6-نۆۋەتلىك «ئىلى دەرياسى»(چولپان) ئەدەبىيات مۇكاپاتى تارقىتىلدى [ئۇلانما كۆچۈرۈش]

6-نۆۋەتلىك "ئىلى دەرياسى" ئەدەبىيات مۇكاپاتىغا ئېرىشكەن ئەزىزلەرگە مۇبارەك بولسۇن!

2-قەۋەتكە سۈرەت يوللاندى.

تۇقلۇق يىغىلىش ئەھمىيەتلىك بوپتۇ،مۇكاپاتقا ئىرىشكەن ئەدىبلەرنى ۋە ئىسىل ئەسەرلەرنى ئوقۇرمەنلەر بىلەن يۈز كۆرۈشتۈرگەن جاپاكەش مۇھەررىرلەرنى تەبرىكلەيمەن.

يىغىن سۈرەتلىرىدىن:

يىغىندىن كېيىنكى چۈشلۈك پائالىيەت ئارلىقلىرىدا...

    مەخمۇت يولۋاس، ئەدھەم ئىبراھىم، خالمۇرات قىيۇمبەكلەرگە مۇبارەك بولسۇن!

مۇبارەك بولسۇن ،دوستلار!ئىجادىيتىڭلار تىخىمۇ ئۇتۇقلۇق بولغاي!

      نېمە دېگەن ياخشى ئىشلار بۇ؟! جەنۇپ ئاپتۇرلىرىنىڭ شىمال سەپىرىگە يېڭى مەزمۇن قوشۇلۇپتۇ، قېرىنداش، بۇ رادەرلەرنىڭ دەرقەمتە ئولتۇرۇشقانلىرىنى كۆرۈپ سۆيۈندۈم.

تۇ تېما ئەمدى تولۇق بوپتۇ،ئەيبۇكامنىڭ ئەجرىگە رەھمەت...

