ياش ئاتا ئانىلار سەمىگە [ئۇلانما كۆچۈرۈش]

ياش ئاتا ئانىلار سەمىگە

　　　‹‹ ئانا – بالا – ئاتا ›› بۇلار بىر ئائىلە چەمبىرىنىڭ ئىچىدە بولۇپ ، تەلىپى ۋە ئېھتىياجى – مىننەتسىز مۇھەببەت ، ھەددىدىن ئېشىپ كەتمىگەن مۇھەببەت ئىپادىلەش ئۇسۇلى ، ئەخلاق ۋە ئەقىل جەھەتتە بىر-بىرىنى يېتەكلەش ۋە تولۇقلاش.  
　　　
　　　بالىلارنىڭ قورسىقى توق ، تېنى ساغلام تۇرۇپ يەنە نېمە ئۈچۈن تۇيۇقسىز يىغلاپ ، تۇيۇقسىز ئاچىققلاپ قالىدۇ ؟
　　　جاۋاب – بالىلارنىڭمۇ ئۆزىگە چۇشلۇق پىسخىكىسى بولىدۇ . بەلكى سىز دېققەت قىلمىغان كىچىككىنە بىر ھەركەت ، بىر ئېغىز سۆز ۋە ياكى تەلەپپۇزىڭىزدىكى زەردىلىك بالىنىڭ دىلىنى رەنجىتكەندۇ . بالىلار ئاغرىنىشنى ، رەنجىشنى بىلىدۇ .پەقەت سىزگە سەۋەبىنى ئېيىتپ بېرەلمەيدۇ ، ئەمما ئۆزىنىڭ تۇيۇقسىز يىغىسى ، ھەددىدىن زىيادە كەپسىزلىكى ، ئاچچىقى ۋە شۈك بولىۋىلىشى بىلەن ئىپادىلەيدۇ .
　　　بالىلار كۆپىنچە ئۆزىنى يالغۇز ھېس قىلىدۇ . ئۇلارنىڭ نەزىرىدە پۈتۈن دۇنيا پەقەت ئۇلار ئۈچۈنلا ئايلىنىشى كېرەك . ھەممىلا كىشى ۋە نەرسە پەقەت ئۇلارغىلا تەئەللۇق بولىشى كېرەك. سىزنىڭ بەزى چاغلاردىكى ئالدىراشچىلىقىڭىز ھەر ۋاقىت بالا بىلەن بىللە بولالماسلىقىڭىز بالىلارنىڭ تۇيۇقسىز يىغلايدىغان ، ئاچچىقلىنىدىغان ،سۈك بولىۋالىدىغان مىجەزلىرىنى كەلتۈرۈپ چىقىرىدۇ .
　　　
　　　بالىڭىزنىڭ مۇۋاپپەقىيەت قازىنىشىنىڭ ئاساسلىرىنى يېتىلدۈرۈش
　　　 سىزگە باغلىق
　　　
　　　1. بالىغا قىممەت باھالىق ئويۇنچۇقلارنى كۆپلەپ ئېلىپ بېرىش ، ھەرخىل كۇرسلارغا ئاپىرىپ بالىنى ئىقتىدارلىق يېتىشتۈرۈشنى ئويلىغانلىقىڭىزنىڭ ئۆزى بالىڭىزغا بولغان مۇھاببىتىڭىزنى ئىپادىلەپ بېرەلمەيدۇ . مۇھىمى بالىڭىزغا كۆپرەك ۋاقىت ئاجىرتىپ ئۇنىڭ بىلەن ئورتاق پائالىيەتلەرگە قاتنىشىش ، بىرلىكتە ئويون ئويناش . ‹‹ سېنى ياخشى كۆرىمەن ›› دېگەن سۆز بىلەن ئىپادىلىمەي ئويون ئارقىلىق بالىغا ئۆزىڭىزنىڭ مۇھەببىتىنى ھېس قىلدۇرۇش.
　　　2.  بالا بىلەن بىللە بولغان ۋاقىتلىرىڭىزدا پۈتۈن دېققىتىڭىزنى بالىغا ۋە بالا بىلەن ئويناۋاتقان ئويۇنغا مەركەزلەشتۈرۈڭ ، بۇنىڭ بىلەن ئۆزىڭىزمۇ يېنىكلەپ قالغاندەك ھېس قىلىپ ھەقىقى ئانىلىق ياكى ئاتىلىق كەيپىنى سۈرەلەيسىز.
　　　3. بالىنى كىچىك كۆرۈش ، تەنقىدلەش ، بالىنىڭ ئورنىدا بالىغا مۇناسىۋەتلىك ئىشلاردا ئۆز ئالدىڭىزغا قارار چىقىرىشنىڭ ئورنىغا ، ئاۋۋال بالىڭىز بىلەن پاراڭلىشىڭ .
