ئاينۇرى:بۈگۈن ۋە تۈنۈگۈن [ئۇلانما كۆچۈرۈش]

ئۇيغۇرنىسا

سەۋدالىق ئەيلىسە جېنىمنى پايخان

تۇرنىسا رەھىم



ھەسرىتىم ئېچىلغان باغدا غۇنچىلاپ ،
ئازابتىن چاچ تاراپ ئولتۇرار بىر خان.
مىڭ پارە تىلىندى مەسۇم يۈرىكىم،
سەۋدالىق ئەيلىگەچ جېنىمنى پايخان...



ئۇنتۇلدى لەۋلىرىم كۈلۈشنى شۇدەم،
قىل كەبى تولغىنار سۆيگۈ ئەقىدەم.
ئۇيقۇسىز ئاتتىغۇ تالاي كېچىلەر،
چوغلانغان سۈبھىنىڭ كىرپىكىدە نەم.



گىرىمسەن ئۇپۇقتا يىگانە قۇياش،
نۇرىنى سېپەلمەس غەمكىن دىلىمغا.
كۆڭۈلنىڭ بەرگىدە شەبنەم تامچىسى،
يۇلتۇزدەك سىرغىيدۇ ماڭار يولۇمغا.



دەردلىرىم كۆكلەيدۇ شۇنچە خىرامان،
ئۆمۈچۈك تور تارتقان خىياللىرىمدا.
يۈرىكىڭ تاشلاردىن ئالغانمۇ ئەندىز؟
چىن سۆيگۈ ئۆكسۈيدۇ ئارمانلىرىمدا.



يۈرەكنىڭ چېقىلغان روجەكلىرىدىن،
باقساممەن ئىككىمىز ماڭغان يوللارغا.
ياپ- يېشىل چىغىر يول قاپتۇ مۇڭلىنىپ
بىر دەستە ھىجران گۈل ئۆسۈپ بويىغا.

ئۇنتۇلغان ناخشا

تۇرنىسا رەھىم

ئارمانلارغا بۆلەنگەن كېچە

تۇرنىسا رەھىم




قەلبىمنىڭ بىغۇبار، سەبى بېتىگە،
يازغانتىم ئىسمىڭنى بەكمۇ ئاۋايلاپ.
لەۋلىرىم پىچىرلاپ ئوقۇيتى كۈندە،
لەزەتلىك تۇيغۇدا ئاستا ۋاراقلاپ.

كۈتەتتىم ھەر كۈنى كونا دوقمۇشتا،
بولۇپمەن ۋىسالغا چەكسىز بىتاقەت.
رازىدىم تۇمۇزدا كۆيسە يۈزلىرىم،
ۋە ياكى زىمىستان سالسا مۇشاقەت.

كۈتۈشلەر شېخىدا ئۈشۈدى ئارمان،
يۈرىكىڭ سۇنغاندا ئازابتىن قەترە.
قىيانلىق كۆز يېشىم ئاقتى كوچاڭدا،
جۇدالىق ئوتىنى سالغان سەھەردە.

ئازابلار ئىچىدە يۈردۈم ئېسەدەپ،
ھىجراننىڭ خەنجىرى باغرىمنى تىلدى.
قەلبىمدە تۇنجى رەت يانغان مۇھەببەت ،
ئۇ شۇنداق تاغ پېتى يۈرەكتە قالدى.