قەشقەر [ئۇلانما كۆچۈرۈش]

قەشقەر

مېھرىنۇر ئەبەيدۇللا دىلقىزى
  

قەشقەرنىڭ قىشى ئاز ،سوغۇقى ئەتىياز.
     ــــ ئاتىلار سۆزى

قەشقەر،
مېھرى ئىسسىق، سۆيۈملۈك ماكان!
باغرىڭ ئاتەش، ئوتلىرىڭ يامان،
ئاپئاق قارلار قاتمۇ-قات مۇزلار،
ئېرىپ كېتەر سۆيگۈڭدە ھامان.
قەھرىتان جۇت قىلسىمۇ خىرىس،
يۈرىكىڭدە- جىلۋىگەر باھار.
ھەرچىمدىم تۇپراق،
ھەر بىر گىياھىڭ،
تۆكۈپ تۇرار مېھر ۋە ئىپار
ئۇ ئەلئۈچۈن قاندۇر ھەتتا جان،
ئۇ تۇتىيا،ھوزۇرى-جەننەت،
ئۇندا بەحت،ئالەمچە لەززەت!



قەشقەر،
ئالەمدىكى نۇرلۇق بىر گۆھەر،
جاھان ئەھلى ساڭا تىكىلەر!
سەن كائىنات كاتتا ئىنئامى،
سەن تارىخنىڭ ئۆلمەس شاھىدى.
قامۇسلىرىڭ مەڭگۈلۈك ماياك،
سەندىلا بار لالىرەڭ يۇلغۇن،
مىڭ يىللىق توغراق.

ئۆتكىنىمدە ھېيىتگاھتىن ھەردەم،
مەھمۇت، يۈسۈف، ئاماننىسادىن
كېلەر ماڭا مۇڭلۇق بىر نىدا،
جاراڭلايدۇ ياڭراق بىر سادا:
دىلقىزى!
بولغىن ئەلنىڭ دىلدىكى قىز،
بىلگىن نېمە قەلبىدىكى سۆز؟
ھەسرىتىنى ئاڭلا مۇڭلىنىپ،
    شاتلىقى ئۇچۇن،ئاتلان روھلىنىپ،
　ھاياتىڭدىن قالدۇر يارقىن ئىز!


ئەنە،
يۈرەكلەرنى سېلىپ لەرزىگە،
يىراقتىن ئاڭلانماقتا،
مۇقام ناۋاسى،
ئۇــ خەلقىمنىڭ قەلب ساداسى!

قەشقەر
ئەزىزانە شاھانە  شەھەر
سېنىڭدە بار،
بۈيۈك زاتلار پارلاقسىماسى،
دەردمەنلەرنىڭ مەلھەم داۋاسى،
قاغجىرىغان دىللارغا زەم- زەم،
ئۆركەشلىگەن تۇمەن دەرياسى،
ۋۇجۇدىڭغا قوشىدۇ مادار،
قىزلىرىڭنىڭ شەرمى- ھاياسى،
ئوغلانلىرىڭ غۇرۇر-ۋاپاسى،
ئىلم-ھېكمەت،ھۆنەر-سەنئەتتە،
چاقنار ئەبەت سېىھرىڭ جۇلاسى.

دەرھەقىقەت،
قىش پەسلىڭ بەك ئاز ،
  دىلىڭ ئاپپاق مامۇققا ئەنداز،
چاقچاق قىلار ساڭا ئەتىياز...

ئەتىيازنىڭ سوغۇق شامىلى،
گۈركىرىگەن دەھشەت قۇم-بوران،
ياپراقلارنى ئايرىپ دەرەختىن،
نەشتەر كەبى ئۆتسىمۇ جاندىن،
ئۆرۈيەلمەس كۈمۈش تاعلارنى،
ئۆچۈرەلمەس كۆيگەن شاملارنى،
كۆچۇرەلمەس گۇلگۇن دەملەرنى،
قەد كۆتۈرۈپ تۇرار سۇۋادان،
سەن يەنىلا مەغرۇر ھەم تەمكىن.
كۈلۈپ چىقسا ئۇپۇقتىن قۇياش،
تاش ئۇستىدە بىح يارار نوتا،
توزۇپ كېتەر،
ئاسمىنىڭنى قاپلىعان توزاڭ،
ئېرىپ كېتەر
پىنھانىڭدا مۇزلىعان كۆز ياش،
ئەتىيازنى قالدۇرۇپ غەمكىن.