　　　بەلكىم بالىڭىز سىز ئويلىمىغان نۇقتىدا تۇرۇپ ،كۈتۈلمىگەن پىكىر قاراشلارنى ئوتتۇرىغا قويۇپ سىزنى ھەيران قالدۇرار ياكى ئۆزىنىڭ خىياللىرىنىڭ خاتا ئىكەنلىكىنى ھېس قىلىپ ، سىزگە بولغان ھۆرمىتى ھەسسىلەپ ئاشار. بۇلارنى سىز بالا بىلەن مۇڭداشماي تۇرۇپ بىلەلمەيسىز.
　　　4. ئۆزىنىڭ پىكىرلىرىنى ئاڭلايدىغان ، ئۆزىنى چۈشىنىشنى خالايدىغان كىشىلەرنىڭ يېنىدا ئىكەنلىكىنى ھېس قىلغان بالا ، باشقىلارنىڭ ئۆزىنى قوبۇل قىلغانلىقىنى ھەتتا ئۆزىنى ياخشى كۆرىدىغانلارنىڭ ئەتراپىدىلا ئىكەنلىكىنى ھېس قىلىدۇ ۋە ئۆزىدە خاتىرجەملىك ،ئىشەنچ تۇيغۇسىنى تۇرغۇزىدۇ .
　　　5.  مۇھەببىتىڭىزنى تىل بىلەن ياكى ئويۇن بىلەنلا ئەمەس بەزىدە بەدەن تىلى بىلەن ئىپادىلەشنى ئادەتلەندۈرۈڭ . مېيىقىدا كۈلۈش ، دائىم كۈلۈمسىرەپ تۇرۇش، يېنىك ۋە يېقىملىق سىلاش ، بالىنى ئۇرۇپ ، تىللاپ ، سۆزلەپ ئۆتكۈزەلمىگەن گەپلىرىڭىزنى شۇھامان ئۆتكۈزىشىڭىزگە ئەسقاتىدۇ . ۋە بالىدا كىچىكىدىن خۇش –خۇي ، خۇشچاقچاق ، كۆتۈرەڭگۈ روھنى يېتىلدۈرىدۇ بۇ كىشلىك مۇناسىۋەتتىكى دەسلەپكى قەدىمىنى غەلبىلىك باسقانلىقىنى ئىپادىلەيدۇ .
　　　6.پات – پات مەكتىپىگە بېرىپ ،ئوقۇتقۇچىلىرى بىلەن كۆرۈشۈپ تۇرۇڭ . قايسى پەنلەردە نەتىجىسى تۆۋەن بولسا ، شۇ دەرسىنى ئۆتىدىغان ئوقۇتقۇچىسى بىلەن كۆپرەك ئالاقىلىشىپ تۇرۇڭ . بۇ بالىڭىزنىڭ شۇ دەرىسلەردە تىرىشىشىغا تۈرتكە بولىدۇ .
　　　7.بالىڭىزنىڭ دوستلىرى بىلەن تونۇشۇڭ ھەتتا ئۇلارنىڭ ئاتا- ئانىلىرى بىلەنمۇ كۆرۈشۈپ ئالاقىلىشىپ تۇرۇڭ . بۇ بالىڭىزنىڭ دەسلەپتە تۇتقان دوستلىرىنىڭ ئىشەنچىسىنى قولغا كەلتۈرۈشكە ۋە بالىڭىز بىلەن دوستلىرى ئوتتۇرىسىدىكى دوستلۇقنىڭ ساپ ۋە ئۇزۇن مۇددەت بولىشىغا تۈرتكە بولىدۇ .
　　　8.  بالىڭىزنى دوستلىرىغا ۋە ئەتراپتىكى ئۇرۇق – تۇققان ، قوشنا – قولۇملارغا ئوخشاتماڭ ۋە سېلىشتۇرماڭ . سېلىشتۇرۇش ئۇلارنى باشقىلاردىن تۆۋەن كۆرگەنلىكىڭىزنى ئىپادىلەپ قويىدۇ . ئوخشۇتۇش : ئەگەر سىز بالىڭىزنى مەيلى چىراي – شەكىل ، خۇي – پەيلى ، بوي – تۇرقى مەيلى نېمىلا بولسۇن بالىڭىز ياقتۇرمايدىغان بىرىگە ئوخشۇتۇپ قويسىڭىز بالىڭىز ئۆزلىگىدىن ئۆزىگە ئۆچ بولۇپ قالىدۇ . ئۆزىگە ئۆچ بولۇپ قېلىش بالىنىڭ ئۆزلىكىنى يوقۇتۇپ قويۇشنىڭ دەسلەپكى قەدىمى بولۇپ قالىدۇ .
　　　ئاتا- ئانىلارنىڭ قوللىشىغا ، چۈشىنىشىگە ئېرىشكەن بالا دائىم ئۆزىنى خاتىرجەم ، بېخەتەر، بەھوزۇر ھېس قىلىدۇ .
　　　
نىگاران　　　

نىگاران ، ماقالىڭىز ئەتراپلىق ياخشى يېزىلىپتۇ .
مەن ئۆزىنىڭ تەتقىقات نەتىجىسىكەن دەپ قارىدىم . توغرىمۇ ؟

شۇنداق دېسەممۇ بولىدۇ . بالىلار بىلەن بولغان ۋاقتىم بەك ئۇزۇن ، شۇڭا ئەمەلىيەتتىن يەكۈنلىگەنلىرىم .
بەلكىم كەمچىلىكلەرمۇ كۆپتۇ.