تەبەسسۇم غەزەللىرى [ئۇلانما كۆچۈرۈش]

ئەسسالامۇ ئەلەيكۇم ھۆرمەتلىك تورداشلار! يازغۇچىلار جەمئىيىتىنىڭ كونا مۇنبىرىدىكى بىر قىسىم يازمىلىرىمنى ساقلىۋېلىش ئېھتىياجى بىلەن مەزكۇر مۇنبەرگە توپلام شەكلىدە يوللىدىم. كۆپىچىلىكنىڭ كۆزدىن كەچۈرىشىنى ۋە تەكلىپ پىكىر، تەنقىدى

پىكىر بىرىشىنى قارشى ئالىمەن.

(نۆۋەتتىكىسى غەزەللىرىم)

ئەسلى ئادرىسى: http://new.xjzjxh.com/Topic.aspx?BoardID=60&TopicID=8743

مۇۋەششەھ

ئايشەم ئىسمايىل تەبەسسۇم

1

خويمۇ ئۇز يۇرتۇم ئۆزۈڭ، جەننەت مىسال گۈلزارىسەن ،
ئەل-ئاۋام باغرىڭدا شاد، قايناق ھايات ياشنارىسەن .
ئوخشىغاي رەستە-كوچاڭ نازلىق جۇۋانلار ھۆسنىگە ،
سەيلىگە كەلگۈچى قانماي نەچچە كۈن توختارىسەن .
تەڭدىشىڭ بولغايمۇ شانۇ-شەۋكىتىڭ، سۈلكەتتە ھەم ،
ھېچ زىمىندا بولمىغان كاتتا گۆھەرلەر بارى، سەن .
ئەتلىسىڭ، زىلچاڭنى دەيمۇ؟ توقۇغان ئىشچاننىمۇ ؟
پاھ ، ھۈنەر-سەنئەتلىرىڭ دىل مەيلىنى تارتارىسەن .
نەقىشى كۆڭلۈمگە ھىممەت، بەركىتىڭ، ئىھسانلىرىڭ ،
بۇ ئەمەس شىرىن-سۇخەنلىك، بەلكى چىن ئىزھارىسەن .

2

غېمىمنى ئىلكىگە ئالغان سېنىڭدەك دىلكىشىم يوقتۇر .
ئەرز-دادىمنى ئاڭلاشقا يەنە بىر مۇڭدىشىم يوقتۇر .
ئەجەم چالغان مۇغەننىنىڭ پىداكار مۇخلىسى يەڭلىغ ،
مېنىڭ كۆڭلۈمنى بىلمەككە سېنىڭدەك ئۈلپىتىم يوقتۇر .
زەرەر يەتكەندە دىلخانەم سىنى چىللايدۇ ھال ئېيتىپ ،
يىغامغا يىغلىدىڭ بىللە، بۆلەك بىر سىردىشىم يوقتۇر .
ئەجىر-مېھنەت رىسالەمدە بۈيۈك مەزمۇن بىلىپ كەلدىم ،
سېنىڭ بىرلە ئاشار قەدرىم، يەنە يول ئىزدىشىم يوقتۇر .
لەئەل-دۇردانىدىن كاتتا ياراشقۇم سەن، باھايىمسەن ،
سالاپەت بابىدا سەندىن ئەزىزراق سۈلكىتىم يوقتۇر .

3

خان ساناپ يۈردۈم ئۆزۈمنى، تەختىگاھىم سەن مىنىڭ ،
گەر ۋىسال قۇچماققا كەلسەم چارىباغىم سەن مىنىڭ .
ئوت دېسەم سۆيگۈڭنى، دىلدا يالقۇنى باردۇر پەۋەس ،
جان بىرىپ يەتكەن كەبى ئۇز جانىجانىم سەن مىنىڭ .
توتىيادۇر تۇپرىقىڭ باغرىڭغا تەشنالەر ئۈچۈن ،
شۈكرىكىم ،باغرىڭدىمەن، سۇلماس باھارىم سەن، مىنىڭ .
ئەۋزىلى شۇ-جان ئاناڭ بولسا يۆلەك مەغرۇر بېشىڭ ،
كەتتىلەر ئۇ مىھرىبانىم ،پاسىبانىم سەن مىنىڭ .
ناخشا ياڭراتقۇم كىلەر شەنىڭگە مىڭ داستان پۈتۈپ ،
نەغمىدە مۇڭلۇق ساتار ، ئوتلۇق مۇقامىم سەن مىنىڭ .

