بۇ پوۋېستنى ئوقۇغانلار بارمۇ؟

ھۆرمەتلىك تورداشلار:
بۇنىڭدىن 15-16 يىل بۇرۇن «ئاقسۇ ئەدەبىياتى» ژۇرنىلىنىڭ بىر سانىنى ئوقۇغانىدىم، ئۇ چاغلاردا كىچىك بولغاچقا ژۇرنالنىڭ ئىچىدىكى ئەسەرلەرگە قىزىقىپ، ژۇرنالنىڭ قايسى يىلنىڭ نەچچىنچى سانى ئىكەنلىكىگە دىققەت قىلماپتىكەنمەن. شۇ ژۇرنالدا بىر پوۋېست بار بولۇپ، نەچچە يىلدىن بۇيان ئۇ پوۋېستنى ئىزدەشنى ئويلىغان بولساممۇ پوۋېست ئاپتورى بىلەن ماۋزۇسىنى پەقەت ئېسىمگە ئالالماي ئامال بولمىغانىدى. شۇڭا يازغۇچىلار مۇنبىرىدە ئاپتورلار ۋە ئوقۇرمەنلەر كۆپ بولغاچقا بىرەر ئۇچۇر چىقىپ قالار، دېگەن ئۈمىد بىلەن بۇ تېمىنى يوللىدىم.
پوۋېستنىڭ ئېسىمدە قالغان مەزمۇنى تۆۋەندىكىچە:
ناھىيە ئىچىدە ئولتۇرۇشلۇق زۇلپىقار ئىسىملىك بىر يىگىت بىلەن مەربىيە ئىسىملىك، يېزىلىق بىر قىز تولۇق ئوتتۇرا مەكتەپتە ئوقۇۋاتقان چېغىدا مۇھەببەتلىشىدۇ. ئالىي مەكتەپ ئىمتاھانىدا زۇلپىقار ئىمتاھاندىن ئۆتىدۇ. مەربىيە ئۆتەلمەيدۇ. ئۇلار ئايرىلىش ئالدىدا بىر قېتىم بىللە بولۇپ قالىدۇ. زۇلپىقار ئالىي مەكتەپكە كەتكەندىن كېيىن مەربىيەنىڭ قورسىقىدا قالغانلىقى ئاشكارىلىنىدۇ. دادىسى يۇرتىدا تۇرالماي ئۇنى ئېلىپ ئۈرۈمچىگە كېتىدۇ. مەربىيە ئۈرۈمچىدە قوشكېزەك ئوغۇل تۇغىدۇ. ئوغۇللىرىنىڭ ئىسمىنى زۇليار ۋە زۇلھار قويىدۇ. بىر مەزگىلدىن كېيىن ئۇلار ئۈرۈمچىدىن قايتىپ كېلىدۇ. مەربىيە يۇرتىغا كەلگەندىن كېيىن ئۇلارنىڭ تام قوشنىسىنىڭ ئوغلى مەربىيەگە تەلەپ قويىدۇ. مەربىيە رەت قىلىدۇ. ئەمما قوشنا بولغاچقا ئۇنىڭ بىلەن نورمال قوشنىدارچىلىق مۇناسىۋەتنى ساقلاپ قالىدۇ.
زۇلپىقار ئالىي مەكتەپنى پۈتتۈرگىچە تەتىل ۋاقتىدا مەربىيەنى ئىزدەپ تاپالمايدۇ. ئۇ ئالىي مەكتەپنى پۈتتۈرۈپ قايتىپ كەلگەندىن كېيىن بىر كۈنى مەربىيەنى ئىزدەپ يەنە ئۇنىڭ مەھەللىسىگە چىقىدۇ. دەل شۇ چاغدا مەربىيەگە تەلەپ قويغان قوشنىسى مەربىيەنىڭ تېمىنى ئوڭشاپ بىرىۋاتقان چاغ بولۇپ، زۇلپىقار يىراقتىن ئۇلارنىڭ پاراڭلاشقاچ بىللە ئىش قىلىۋاتقانلىقىنى ۋە ئۇلارنىڭ يېنىدا ئويناۋاتقان زۇليار بىلەن زۇلھارنى كۆرۈپ مەربىيە توي قىپتۇ، يېنىدىكى ئېرى ۋە بالىلىرىكەن، دەپ ئويلايدۇ. ئۇ مەربىيە بىلەن كۆرۈشمەي قايتىپ كېتىدۇ.
زۇلپىقار چوڭلار تونۇشتۇرغان باشقا بىر قىز بىلەن توي تەييارلىقىغا چۈشىدۇ. باغاقلار تارقىتىلىپ تويغا بىر نەچچە كۈن قالغاندا مەربىيەنىڭ بىر پارچە خېتى زۇلپىقارنىڭ قولىغا تېگىدۇ. زۇلپىقار ھەقىقىي ئەھۋالنى بىلىپ توينى توختاتماقچى بولىدۇ. بىراق زۇلىپقارنىڭ ئانىسى قەتئىي قوشۇلمايدۇ. زۇلپىقار توي قىلىدۇ. لېكىن تويدىن كېيىن ۋىجدان ئازابى ئۇنى يەتكۈچە قىينايدۇ. ئاخىرى توي قىلىپ ئىككى ئاي بولغاندا زۇلپىقار ئايالىغا مەربىيە بىلەن بولغان مۇناسىۋىتىنى باشتىن-ئاخىر تولۇق دەپ بېرىپ ئايالى بىلەن ئاجرىشىپ مەربىيە بىلەن توي قىلىدۇ...
شۇ چاغلاردا ئۆزۈم كىچىك بولغاچقا ھەم بۇ پوۋېست بار ژۇرنال باشقىلارنىڭ بولغاچقا قىسقا ۋاقىت ئىچىدىلا بۇ پوۋېستنى بىر قېتىملا ئوقۇشقا نېسىپ بولغان ئىدى. چوڭ بولغاندىن كېيىن بۇرۇن ئوقۇغان تالايلىغان ئەسەرلەرنى تېپىپ ساقلىدىم. ئەمما مۇشۇ بىر پارچە پوۋېست بار ژۇرنالنى قەتئىي تاپالمىدىم.
ئاخىرقى سۆزۈم شۇكى، بەلكىم بۇ پوۋېستنىڭ ئاپتورى بۇ مۇنبەردە بولىشى، ياكى بولمىسا بۇ پوۋېستنى ئوقۇغان ئوقۇرمەندىن بىرەرسى چىقىپ قېلىشى مۇمكىن. شۇڭا تورداشلارنىڭ ئىچىدە بۇ پوۋېستنىڭ مەنبەسىنى ياكى ئاپتورىنى بىلىدىغانلار بولسا ماڭا ياردەم قىلىشىنى چىن كۆڭلۈمدىن ئۈمىد قىلىمەن!