باش مۇھەررىر شاكىرجان ئېلاجىنىڭ سۆزى

ئەسسالامۇ ئەلەيكۇم ھۆرمەتلىك رەھبەرلەر،قەدىردان ئۇستازلار، دوستلار ،ئۇزاق مۇساپىلەرنى بېسىپ،جەنۇپنىڭ سېغىنىشلىق ھىدىنى ئېلىپ كەلگەن پەخىرلىك قەلەم ساھىبىلىرى ھەممىڭلارغا مەرھابا،قەدىمىڭلارغا رەھمەت!
ئىلىنىڭ قايناق ،تومۇز ئايلىرىدا ئەدىبلىرىمىز ئۈچۈن تولىمۇ قىممەتلىك بىر پائالىيەتكە ھەغدا بولۇپ تۇرۇپتۇق. رەھبەرلىك ۋە ئەدەبىيات ساھەسىدىكى سىلەردەك  ھۆرمەت ئىگىلىرىنىڭ بۇ ئەنجۇمەنگە جەم بولۇشى تەھرىراتىمىز ئۈچۈن غەنىيمەت،چوڭ خۇشاللىق!
ئانا دەريانىڭ دولقۇنلىرىدەك مەنىۋىيىتىمىزنى ياشارتىپ كېلىۋاتقان «ئىلى دەرياسى»ژۇرنىلى بۈگۈن يەنە بىر قېتىم «ئىلى دەرياسى(چولپان) ئەدەبىيات مۇكاپاتى» تارقىتىش پائالىيىىدىن ئىبارەت شان-شەرەپكە نائىل بولدى.
ئىسلاھاتنىڭ باھار شامىلى بىلەن تەڭ دۇنياغا كۆز ئاچقان «ئىلى دەرياسى» ژۇرنىلى   34 يىللىق شانلىق مۇساپىسىدە بۈگۈنگىچە 188سان نەشر قىلىنىپ تەڭرىتاغلىرىنىڭ جەنۇب -شىمالى، جۇملىدىن مەملىكىتىمىزنىڭ ئىچى –سىرتىغىچە كەڭ تارقىلىپ ئاز بولمىغان نەتىجىلەرنى قولغا كەلتۈردى.بۇ نەتىجىلەر پارتىيە ،ھۆكۈمەت ئورۇنلىرىنىڭ غەمخۇرلۇقى،پېشقەدەم،ياش ئىجادكار ئەدىبلىرىمىزنىڭ قوللىشىدىن ھەرگىز ئايرىلالمايدۇ.
مىننەتسىز قان –تەر تۆكۈپ سەمەرىلىك ئەمگەكلىرىنى ئەلگە سۇنۇۋاتقان ھەر ساھە ئەدىبلىرىمىز ئۆزلىرىنىڭ تۇرمۇش پۇرىقىغا باي ھېكايە –پوۋېسىتلىرى،گۈزەل شېئىر-داستانلىرى،قىممەتلىك تارىخى يازمىلىرى،سەرگۈزەشتىلەرگە باي تارىخى ھەم بەدىئىي سۈرەتلىرى ۋە ئەدەبىياتىمىزنىڭ باشقا ژانىرلىرىدىكى بىباھا ئەمگەكلىرى بىلەن ژۇرنىلىمىزنى جۇلالاندۇرۇپ،رايونىمىزنىڭ سوتسىيالىستىك مەدەنىيىتىنى نادىر ئۈلگىلەرگە مۇجەسسەملىدى.خەلقىمىزنىڭ چاڭقاق مەنىۋىيىتىگە زۇق ۋە كۈچ –قۇدرەت ،پارلاق ئەتىسىگە ئىزگۈ ئارمانلارنى بەخش ئەتتى.نەتىجىدە  1990-يىلىدىن بۇيان ئاپتونوم رايونلۇق پارتكوم تەشۋىقات بۆلۈمى، ئاخبارات-نەشرىيات ئىدارىسى، شىنجاڭ ژۇرنالچىلار جەمئىيىتى ئېلىپ بېرىۋاتقان باھالاش پائالىيىتىدە ژۇرنىلىمىز بىر قېتىم 1-دەرىجىلىك ژۇرنال نامىغا، 2003-، 2005-، 2007-يىلى ئۇدا ئۈچ قېتىم «شىنجاڭ ژۇرنال مۇكاپاتى»غا نائىل بولۇپ، ھەر بىر ئوقۇرمەنگە يورۇق يۈزى بىلەن كۈلۈپ باقتى.
بىزنى تېخىمۇ خۇشال قىلىدىغىنى مۇشۇ سۆيۈملۈك دىياردا تۇغۇلۇپ ئۆسۈپ، بۈگۈنكى كۈندە پۈتۈن ئاپتونوم رايونىمىزدا شۆھرەت قازانغان تالاي پېشقەدەم شائىر-يازغۇچىلار، ئوتتۇرا ياش، ياش قەلەم ساھىبىلىرى «ئىلى دەرياسى» نىڭ پەرۋىشىدە ئۆسۈپ يېتىلىپ، ئەدەبىياتنىڭ كامالىتى ئۈچۈن قان-تەر تۆكمەكتە. 34 يىلدىن بۇيان شۇ سۆيۈملۈك ئاپتورلارنىڭ قوللىرىدىن چىققان نۇرغۇن ئەسەرلەر بۈگۈنكى كۈندە 188 سان ژۇرنالنىڭ ھەر بىر بېتىنى نۇرلاندۇرۇپ، كەڭ ئاۋامنىڭ كۆزلىرىنى قاماشتۇرۇپ تۇرماقتا.