جېنىم بالىخان

(چاتما نەزملەر)

ئايشەم ئىسمايىل تەبەسسۇم

(1)
باغدا گۈل،سايرايدۇ بۇلبۇل ،مەن غېرىپ كەلدىم بۇيان،
ئەسلىمەمدە بار ئىدى شۇ جايدا كۆرگەن جانىجان .

جانىجاننى دەپ بۈگۈن كەلدىم بۇ يانە مۇڭلىنىپ ،
ئۆزى يوق ھەم سۆزى يوق،ئەپسانىلەرگە چىللىنىپ .

نىمە دەي، ئۇ بىخەۋەر،دەردىم تۇلادۇر،تۆكمىدىم،
بۇ ئىشق كوچىسى تۇنجى رەت ماڭا،كۆپ ئۆتمىدىم.

ئاھ...ئەنە شۇ گۈل تۈۋى ،مەن يارنى كۆرگەن جاي ئۆزى،
ھېلىمۇ كۆز ئالدىمدا باردۇر ئاي يۈزى، شەھلا كۆزى.

مانا،كەپسىز يۈرىكىمگە بولدى قوش بايرام شۇ تاپ،
ۋە لىكىن يار بولمىغاچ چەكتىم پىراق،كۆپ ئىزتىراپ.

شۇ كۈنى... ھەي شۇ كۈنى...ھىسلار چىچەككە ئايلىنىپ ،
تىپتىنچ كۆلدەك يۈرەكنى چايقىدى تاش تاشلىنىپ .

(2)
<<چىنە چاققان يالىرىم،ۋەدىسى يالغان بىۋااپا>>،
بىۋاپا ئوتقا سېلىپ سۆيمەي ئەجەپ قىلدى جاپا .

بىر كۆرۈپ ئارماندا قالغان بالىخاندىن يوق سادا،
ئەي پەلەك مۇنداق ئىشقنى نەسەپ سەۋەپ سالدىڭ ماڭا؟!

جان دىگەيمەن، ۋەسلىگە يەتسەممۇ مەيلى جان بىرىپ ،
نە بۇلۇر بۇ جان ماڭا سۆيگەن جاناندىن ئايرىلىپ .

يەنە بارغايمەن شۇگۈلنىڭ تۈۋىدىن ئىزلەپ نىشان ،
ئارمىنى بولدى نىسىپ،ۋەسلى نىسىپ بولغاي قاچان؟!...

مەن خىيال دۇنياسىنى كەزسەم يېنىمدا بار ئۆزى ،
ياڭرىغاي دائىم قۇلاغىمدا شىرىن، بالدەك سۆزى...

(3)

بالىخان، بالدەك سۆزۈڭگە مەھلىيا ئەيلەپ مىنى ،
باغرىمە خۇمدانە ئەتتىڭ ،بىلمىدىم ئىشقىڭ سىرى.

بىر كۆرۈپ كۆيدى دىگەننى ئاڭلىغان، كۆرمەپ ئىدىم ،
بۇ سىياق مەجنۇن بۇلارنى بىلمىدىم، ياق، بىلمىدىم .

بالىخان ،ئال بۇ ئوتۇڭنى يا مىنى ئۆلتۈر كىلىپ ،
قىينىما جاننى يەنە ئىشقىڭدا باغرىمنى تىلىپ .

بىلمىدىم نەلەردە سەن؟كىمنىڭ نىگارى، سۆيگىنى ؟
بارمىدۇ ئالەم ئارا مەندەك ساڭا چىن كۆيگىنى...

نىمىدۇر ئاتىڭ؟يەنە قايسى زىمىننىڭ ئەركىسى؟
قايسى باغنىڭ گۈلىسەن؟قايسى تۇرانىڭ سەركىسى؟

شۇ خىياللار ئىلكىدە ئۆتتى تالاي ئاي-يىللىرىم ،
توزىدى ئۈمۈد بوسۇغامدا يەنە كۆپ گۈللىرىم.