«كېچىكىپ تەگكەن خەت» دېگەن بىر پوۋېستنىڭ ۋەقەلىكىگە ئوخشاتتىما مەن. ئاپتورى ھەنىپە ئابدۇراخمان (تەخەللۇسى غايىبە) ئىدى. مەرھۇم ئەينى ۋاقىتتا ئۇچتۇرپان ناھىيەلىك مەدەنىيەت يۇرتىنىڭ كەسپىي ئىجادىيەتچىسى ئىدى. شۇ مەزگىللەردە بىر تۈركۈم پوۋېست، ھېكايىلىرى «ئاقسۇ ئەدەبىياتى» ژۇرنىلىدا ئۈزۈلمەي ئېلان قىلىنىپ، ئوقۇرمەنلەرنىڭ ياخشى باھاسىغا ئېرىشكەنىدى.

   ئۆز ۋاقتىدا ئالىمجان ئىسمائىلنىڭ «يىغلىما قىز» ناملىق پوۋېستى «تارىم» ژۇرنىلىدا ئىككى ساندا ئۇلاپ بېرىلگەنىدى. پوۋېستنىڭ باش تەرىپىنى ئوقۇپ بولۇپ ژۇرنالنى يوقىتىپ قويدۇم، داۋامىنى ئوقۇي دېسەم ئۇ چاغلاردا ھازىرقىدەك ئىمكانىيەت بولمىغاچقا ئوقۇيالمىغانىدىم. كېيىن تاسادىپىي ھالدا ژۇرنالنىڭ پوۋېستنىڭ داۋامى بار سانى ئۇچراپ قېلىپ شۇنچىلىك خۇش بولغانىدىم.
   ئابدۇراخمان قاھارنىڭ »كەچۈر مېنى نازاكەت» ناملىق پوۋېستلار توپلىمىنىڭ يېڭى چىققان نۇسخىسىنى سېتىۋېلىپ بالىلىقىمدا ئوقۇغان، ئەمما ئاپتورى ئېسىمدە قالمىغان ئىككى پارچە پوۋېستنىڭ ئابدۇراخمان قاھارنىڭ ئىكەنلىكىنى بىلىپ نەچچە يىل يوقىتىپ قويغان نەرسەمنى قايتا تېپىۋالغاندەك خۇش بولۇپ كەتكەنىدىم.
   بۇ قىممەتلىك ئۇچۇرىڭىزغا كۆپ رەھمەت، ئاكا.

