«قەشقەر ئەدىبلىرى» ناملىق كىتاب نەشردىن چىقتى [ئۇلانما كۆچۈرۈش]

يېقىندا، قەشقەر پېداگوگىكا ئىنستىتۇتى فىلولوگىيە فاكۇلتېتىنىڭ پىروفېسسورى، ماگىستىر ئاسپىرانت يېتەكچىسى، ئەدەبىيات تەتقىقاتچىسى، ئەدەبىي تەنقىدچى كېرىمجان ئابدۇرېھىمنىڭ (باش بولۇپ تۈزگەن) « قەشقەر ئەدىبلىرى » ناملىق كىتابى قەشقەر ئۇيغۇر نەشرىياتى تەرىپىدىن نەشر قىلىندى.

بۇ، ئاپتورنىڭ ئۇيغۇر ئەدەبىياتى تەتقىقاتىدىكى بىر قەدەر زور ھەجىملىك ۋە بىر قەدەر مۇكەممەل تەتقىقات نەتىجىسى بولۇپ، مەزكۇر كىتاب 32 فورمات، 505 بەت، 186 نەپەر يازغۇچى-شائىرنىڭ تەرجىمھالىدىن تەركىب تاپقان. ئۇنىڭدا يىراق قەدىمكى زامانلاردىن تاكى بۈگۈنگىچە بولغان ئۇزاق تارىخىي تەرەققىيات جەريانىدا، ھازىرقى قەشقەر ۋىلايىتىگە تەۋە ھەر قايسى جايلاردا ياشاپ، ئەدەبىي ئىجادىيەت بىلەن شۇغۇللىنىپ، گەۋدىلىك ئىجادىيەت مۇۋەپپەقىيەتلىرىگە ئېرىشكەن ۋە بەلگىلىك تەسىرگە ئىگە يازغۇچى-شائىرلارنىڭ ھاياتى ھەم ئەدەبىي ئىجادىيەت ئەھۋالىنى تونۇشتۇرۇش ئاساسلىق مەزمۇن قىلىنغان. مەزكۇر كىتابنىڭ نەشر قىلىنىشى كەڭ ئوقۇرمەنلەرنىڭ ئۇيغۇر ئەدەبىياتى تەتقىقاتىغا بولغان تونۇشىنى تېخىمۇ چوڭقۇرلاشتۇرۇش ۋە قەشقەرنىڭ ئەدەبىيات-سەنئەت ئىشلىرىنىڭ بۇنىڭدىن كېيىنكى تەرەققىياتىنى ئىلگىرى سۈرۈش، تەتقىق قىلىش قاتارلىق جەھەتلەردە ناھايىتى مۇھىم ئەھمىيەتكە ئىگە .