇھەممەت شېئىرى


2012- يىلى 7- ئاينىڭ 29- كۈنى   توققۇزتارا

راخمانجان ئاۋۇت ئۆزھال




گۈلخاندىن مىڭ ھەسسە ھارارەت بىلەن ،   
ياشىدىڭ ئىلىڭگە خۇشاللىق بىرىپ .
ئىزىڭدىن تارىغان شاتلىق ناۋاسى  ،
ياشنىدى ئۇيغۇرغا گۈل دەستە تىزىپ  .


كۈي سىھرى باغرىنى ئاچقاندا ساڭا ،
چاخچاقتا قەسىرلەر ياسىدىڭ ھەيۋەت ،
ھاياتنىڭ زوقىغا قانماستىن ياشاپ .
ھىيىت بايرام ئۈيىگە بولغانتىڭ زىننەت .


كۆزۈڭدىن تۈكۈلگەن ئەقلىنىڭ نۇرى ،
تىكىلسە سۈر باسار ئىدى جاھاننى ،
ھەقىقەت پارلايتتى قىلغان سۈزۈڭدىن .
ناخشاڭدا كۈيلەيتتىڭ يەرنى ئاسماننى .


ئەلۋىدا ئەل ئوغلى شادلىق كۈيچىسى ،
ئامالسىز ئۇزاتتۇق كۆزىمىزدە ياش ،
ھەممىز قىسمەتكە باغلانغان بىر قۇش ،
ئۈلۈمگە يوق ئىكەن ئۆزگە بىر قاياش

ئابدۇخېلىل مىرخېلىل:

جۇدالىق نەزمىسى

( تونۇلغان خەلق قىزىقچىسى تۇداخۇن روزاخۇننىڭ ۋاپاتىغا مەرسىيە )

جۇدالىق جەزبىدىن ئۇچقان ئوق تېگىپ ،
ئۆچكىلىك قەھىرلىك كەتتى سىلكىنىپ ،
قىيامى بىھاسىل خۇش ناۋا كۈلكە ،
مەڭگۈلۈك ھىجراندىن قالدى قىلقىنىپ .

ھىسامكام يەر دەسسەپ تۇرالمىدى دەس ،
ھىبىنىڭ قولىدىن چۈشتى چوكىسى .
بىردەمگە كۈلكىنى يۇتتى قارا يەر ،
چۈشكەندە چاقچاقنىڭ غۇلاپ چوققىسى .

كامىلكام قارىداپ كەتتى رەڭگىدىن ،
بۇ قارا قىسمەتكە بېرەلمەي بەرداش .
ئاۋاكرى ئاكىنىڭ چار ساقىلىدىن ،
تاراملاپ تۇرىدۇ دەريا – دەريا ياش .

قۇرۇدى ئېتىزى پەرھات دېھقاننىڭ ،
روزاخۇن بۇقۇلدار تۇپراق بېشىدا .
شىكەستە بىر يۈرەك تۇرار چىلىشىپ ،
ئاھ،ۋەلى داۋۇتنىڭ تۆككەن يېشىدا .

پىغان تاغلىرىنى ئېلىپ يەلكىگە  ،
يەر دەسسەپ تۇرىدۇ پەرھاتمۇ ئاران .
سالىكام ئەلەملىك تولغىنار پات - پات ،
جىلۋىلىك لەۋلەردىن سىرغىغاندا قان .

ئۇۋۇدا ئۇجۇققان قۇش بالىسىدەك ،
ئۇجۇققان ياقۇپنىڭ يوغان ئېغىزى .
ئېھ ، ھايات مانا شۇ ، دېدى : رىشىتكام -
قىپ قېلىپ شاكىلى ، كېتەر مېغىزى .


كەلدى يىراقلاردىن ئىزگۈلەر ئۇچۇپ ،
ئىزگۈلۈك ئىزدىگەن بىر جاننى قۇچۇپ .
تىغدا مىڭ  تىلىنىپ تۇرغان يۈرەكنى،
ئۆتتى بۇ جۇدالىق يەنە بىر مۇجۇپ .

مەرھۇمنىڭ ياتقان يېرى جەننەتتە بولسۇن ....