مەن تىخى بىرەر مۇھىم ئىش سەۋەپلىك ئىزدەۋاتقان چىغى دەپتىمەن، بۇرۇنقى ئەسەر ئكەن ئوقۇماپتىكەنمەن شۇڭا بىلمەيدىكەنمەن.ئاللا شائىردەكلا قاپىيەلىك سۆزلىدىميا ئۇستۇنكى قەۋەتتىكى قىرىندىشىمىز نىڭ ئىيتقىنى توغرا بولوشى مۇمكىن شۇ بويىچە ئىزدەپ بىقىڭ.

مۇختەر ئاكا، شارائىتىڭىز يار بەرسە مۇشۇ پوۋېست بار ژۇرنالنى ئۆيىڭىزدىن ئىزدەپ باقالارسىزمۇ؟

ئەسەر نامى ئېنىق بولسا، قايسى ساندا بېرىلگەنلىكىنى ئېزىز ئاتاۋۇللا سارتېكىن تۈزگەن كاتىلوگدىن تاپالايسىز! بۇ يازمىنى ئاخىرىدا   ئەلدەربەگ تەھرىرلىگەن. ۋاقتى  2015-7-16 20:29  

ئەسەر نامى ۋە ژۇرنالنىڭ شۇ پوۋېست بار سانىنى بىلمىگەچكە بۇ تېمىنى يوللىدىم!

بۇ تىمىدىن ئۇ پوۋسىتنىڭ ياخشى يېزىلغان پوۋسىت ئىكەنلىكى چىقىپ تۇرۇپتۇ، بولسا شۇ پوۋسىتنى مۇنبەرگە يوللاپ قويۇڭلار، ئوقۇپ باقايلى.


ئاۋۇ ئاداشنىڭ خېلى ۋىجدانى باركەن، ئاجرىشىپ بولسىمۇ توي قىلىپ ئىككى بالىسىنى بېقىپتۇ.

   مەن ئوقۇرمەنلىك ھاياتىمدا تالاي ئەسەرلەرنى ئوقۇدۇم. بۇلارنىڭ ئىچىدىن نەچچىسى ئوقۇپ بولۇپ ئورنۇمدىن تۇرغۇچە ئۇنتۇلدى. نەچچىسى يىللارنىڭ ئۆتۈشى بىلەن ئۇنتۇلدى. يەنە نەچچىسى بولسا يۈرىكىمدىن ماكانلاشتى.
   مەن تىلغا ئالغان پوۋېست بولسا نەچچە يىللاردىن بۇيان يۈرىكىمنى ئۆرتەپ كەلمەكتە. مەن شۇ پوۋېستنى تاپسام قانچىلىك خۇش بولۇشۇمنى تەسەۋۋۇر قىلالمايمەن. ئەگەر شۇ پوۋېستنى قولۇمغا ئالالىساملا شۇ ھامان ئۇنى ئىشتىياقىم بىلەن ئەڭ سۈپەتلىك، ئىملاسى ئەڭ توغرا ۋە بەت ياسىلىشى ئەڭ ئۆلچەملىك ھالەتتە تەييارلاپ مۇنبەرگە يوللايمەن!

ئەركىزاتقا: ماقۇل، بۇندىن كىيىن ئىنكاس يوللىغاندا دىققەت قىلاي.

ژورنالنى تاپقىلى بولمىغان تەقدىردىمۇ شۇ پوۋېستنىڭ نامى بىلەن ئاتالغان بىرەر توپلام بارمۇ تېخى.

چوقۇم ژورنالنى تېپىش زۆرۈر بولسا تەھرىر بۆلۈمى بىلەن ئالاقىلاشسا ياكى كۈتۈپخانىلار ئارقىلىق ئىزدىسىمۇ تاپقىلى بولىدۇ.

شۇ سان «ئاقسۇ ئەدەبىياتى»نى ساقلىدىممۇ-يوق؟ تېپىشقا ئىزدىنىپ كۆرەي!

كېچىكىپ  تەككەن خەت ...بۇ ئېنبق بولسا ئۇدۇللا تەھرىر بۆلۈمى بىلەن ئالاقىلىشىڭ..تاپاكايسىز.