ھازىرغىچە «ئىلى دەرياسى» ژۇرنىلىدىن 100 پارچىغا يېقىن ھەرخىل ژانېردىكى ئەسەر «غەربىي دىيار»، «مىللەتلەر ئەدەبىياتى» ژۇرنىلى قاتارلىق خەنزۇچە مەتبۇئاتلاردا تەرجىمە قىلىنىپ بېسىلدى.بىر قىسىم ئاپتۇر ۋە ئەسەرلىرىمىز قوشنا مەملىكەت مەتبۇئاتلىرىدا ئالاھىدە نامايەن بولدى. كۆپلىگەن ئەسەرلەر مەركەز، ئاپتونوم رايون ۋە يەرلىك رادىيو ئىستانسىسىلىرىدا ئاڭلىتىلدى. مەمتىمىن ھوشۇر، مۇھەممەتجان سادىق، مۇھەممەتجان راشىدىن، ئابلەت ئابدۇللا، مەسئۇد مەرۇپ، پەرھات ئىلياس، ئابلېكىم ھەسەن قاتارلىقلارئەدىبلىرىمىزدىن مەملىكەت بويىچە 1-دەرىجىلىك، ئاپتونوم رايون بويىچە 1-، 2-، 3-دەرىجىلىك مۇكاپاتقا ئېرىشكەن ئەسەرلەر روياپقا چىقتى. ھازىرغىچە «ئىلى دەرياسى» ژۇرنىلىدىن 38 پارچە ئەسەر «خانتەڭرى ئەدەبىيات مۇكاپاتى» غا، ئىككى پارچە ئەسەر 2-ۋە 3-نۆۋەتلىك «تەڭرىتاغ ئەدەبىيات-سەنئەت مۇكاپاتى» غا ئېرىشتى. ئىككى پارچە ئەسەر «مىللەتلەر ئەدەبىياتى» ژۇرنىلىنىڭ 2010-، 2011-يىللىق «مۇنەۋۋەر ئەسەر مۇكاپاتى» غا ئېرىشتى.
شۇنداق نادىر يازمىلىرى بىلەن ئەل  قەلبىدە گىگانت قەددىنى تىكلىگەن ۋە تىكلەۋاتقان ئەدىبلەر، ئۇستاز يازغۇچى-شائىرلار ھەرقاچان «ئىلى دەرياسى» ژۇرنىلى تەھرىراتىنىڭ ھۆرمەت-ئېھتىرامى، رەھمەت-تەشەككۈرى جامىدىن شەربەتلەر ئىچىپ، ھاردۇقلىرى چىقتى. «ئىلى دەرياسى» ژۇرنىلى ھازىرغىچە ئەدەبىيات ئۈچۈن روھىنى تەسەددۇق قىلىپ ئالاھىدە تۆھپە ياراتقان 15 نەپەر پېشقەدەم، ئوتتۇرا ياش ئەدىب-ئۇستازلارنىڭ ئىجادىيىتىگە بېغىشلانغان مەخسۇس ئىلمىي مۇھاكىمە يىغىنى ئۇيۇشتۇردى. 1994-يىلى ۋە 2006-يىلى ئىككى قېتىم ئاپتونوم رايون بويىچە «خانتەڭرى ئەدەبىيات مۇكاپاتى» يىغىنىنى مۇۋەپپەقىيەتلىك ئاچتى. 1996-يىلى ژۇرنالنىڭ 100 سان نەشر قىلىنغانلىقى مۇناسىۋىتى بىلەن كەڭ كۆلەملىك تەبرىكلەش يىغىنىنى، 1998-يىلى ۋە 2005-يىلى ئىككى قېتىم «ئىلى ياش ئاپتورلار ئىجادىيەت سىمىنارىيەسى» نى ئۇيۇشتۇردى. شۇنداقلا 2008-يىلى ژۇرنال نەشر قىلىنغانلىقىنىڭ 30 يىللىقىنى خاتىرىلەش، تەبرىكلەش يىغىنى ئۆتكۈزۈپ، زور بىر تۈركۈم تۆھپىكار ئەدىب ۋە مۇنەۋۋەر مۇھەررىرلەرنى مۇپاكاتلىدى. ئىسمايىل ئەھمەد، ئابلەت ئابدۇرېشىت، ئىسمايىل تىلىۋالدى قاتارلىق دۆلەت رەھبەرلىرى تەبرىك خەت،تېلگىراممىلار ئارقىلىق ژۇرنىلىمىزغا يېقىندىن كۆڭۈل بۆلدى.تېگىشلىك ياردىمىنى ئايىمىدى.پىشقەدەم ئەدىبلىرىمىز ۋە تەھرىراتىمىز مەسئۇللىرىنى ئالاھىدە قوبۇل قىلىپ قىممەتلىك پىكىر-تەكلىپلەرنى بەردى.
يىللاردىن بېرى «ئىلى دەرياسى» ژۇرنىلى ئەتراپىغا ئۇيۇشقان ئاپتورلىرىمىزنىڭ ئەجىر-مېھنىتى، تەھرىراتىمىزنىڭ نەتىجىسىنى ئەل-ئاۋام ۋە يۇقىرى دەرىجىلىك تەشكىلىي ئورۇنلار كۆردى. ئەل شۇ ئىجادكار ئاپتورلارغا ئېھتىرام بىلەن قارىدى، تەشكىل بولسا تەھرىراتنى تارتۇقلىدى.
