كەلمىسەڭ [ئۇلانما كۆچۈرۈش]

كەلمىسەڭ




ئەمەتجان زۇنۇن


قۇرۇپ قاقشال بولۇپ قالىمەن ،

چۆلدە قالغان بىر تۈپ دەرەختەك .

ئۆز -ئۆزۈمنى ئوتقا سالىمەن ،

گۈلخان بولۇپ ئاقىدۇ يۈرەك .


سۆيگۈ ئىزلەپ يۈرگەن ئاشىقمەن ،

تىرىكلىكنىڭ غەم بازىرىدا .

ھىجران يۈدۈپ بولغان شائىرمەن ،

ئۈلۈم  ۋىسال ھەق ئارىسىدا .



تاڭ كۆيگەندەك كۆيىمەن ھەر كۈن ،

مەجنۇنلاردەك ناخشام تۈگىمەس .

يۈلتۇزلارنى سۆيىمەن ھەر تۈن .

دىدارىڭسىز كۆزلىرىم ئەلەس .


تەڭرىم سالغان بۇ سەۋدالىقنى

جاندىن ئۇلۇغ بىلىمەن جېنىم .

ساڭا سالغان  ئۇ تەرسالىقنى ،

ياندۇرىدۇ ۋاپالىق مىھرىم .


تەنھالىقتىن تويدۇم بىلمىدىڭ ،

جۇدالىققا ئەجەپ تاشلىدىڭ .

ئەقىدەمگە نېمە تىلىدىڭ ،

ئوتۇنچىغا مېنى ساتمىدىڭ .