بۇ خەۋەرنى ئۇققىنىمدىمۇ ئېغىزىمغا ھىچ نەرسە كەلمىگەن، بۇ مەرسىيەلەرنى ئوقۇغىنىمدىمۇ يۈرىكىمدىن بىر نەرسىلەر سۇغۇرلۇپ چىقىۋاتقاندەك بولدۇم.
رەھمەتلىكنى يوللاردا كۆرۈپ قالساق «تۇداخۇن» ئاكىمىز دىيىشىپ ئارقىسىدىن قاراپ كېتەتتۇق.
ئۆلمىگەنلەر ياشايدىكەنمىز، قورسىقىمىز ئاچسا يەيدىكەنمىز، كۈلكىمىز كەلسە كۈكىلىدىكەنمىز. يەنە شۇنداق ئويلايدىكەنمىز. يەنە قانچىلىك ئۆمرىمىز قالدى دەپ.

ئەنۋەر مەڭلىك:

مەرھۇم  تۇرداخۇن  خاتىرىسىگە:

جىسمىڭ پاكار روھىڭ تاغ ئىدى
ساددا خەلقىڭ يۈلۈنىپ تۇرغان.
تۇيۇقسىزلا كەتتىڭ ئالەمدىن
كىم ئۇ سىنى بالدۇر چاقىرغان.


كۈلۈپ كەلسەڭ سورۇنىمىزغا
دەرت-ئەلەمنى ئۇنتۇيتتۇق بىردەم.
دەردىمىزگە دەرت قۇشۇپ ئەمدى
كۈلكىمىزدە قالمىدىغۇ تەم.


تۇرداخۇن ئاھ،ئۇيغۇر ئوغلانى
جايىڭ بولغاي سىنىڭ جەننەتتە.
نامىڭ قالدى دىلدا يادلىنىپ
كىتىپ قالدىڭ لېكىن ئۆلمەسكە.


forum.php?mod=viewthread&tid=5355

ئىسمىمىزمۇ ئوخشاشكەن،
يېشىمىزمۇ ھەم شۇنداق.
روھىڭ ئۈچۈن بىر قوشاق،
توقۇۋالسام مەن قانداق؟
سېنىڭ بويۇڭ پاكاركەن،
مەن «ئېگىز»دە بىر پۇت يوق.
سەن شىمالدا چاقچاقتا
مەن جەنۇپتا،«مۆ»مۇ يوق.

شۇ تاپتىكى مۇڭىڭىزنى چۈشەندىم ، تۇداخۇنىكا...
  بىز جىسمانىيىتى كەمتۈك بولسىمۇ تەپەككۈرى تىرەن بىر كىشىنى - خەلقىمىزنىڭ سۇنماس مەنىۋىيىتىگە كۈلكە بىلەن كۈچ قوشقۇچى بىر ئوغلاننى ھەسرەت ئىچىدە ئۇزاتتۇق...( ئەڭ چوڭ مېيىپلىق جسمانىيەتتە ئەمەس روھىيەتتە ، تەپەككۇردا  بولسا كېرەك...)