يۇقىرىقى  نەتىجىلەر ئەلۋەتتە كەڭ ئەدىبلىرىمىزنىڭ بىز  تىلغا ئېلىپ ئۆتكەن قىممەتلىك مەنىۋى ئەمگەكلىرىدىن ئايرىلالمايدۇ. شۇڭا «ئىلى دەياسى» ژۇرنىلى تەھرىراتى 1998-يىلىدىن بۇيان «ئىلى دەرياسى ئەدەبىيات مۇكاپاتى»پائالىيىتى ئۆتكۈزۇپ تەسىرى  ئالاھىدە بولغان ئەسەر ۋە ئەدىبلىرىمىزنى تارتۇقلاپ كەلمەكتە. ژۇرنال تەھرىراتى ژۇرنالغا كېرەكلىك كەسپىي خىراجەت قىس، ئىقتىسادىي يۈك ئېغىر بولغان ئەھۋالدىمۇ جەمئىيەتتىكى ھەر ساھە، ھەر كەسىپ، مەرىپەتپەرۋەرلەرنىڭ ئىقتىسادىي قوللىشىنى قولغا كەلتۈرۈپ 2008-يىلىغىچە بەش نۆۋەت  «ئىلى دەرياسى ئەدەبىيات مۇكاپاتى» پائالىيىتى ئۆتكۈزۈپ 19 نەپەر ئەدىبنى بۇ قۇتلۇق مۇكاپاتتىن بەھرىمەن قىلغانىدى.بۇ قېتىمقى 6- نۆۋەتلىك «ئىلى دەرياسى(چولپان)ئەدەبىيات مۇكاپاتى» بولسا ئەنە شۇ تەنتەنىلىك ئەنجۇمەنلىرىمىزنىڭ ھاياتى كۇچكە تولغان يەنە بىر قېتىملىق نامايەندىسى.
شىنجاڭ تارىخىدىكى ئاجايىپ كەچمىشلەرنىڭ بۆشۈكى بولغان گۈزەل ئىلىدىكى ئانا دەريانىڭ نامى بىلەن ئاتالغان «ئىلى دەرياسى» ئۆزىنىڭ 34 يىللىق مۇساپىسىدا ژۇرنال ئۈچۈن ئەڭ مۇھىم ھېسابلانغان بەدىئىي سۈپەتتىن ئىبارەت مەركىزىي نۇقتىنى چىڭ تۇتۇپ، ئاپتورلارنى تولۇقلاش، زورايتىش يولىدا ئۈزلۈكسىز ئىزدىنىپ، تۈرلۈك شەكىلدىكى تەربىيەلەش ۋاسىتىسى بىلەن بىرىنىڭ كەينىدىن بىرى يېتىشىپ چىققان تۈركۈم-تۈركۈم ئاپتورلار قوشۇنىنى بارلىققا كەلتۈردى.بۇ قېتىم «ئىلى دەرياسى (چولپان)ئەدەبىيات مۇكاپاتى»غا ئىرىشكەن ئەدىبلىرىمىز ئەنە شۇ تىرىشچانلىقىمىزنىڭ نادىر ئۈلگىسى.
مەن ئاخىرىدا ئىپتىخارلىق ھېسسياتىم بىلەن شۇنداق دەيمەنكى ژۇرنىلىمىزنىڭ بۈگۈنكى سەلتەنىتى ئالدى بىلەن بىزگە ھەمىشە دانا يول كۆرسىتىپ،يىتەكچىلىك قىلىپ كېلىۋاتقان پارتىيە-ھۆكۈمەت ئورۇنلىرىمىزغا، يۈرەك قېنىنى ئەدەبىياتىمىز  ئۈچۈن بېغىشلىغان سۆيۈملۈك ئاپتۇرلىرىمىزغا،مىننەتسىز تەر تۆكۈۋاتقان مۇھەررىرلىرىمىزگە ،مەنىۋى ئەمگەكلىرىمىزنى چىن يۈرىكىدىن قەدىرلەيدىغان، ئەدەبىيات ئىشلىرىمىزغا يېقىندىن غەمخۇرلۇق قىلىۋاتقان سادىقجان، ساقىھاجى،ئابلىمىت قادىر ھاجى ۋە «ئىلى دەرياسى (چولپان)ئەدەبىيات مۇكاپاتىنىڭ بارلىق ئىقتىسادى چېقىمىنى زىممىسىگە ئالغان ،ئىلىمسۆيەر خەلقىمىزنىڭ مۇنەۋۋەر ۋەكىللىرىنى بۇ يەرگە جەم قىلغان دىلشات ئۆمەرجانغا ئوخشاش مەرىپەتپەرۋەر كارخانچىلىرىمىزغا مەنسۇپ!
ھەممىمىزنىڭ مىننەتسىز تىرىشچانلىقى «ئىلى دەرياسى»نى تېخىمۇ زور ئۇتۇقلارغا يار قىلسۇن،سوتسىيالىستىك ئەدەبىياتىمىزنىڭ گۈزەل ئەتىسى ۋە پارلاق تەرەققىياتىنى كۆرۈش ھەممىمىزگە نېسىپ بولسۇن!
كۆپچىلىككە رەھمەت!
2012-يىل 7-ئاينىڭ 12-كۇنى








