رۇبائىي ۋە پارچىلار مەخسۇم مۇسا [ئۇلانما كۆچۈرۈش]

رۇبائىي ۋە پارچىلار

مەخسۇم مۇسا

1
شۇمبۇيا بىخلانسا قەلبىڭدە ئاداش،
  جۇت بولۇپ مېھرىڭمۇ تۆكۈلەر يانداش.
شۇ سەۋەب كۆيدۈرسە سېنى تالاپەت،
  تېپىلماس ساڭا ھېچ يۆلەك، قەلىبداش!
2
بەستى-يۇ، تۇرقىڭنى دېمىگىن قامەت،
   زىننەت-يۇ،رۇخسارنى دېمىگەن ئامەت.
     ئادەملىك سالاپەت پۇل- پۈچەك ئەمەس،
مېھىرلىك كۆيۈنۈش ھەممىدىن قىممەت.
3
    مىرادىڭ ھاسىلدۇر تەردە، ئەجرىڭدە،
غاپىللىق ياتىدۇ قازغان گۆرىڭدە.
ئىنسابىڭ غاپىلغا ئۇرۇلغان قىلىچ،
     ۋە لېكىن پاكىزلىق بولسۇن كۆڭلىڭدە.
4
     كۆرمەيسەن مېۋەڭنى بەزىدە ئۆزۈڭ؛
خەلقىڭنىڭ ئاغزىدا قالىدۇ سۆزۈڭ.
           بۇ ئۇلۇق شان- شەرەپ بىلسەڭ ئەبەدى-
يۇرۇقلۇق بەھرىدە كۈلىدۇ كۆزۈڭ.
5
بەزىدە نىشانەڭ، ئەقىدەڭمۇ خار،
چوڭ يولمۇ بەئەينى كۆرۈنىدۇ تار.
          ھاياتنىڭ يولى بەك ئىگىز- پەس، ئەگرى
  قىلمىغىن بەختنى ھەر كۈنى خۇمار.
6
يۈزۈم يۇرۇق دېيەلەيمەن ئالدىڭدا،
ۋاپا قىلدىم تەسەددۇقجان ئالدىڭدا.
        ھۆسنىڭ بولسۇن مەيلى گۈلزار، مەيلى چۆل
مەن سۆيگۈنىڭ قەلەندەرى ئالدىڭدا.
7
رەھىم قىلىپ رەقىبىمگە ئۆزىچە،
نەيرىڭىنى ۋاپا بىلدىم ئۆزىچە.
      مېھىر بەردىم سىر ساقلىماي ئۆزىچە،
      دۈملا چۈشتۈم خەنجىرىگە ئۆزىچە.
8
  قۇلاق سالدىم سادايىڭغا،
ۋاپا قىلىدىم ۋاپايىڭغا.
     يىگىتلىك لەۋزىدە ۋىجدان،
نېمە يەتكەي ئادايىڭغا!
9
    ئىشەنسەڭ يار ۋاپا مەندە،
     كۆپەيدى ھەم جاپا مەندە.
  ئىزدەيمەن، تاپالمايمەن،
سەن نەدە، نېمە غەمدە؟
10
       ھىدىڭنى ھىدلىدىم گۈل دەپ،
      كېچە- كۈندۈز غېمىڭنى يەپ.
يېتىم قالدىم تالا- تۈزدە،
     سېنى قايدىن كېلەركىن دەپ.
11
        خوش دېدىم كەتكەندە، كەلگەندە لەببەي،
          ئىگىلدىم چوڭ بىلىپ بىلمىدىڭ ھەي- ھەي،
     ئەجرىمنىڭ گۈلىنى چەيلىدىڭ دەسسەپ،
قەدرىڭنى ھاياتقا قىلمىدىڭ بىلەي.
12
چاياننى تىۋىپلار دەيدىكەن دورا،
         ئاچچىق ئىس بولسىمۇ يەيدىكەن مۇرا.
          تاتلىق مەن ئاچچىقىنى باسىمەن دەيدۇ:
بەزىلەر چاياندەك بولسىمۇ گۇيا.
13
ھالالنىڭ لەززىتى، قىممىتى شېرىن،
       سۆيۈگۈنىڭ، ۋىسالنىڭ پۇرسىتى شېرىن.
ئاداشما توغرا يول ھاياتنىڭ جېنى،
        شان- شەرەپ تارتۇقى ھەممىدىن شېرىن.
14
    ئىلھامنىڭ ئېتىغا مىنىپ ھەر كۈنى،
         قازىمەن روھىمدىن جەۋھەر ھەر كۈنى.
  تارىخنىڭ بېتىدە كۈلسە ئىزلىرىم،
ھاياتىم مەنىگە تولار ھەر كۈنى.