قەشقەر
خىسلەت ۋە ھېكمەتكە
كۆمۈلگەن دىيار!
مېھرىڭ بىلەن ياساپ نۇر دېڭىز،
كەڭ زېمىنغا بېرىپ ھارارەت،
جۇدۇنلارنى سۈرسەڭ يىراققا،
لەۋلىرىڭگە سۆيۇپ زىلال سۇ،
سىڭىپ كېتەرئالتۇن تۇپراققا.
بادام دوپپا،مۇڭلۇق دۇتاردەك،
شاھى ئەتلەس،پىشقان ئاناردەك،
ئاشىق بۇلبۇل،ھەيۋەت چىناردەك،
جەننەتتىكى چاھار باعلاردەك،
جەزبى بىلەن كەلسە گۇزەل ياز،
يۈرىكىمدە كۈلىسەن قاھ-قاھ ،
گۈل ئېچىلىپ، چىلىنغاندا ساز!.... بۇ يازمىنى ئاخىرىدا   مېھرىنۇردىلقىزى تەھرىرلىگەن. ۋاقتى  2013-2-3 12:45  

قەشقەرنى سېغىنىپ ئاران تۇرغان يۈرۈكۈمگە ئوت يېقىۋەتتىڭىزغۇ؟
ئەزىزانە قەشقەرنى گۈزەل تىل،چىن ھېسيات بىلەن تېخىمۇ گۈزەل تەسۋىرلەپسىز،قەلىمىڭىز ھارمىسۇن!!!!

بارىكاللا، ئەجەپ ياخشى چىقىپتۇ. اللاھ  يەنىمۇ ھىداھەت بەرسۇن!

مېھرىنۇر ھەدەمنىڭ مۇقەددەس قەشقەر شەھىرىمىز ھەققىدىكى ئوتلۇق قەسىدىسىگە ئاپىرىن. سۆيۈملۈك ئانا دىيارىمىزنىڭ ھەر قايسى يۇرت - ئولۇسى ھەققىدىكى مەدھىيەلەر ئۈزۈلمىسۇن.
مېھرىم ھەدە، ئاللاھ تەپەككۈرىڭىزنى يەنىمۇ ئوچۇق قىلسۇن.

ئەزىزلەرنىڭ بەرگەن مەدەتلىرى مەن ئۅچۅن زور ئىلھام!يەنىمۇ ياحشى ئەسەرلەرنى روياپقا چىقىرىشقا تىرىشىمەن!

تەشەككۇر ،قەلىمىڭىز ھارمىسۇن!!!!

مۇشۇنداق قايناق لېرىكىرىڭىز ئۈزۈلۈپ قالمىغاي!يۇرت مۇھەببىتىدىن تۇغۇلغان ھىسلىرىڭىزدىن ھەممىمىز سۈيۈنەيلى!

  دىيارىمىز  قەشقەر  قانچىلىك تەرىپلىسەك  ئەرزىيدىغان ئەزىزانە يۇرت.
ئىجادىيىتىڭىز سەمەرىلىك بولغاي.

دىلقىزىنىڭ شېئىرلىرىرى ھەقىقەتەن  ئېسىل  چىقىۋاتىدۇ....
يىڭى يىلدىكى  ئىلھاملىرىڭىز  تىخمۇ تاشقىنلىسۇن!!!

اللاھ  يەنىمۇ ھىداھەت بەرسۇن!
ئىلھامىڭىز قايناپ-تاشقىنلاپ كەلسۇن!
ھەسەتخورلار ھەسەتتىن قان يۇتۇپ ئۆلسۇن!
ئىجاد سەپىرىڭىزدىن قىزىل گۈللەر ئۈنسۇن...

ئانا  يۇرت سۆيگۈسىدىن تۇغۇلغان ھىسلىرىڭىزدىن سۈيۈندۈم.

يۇرتنى مۇشۇنداق چىن قەلىپتىن سۆيگەندە ئاندىن ئۇ ھەقىقى شېئىرىي مىسرالارغا تىزىلىدۇ.