بۇ يازمىنى ئاخىرىدا   ئەرك تەھرىرلىگەن. ۋاقتى  2012-7-18 16:34  

«ئىلى دەرياسى»ژۇرنىلى ئۇيغۇر تەھرىر بۆلۇمىنىڭ
6-نۆۋەتلىك «ئىلى دەرياسى ‹چولپان ›ئەدەبىيات مۇكاپاتى »غا ئىرىشكەن ئاپتۇر ۋە ئەسەرلەرگە بەرگەن باھاسى

ماخمۇد يولۋاسنىڭ «چىرايلىق چىۋىش»
ھېكايىسىغاقىسقىچە باھا

ياش يازغۇچى ماخمۇت يولۋاسنىڭ ‹‹چىرايلىق چىۋىش »ناملىق ھېكايىسى ‹‹ئىلى دەرياسى›› ژۇرنىلىنىڭ 2009-يىللىق 4-سانىدا ئېلان قىلىنغان  ئوزگىچە پۇراقلىق ئەسەرلەرنىڭ بىرى.
ئاپتور ئەسەردە ئاددىي تۇرمۇش كارتېنىلىرى بىلەن  تولىمۇ سىلىق، تولىمۇ  يېقىشلىق سىيۇژېت ئېقىنىغا باشلاپ ئوقۇرمەنلەرگە ئازادىلىك تۇيغۇسى بەرگەن ، ئاددىيلىق ئىچىگە يوشۇرۇنغان ئاۋامنىڭ ساددا  ۋە چىن تۇرمۇش قاراشلىرىنى تاۋلانغان  تىل سەنئىتى،  چىن ۋە ئەپسانىۋى مۇھىت گىرەلەشكەن ئۇسلۈپ ئارقىلىق ئىپادىلەپ ،كىشىنى ھايات ھەقىقەتلىرى ھەققىدە چۇڭقۇر ئويلىنىشقا يىتەكلەيدۇ.
ئەسەر پۇختا قۇرۇلما،گۈزەل تىل،ئۆزگىچە پىكىر موھىيىتى ئارقىلىق  بەلگىلىك بەدىئىي پەللە  ياراتقان. شۇڭا مەزكۇر ئەسەرگە 6-نۆۋەتلىك «ئىلى دەرياسى ‹چولپان ›ئەدەبىيات مۇكاپاتى »بىرىشىنى قارار قىلدۇق.