بۇ پەلەك دىشۋارىدىن ھەيرانىمەن،بىچارىمەن ،
بىر پىيالە مەي ئۈچۈن جاننى تىكەر ئاۋارىمەن...

(4)
جان كىتەر ئاللا ئىگەم دەرگاھىغا،بىز كەتكۈچى،
يار كىتەر خالار يىرىگە، ئۇ مۇرادقا يەتكۈچى .

بىز قالۇرمىز ئىشقىدا جاننى ئىكەكلەپ ھار زامان ،
كۈتكىنىم ئارماندا بار،يانىمدا يوق بىر جانىجان .

دەرىخا! ئالەمدە يوقنى كۈتكىنىم راستكەن دىدىم ،
بۇ پىراق چۆلىدە تەنھا قالمىقىمنى بىلمىدىم.

بالىخان ،جېنىم بالىخان، بول ئامان ھەر جايدا سەن،
مەن سىنى يادىمدا ساقلايمەن چۇقۇم جانىم بىلەن.

<< چىنە چاققان يالىرىم،ۋەدىسى يالغان بىۋاپا >>،
مەن ئەمەس يىغلاڭغۇدىن ،يار ئىشقىدا بىر بىناۋا....


2011-يىلى 10-ئاينىڭ 1-كۈنى (ئۇدۇن دىيارى)

غەزەلى دەرد

تەبەسسۇم

گۈل دىسەم،روخسارى گۈللەر كۆپ جاپا سالدى ماڭا ،
سۆيگۈ سۇنسام قەدرىنى بىلمەي ئەجەپ چاندى، ماڭا .

ئۆستۈرۈپ بېغىمدا پەرۋىش ئەيلىگەن باغۋەن ئىدىم ،
تەقدىرىم شورلۇق شىۋاقنى مەجبۇرىي تاڭدى ماڭا .

باشقا گۈل قىسقاننى كۆردۈم، كۈلكىسى ئاندىن شىرىن ،
كۈلكىگە يەتمەكنى كۈتسەم مۇسىبەت ياندى ماڭا .

چىن ۋاپا مەنزىلىدە تەنھا يۈرۈپ قان يىغلىدىم،
پۈتمىشىم ئەندازىنى دىۋانىدىن ئالدى، ماڭا .

مەن نىچۈن بۇ ھالدىدۇرمەن؟نە سەۋەپ قىسمەت ئوسال؟
جان بىرىپ كۈتكەنلىرىم ئاھ باقمايىن تاندى، ماڭا .

ئاھ دىسەم ئالەم كۆيەدۇر، بىنەزەر يار نەدىدۇر؟
يۈرۈكۈم ھىجران يېشىغا بەھوزۇر قاندى، ماڭا .

ئەي تەبەسسۇم يىغلىۋال ، ھىجران گۈلۈڭنى ياشنىتىپ ،
بۇ ئۆمۈر ئەنۋارىدىن شۇ نەمۇنە قالدى ماڭا.

2011-يىلى 9-ئاينىڭ 18 -كۈنى(خوتەن)

كۆڭۈل تارتىپ

ئايشەم ئىسمايىل تەبەسسۇم

ئۇيغۇر قىزى

ئايشەم ئىسمايىل تەبەسسۇم

ئاي كەبى قىزنىڭ يۈزىدە دانە خال ،
شۇ سىياقى ئاي كەبى ساھىپجامال .

ئايغا ئەندازمۇ ئۆزى دەپ ئويلىسام،
نەچچە ئايمۇ تەڭ كىلەلمەس ئىھتىمال .

بىر تەبەسسۇم ئەيلىدى- كۈلدى قۇياش ،
ھەممىنى ھەيرانە قىلدى ئۇشبۇ ھال .

قاپقارا قۇندۇزلىرىدىن ئۆرگىلەي ،
ئوينىتار ساچىنى لەرزان شوخ شامال .