15
     ئەمەستۇر چەكسىزلىك ئىچىدە ياشلىق،
    بېرەلمەس ئىمتىياز ھەرنەكىم- باشلىق.
تۇتمىساڭ كېتىدۇ شۇ قەدەر ئاددى،
    سۇ كەتسە ئاستىدا قالغاندەك تاشلىق.
16
    ئىلھامنىڭ قىزىغا كۆيىمەن ھەردەم،
   ھاياتقا تاپقاندەك گۇياكى ھەمدەم.
يەتمىدىم ۋىسالغا كۆيۈپلا ئۆتتۇم،
      شۇ سەۋەب تاشقىنغا ئايلاندىم سەۋرەم.
17
  ھاياتنىڭ قىسمىتى كەلگەندە تەتۈر،
      بوشاشما كۆرەشكە ئات سال،يەڭنى تۈر.
  قىسمەتنىڭ كەينىدىن كۈلىدۇ ئىقبال،
   بىر ئوڭنىڭ كەينىدە بولغاچقا تەتۈر...
18
ئۈمىدتىن ئېچىلۇر ھاياتقا پۈرەك،
  باغلىنىپ تۇرغاچقا ئۇنىڭغا يۈرەك.
     ۋىجدان ۋە ئەجىردە يارىلۇر بەخت،
  ئۇمىدتىن ئامەتكە ئېچىلسا كۆرەك.
19
  ئالىمەن ھوزۇرنى مىسرالىرىمدىن،
  قۇچىمەن بەختنى ۋىساللىرىمدىن.
مەيلىغۇ شىئېرغا ئاشىق، دىۋانە-
   دېسىمۇ، رازىمەن دەشناملىرىمدىن.
20
قەسەمدە مۇھەببەت،ئەقىدە ھېساب،
      يانمىغىن، شۇم ئەجەل كەلسىمۇ قىستاپ.
ئادىمىي شەيتانلىق ئەسەبى قىلىق،
   روھىڭدا ئۆلمىسۇن ھىدايەت، ئىنساب.
21
يول تاپىسەن بىر كۈنى ھامان،
  پۇل تاپىسەن ئۆلمىسەڭ ھامان.
ھۇرۇنلۇققا بولما قول، دېدەك،
ئەجىردە گۈل ئېچىلار ھامان.
22
ئۈمىد بىلەن قەلبىڭ كۈلىدۇ،
بەخت بىلەن ئۆمرۈڭ كۈلىدۇ.
  ئۈمىد بىلەن بەخت قوشكېزەك،
ئۈمىد ئۆلسە بەخت سۇلىدۇ.
23
       يۇرت سۈيەر بەردەم يۈرەك،
تەپتىدە بولغاچ تىلەك.
مېھرىدە مېھرى ئاقار،
بىرسىگە بىرسى يۈلەك.
24
   تىل ئەمەس قەلىب سۆزى،
      گۈل ئەمەس كۈلگەن يۈزى.
تىلنى پاك قىلغان غۇرۇر،
شاھىدى بىر جۇپ كۆزى.
25
قىلمىغىن سۇلى-سالا،
    سالمىغىن ئەپلەپ ساما.
      يالجىماس قىڭغىر ئىشىڭ،
  تاپمىقىڭ تەستۇر داۋا.
26
ياشىدۇق، مەندۇر مەن دېدۇق گاھىدا،
ئاپتاپنى كۆرگەندە ياتتۇق سايىدا.
ئەجداتلار ئىزىغا گۇۋاھ – شاھىت دەپ،
ھېچ ئىش يوق غادايدۇق ئىگىز پايىدا.
27
بىلىمگە ئاشىق دەپ بىلمىدىم، بىراق،
   بىرنى ماز، بىرنى تاز دېدىم ھەممە ۋاخ.
   غەپلەتتە ياتساممۇ دېدىم سەگەك مەن،
  ھەتتاكى ئەجىرىمدىن ئالمىدىم ئاتاق.
28
     قاپقان قۇردۇڭ يول- يولغا،
     چاتقال تاشلاپ ئوڭ- سولغا.

دۇرۇسلىقىڭ ناگۇمان،
قالدىڭ ئۆزۈڭ ئۇۋالغا.
29
  مەنسىز ئۆتتى تويلىرىڭ،
      ۋىسال قۇچماي بويلىرىڭ.
نىيەت ئالا بولغاچقا،
  تۇغماي ياتتى قولىرىڭ.
    30
       قىسمىتىڭ كاج كەلگەندە،
    ئۆڭمە ھەرگىز بىلگەندە.
بولالايسەن باھادىر،
      شۇ قىسمەتنى يەڭگەندە.

2012-،2013-يىل،قەشقەر – مارالبېشى