بۇلبۇل يوق سۆيگۈمنىڭ چاھار بېغىدا [ئۇلانما كۆچۈرۈش]

بىر قىزدا كۆيىدۇ مىڭ گۈلنىڭ نازى

بىر قاراپ شۇئانلا يوقاتتىم ئەسنى،
ئاھ، نېمە بولارمەن ئىككى قارىسام.
يۈرەككە سىغمىغان سېغىنىشىمنى،
ئامالىم بولمىدى شۇنچە يوشۇرسام.

گۇگۇمنىڭ باغرىدا يۇچۇن بىر گەۋدە،
باغدىكى چېچەكلەرقارار ئۆمچۈيۈپ.
يېقىنلاپ كەلمەكتە سۈزۈك بىر شەپە،
جۇپ يۈرەك چاراسلاپ كۆيدى ئوت ئېلىپ.

كۆڭۈلدەك ئازادە گۈلزارلىق ئىچى،
قۇشلارنىڭ ئۈنىدە گۈللەر ئاۋازى.
مەڭگۈلۈك ئامەت بار چوغدەك باغاشتا،
بىر قىزدا كۆيىدۇ مىڭ گۈلنىڭ نازى.

بۇلبۇل يوق سۆيگۈمنىڭ چاھار بېغىدا

گۈرۈلدەپ ئوت كۆيەر جېنىم قېتىدا،
مەن ئازغان چېچىڭنىڭ ئورمانلىقىدا.
كۈللىرى دۆۋلىنىپ كۆمدى يولۇمنى،
چوغ بولۇپ ئېچىلدى ھەسرەتلىك يىغا.

قەلبىمدە بىر يول بار ھىچكىم ماڭمىغان،
گۈللىرى سەن ئۈچۈن پۇراق چاچىدۇ.
كۆزلەردىن كۆزلەرگە ، لەۋلەردىن لەۋگە،
چوغلارغا لىق تولغان دەريا ئاقىدۇ.

بۇلبۇل يوق سۆيگۈمنىڭ چاھار بېغىدا،
قېنى ئۇ سەلكىندە يەلپۈنگەن چېمەن؟
تالجىققان كۈتۈشلەر بوزلايدۇ دائىم،
قۇياشلىق تاڭلارغا تەلمۈرۈش بىلەن.

    ھارماس   ئىلھانلىرىڭىز غا داغدام يوللار يار بولسۇن