forum.php?mod=viewthread&tid=5363   

              زاھىر بۇرھان

خەلق قىززىقچىسى تورداخۇننىڭ ۋاپاتىدىن ئەڭ بۇرۇن خەۋەر تاپقۇچىمەن.
ئۇنىڭ بىلەن ئەڭ كۆپ سەپەردە بىللە بولۇپ، نەچچە قېتىم ئۆيىگە بېرىپ مېھمان بولغان، كۆپ سورۇنلاردا بىرگە ئويناپ بىرگە كۈلگەن دوستىمەن. ئۇنىڭ روھى دۇنياسىنى چوڭقۇر چۈشەنگىنىمدە، ئۇلۇغ تەڭرىنىڭ يارىتىش جەريانىدىكى يەنە بىر مۆجىزىسىگە، ئىچ ئىچىمدىن قايىل بولغان كىشىمەن.
تېخى يېقىندىلا، ئۇنىڭ بىلەن بىرگە، يەركەنت ناھىيىسىگە ئويۇن قويۇپ  بارماقچى بولۇپ كېلىشكەن ئىدۇق. ئەمما ئۇ تەن سالامەتلىكى ياخشى بولمىغىنى ئۈچۈن، بىزنى ئۇزۇتۇپ قويۇپ، ئارقاڭلاردىن يېتىشىۋالىمەن دەپ ئۈرۈمچىدە قالغان ئىدى.
مەن ئۇنىڭغا مەرسىيە  يازالماي بوغۇلۇپ قالدىم..
ئۇ ھايات ۋاقتىدا ، ئۇنى تونۇشتۇرۇش چاغلىق بىر نەرسە يېزىش خىيالىغا كەلمىگەن كىشىلەرنىڭ، ئۇ ھەققىدە يازغان مەرسىيەلىرىنى كۆرۈپ، ئىچىم ھەجەب بىر قىسما بولۇپ قالدى..... يېشىم كۆز چاناقلىرىدىن قانداق  تۆكۈلۈشىنى بىلمەي مېنىڭ رۇخسىتىمنى كۈتۈپ قېتىپ قالدى.
مەن ئۇنىڭ ئۈچۈن جىم - جىت سۈكۈتتە تۇردۇم. ئۇنىڭ بىلەن بىرگە ئۆتكۈزگەن كۈنلەرنى بىر بىرلەپ خىيالىمدىن ئۆتكۈزدۈم. ئۇنىڭ ئويغۇر مەنىۋىيىتى ئۈچۈن سىڭدۈرگەن ئەجىرگە لىللا باھا بېرىشقا تىرىشتىم.
ئۇلۇغ ئاللا بۇ كىشىنى بېجىرىم تەندىن ئايرىغان بىلەن ئادىيمىلىك روھىدىن ئايرىمىغان ئىدى. ئۇنىڭ تەپەككۇرى ئوچۇق ئېدى، زېھنى كۈچى ئۇرغۇپ تۇراتتى، كىشىلىك ھاياتنىڭ قەدرىگە يېتىپ، ھەر - بىر مىنۇتنى قانداق ئوتكۇزۇشنى ئوبدان بىلەتتى. پۈتكۈل ئىنسانىيەتنىڭ ساپ ۋە ھەقىقىي مۇھەببىتى بىلەن بىر گەۋدىگە ئايلانغان ئۇنىڭ ۋۇجۇدى، ئەتىراپىدىكى ھەممە نەرسىنى، چىن دىلى بىلەن سۆيۈپ ئۈلگۈرەتتى. قىسقىسى ئۇ ياخشى بىر ئۇيغۇر ئىدى.
ئۇنىڭ ئۈچۈن مەرسىيە  يازالماي بوغۇلۇپ قېلىۋاتقىنىمنى بىلىپ تۇرۋاتىمەن.....  
ئۇ ھايات ۋاقتىدا نېمە ئۈچۈن ئۇ توغرىلىق بىر نەرسە يازمىغاندىمەن دەپ ئۆكۈنۈش ئىچىدە ئۆز  گۆشۈمنى يېمەكتە ئىدىم. ئۆلگەندىن كېيىن ياسىن ئوقۇيدىغان كىشىلەر قاتارىدىن ئورۇن  ئېلىپ قالغىنىم ئۈچۈن ۋىجدان ئازابىدا تولغىناتتىم.

سۆيۈملۈك ئۇيغۇرۇمنىڭ نۇرغۇن مۇنەۋۋەر كىشىلىرى بىرىنىڭ ئارقىدىن بىرى خۇددى كېلىشىۋالغاندەك كېتىپ باراتتى......
ئاخىرى قولۇمغا قەلەم ئالدىم. ...
مېنى كەچۈر دوستۇم، كېچىككەن بولساممۇ سەن ئۈچۈن بىر نەرسە دەي....


ياخشى ئۇيغۇر تۇداخۇنغا مەرسىيە

سېنىڭ بويۇڭ ھەممىدىن پەستۇر،
لېكىن روھىڭ سېنى دەر : دەس تۇر !!
ئادەم بولماق ئانچە تەس ئەمەس،
ئۇيغۇر بولماق ھەممىدىن تەستۇر.

كۆز چانىقىم قانىدى ئاخىر،
سەن كەتكەندە بۇ يەردىن ئۈنسىز .
قالدى جۇڭغار تارىم بويلىرى،
ماتەم بىلەن ئۈنسىز كۈلكىسىز .

مەن ناخشامنى يېرىم چۈشۈردۈم.
ھەر ئاخشامنى يېرىم چۈشۈردۈم.
ماڭا تېگىل ھەممە نەرسەمنى
سېنىڭ ئۈچۈن يېرىم چۈشۈردۈم.....

بۇ يازمىنى ئاخىرىدا   zahir تەھرىرلىگەن. ۋاقتى  2012-8-4 13:56  



بۇ يازمىنى ئاخىرىدا   ئەلقىزى تەھرىرلىگەن. ۋاقتى  2012-8-14 08:08