ئەدىھەم ئىبراھىمنىڭ «جۇنۇن»سەرلەۋھىلىك
بىر يۇرۇش شېئىرلىرىغا  قىسقىچە باھا

   ياش شائىر ئەدىھەم ئىبراھىمنىڭ«جۇنۇن»سەرلەۋھىلىك بىر يۇرۇش شېئىرلىرى ‹‹ئىلى دەرياسى›› ژۇرنىلىنىڭ 2010-يىللىق 4-سانىدا ئېلان قىلىنغاندىن كېيىن ئوقۇرمەنلەرنىڭ  ئالاھىدە ئىتىبارىغا،تەنقىدچىلىرىمىزنىڭ مۇئەييەنلەشتۈرۈشىگە نائىل بولدى. شائىر بۇ بىر يۈرۈش شېئىرلىرىدا  ئىلى ۋادىسىنىڭ خىلۋەت سەھرا-قىشلاقلىرىدىكى كۆزگە تونۇش ئىتەكلىرىنى  ئۆزگخچە نەزەر ، چوڭقۇر مۇھەببەت  ۋە تەبىئەتكە يېقىن تەبىئى تىل ھالىتىدە تەسۋىرلەپ سەيياھلىق شېئىرلىرىدا يېڭىچە ئىزدىنىش يارىتالىغان.دەريا،يامغۇر،شامال  تىۋىشلىرىغا ماس شېئىرى مىلودىيە پەيدا قىلىپ سانسىز ئوقۇرمەنلەرنىڭ قەلب تارىنى چېكەلىگەن.بىز مەزكۇر شېئىرلارنىڭ يۇقىرىقىدەك مۇۋەپپىقىيىتىنى كۆزدە تۇتۇپ 6 -نۆۋەتلىك «ئىلى دەرياسى ‹چولپان ›ئەدەبىيات مۇكاپاتى »بىرىشىنى قارار قىلدۇق.


«ئىلى دەرياسى (چولپان) ئەدەبىيات مۇكاپاتى» نىڭ «تۆھپىكار گۈزەل-سەنئەت مۇھەررىرى» مۇكاپاتىغا ئىرىشكۈچى خالمۇرات قېيۇمبەگكە باھا

ئۇيغۇر خەتتاتلىق سەنئىتىدە مۇئەييەن تەسىر ۋە ئورۇنغا ئىگە ئىقتىدارلىق ياش خەتتات، فوتوگراف خالمۇرات قېيۇمبەگ ئۇزۇن يىللاردىن بۇيان كۆركەم ھۆسن خەتلىرى، تۇرمۇش مەنالىرىغا باي بەدىئىي سۈرەتلىرى،گۈزەل سەنئەت ئەسەرلىرى  بىلەن تىنىمسىز ئەمگەك قىلىپ كېلىۋاتقان تۆھپىكارلىرىمىزنىڭ بىرى. ئۇ پۈتۈن ۋۇجۇدى بىلەن «ئىلى دەرياسى»ژۇرنىلىنىڭ كۆركەم،رەڭدار سەنئەتلىك چىقىشى ئۈچۈن ئۈنسىز تۆھپە قان-تەر تۆكۈپ كەلدى. شۇڭا بىز ياش سەنئەتكار خالمۇرات قىيۇمبەگنىڭ مىننەتسىز ئەمگەكلىرى ئۈچۈن 6-نۆۋەتلىك «ئىلى دەرياسى (چولپان) ئەدەبىيات مۇكاپاتى» نىڭ «تۆھپىكار گۈزەل-سەنئەت مۇھەررىرى» مۇكاپاتىنى بېرىشنى قارار قىلدۇق.  

«ئىلى دەرياسى»ژۇرنىلى ئۇيغۇر تەھرىر بۆلۇمى
2012-يىل 7-ئاينىڭ 12-كۇنى

بۇ تېمىغا قانات-قۇيرۇق بەرگەن ئەيبۇكامغا رەھمەت!

مەخمۇت يولۋاسقا مۇبارەك بولغاي. تىخىمۇ كاتتا ئەسەرلەرنى يارىتىشىڭغا تىلەكداشمەن.