كۆزلىرى بۇلاق دىسەم لاپ گەپ ئەمەس ،
ئەيمىنىپ قاراشمۇ تەستۇر بىمالال .

بىر بېقىپ ئالدى كۆڭۈلنىڭ رايىنى ،
قاپقارا كىرپىكلىرى ئۇز تالۇ-تال .

غۇنچە بوي زىلۋا گۈزەل گۈلنىڭ ئۆزى ،
لەۋلەرى گىلاس كەبى ،سۆزلەرى بال .

سۆزلىدى ئۇيغۇرچە تاتلىق تىل بىلەن ،
تۇغقىچە كۆڭلۈم‹‹بۇ كىم؟ ›› دەپ بىر سۇئال...

بىر غەزەل

ئايشەم ئىسمايىل تەبەسسۇم

تاڭدا كۆرسەڭ گۈل دىگىن، شەبنەم تۆكەرمەن مۇڭلىنىپ ،
رەڭلىنىپ تۇرغان بىلەن ئاچچىق كۈلەرمەن مۇڭلىنىپ .

بۇ ئىشق سەۋدالىرى باشىمدا تۈگمەن چۆرىدى ،
ئىستەبان يار ۋەسلىنى يىغلاپ يۈرەرمەن مۇڭلىنىپ .

قايدا دەپ ئول بىۋاپانىڭ ئىزلىرى چۈشكەن بىنەم ،
تۇتىيا دەپ ھەن تاۋاپ ئەيلەپ كىلەرمەن مۇڭلىنىپ .

ئاي دىمە ئاسماندا كۆرسەڭ،داغلىرىم ئۇندىن بەتەر ،
يار پىراقى ئۆرتىگەي، پىنھان كۆيەرمەن مۇڭلىنىپ .

ئاھلىرىمدىن ئوت چېچىپ ئالەمنى ۋەيران ئەيلىدىم ،
دەشتى ھىجران چۆلىدە يالغۇز يۈرەرمەن مۇڭلىنىپ .

ئول نىگارنىڭ ۋەسلىدىن ئىمكان ئىجازەت بولمىسا ،
باش ئىگىپ قىسمەتكە ئاھ، تەنھا ئۆتەرمەن مۇڭلىنىپ .

بىر بالا كەلدى نىتەي ئىشقتىن تەبەسسۇم جانىگە ،
ئارمىنىم يىغلاپ قالۇر داغدا كىتەرمەن مۇڭلىنىپ .

2011-يىلى 26-ئىيۇل (خوتەن)

يالغۇز

ئايشەم ئىسمايىل تەبەسسۇم

دىلىم ياردىن سۇ ئىچمەيدۇ، زىمىستانغا كىتەي يالغۇز ،
غېرىپ ناخشام بىلەن تۈننى يەنە ئەيللەيلىتەي يالغۇز .

زىمىن تىترەيدۇ ئاھىمدا، بۇلۇت يىغلايدۇ زارىمدا ،
پىغانلىق دەردۇ-ياشىمدا دىلىمنى قان ئىتەي يالغۇز .

قەمەرنىڭ باغرىنى ئەزدىم، ئەقىل پەيكانىدىن تەزدىم ،
چېلىپ مۇڭلۇق ساتارىمنى ئىشق دەشتى كىزەي يالغۇز .

مېنى ھىجرانغا قۇل ئەتتى، تىغى جانغا بېرىپ يەتتى ،
ئەجەل بەرسە قۇچاغىدا مۇرادىمغا يىتەي، يالغۇز .

تەبەسسۇم دەيدۇ ئاتىمنى، ئۇنۇتماڭلار ھاياتىمنى !
نىسىپ قىلسا نىگارىمنى ئۇ ئالەمدە سۆيەي يالغۇز . . .

2011-يىلى 13-ئىيۇن(خوتەن)

كەلدىم

ئايشەم ئىسمايىل تەبەسسۇم

كۆزۈڭگە بىر بېقىپ مەستخۇش بۇلۇپ مەيخانىدىن كەلدىم،
قاراقىڭدىن ئېتىلغاچ ئوق ئىشىق دەۋرانىدىن كەلدىم .

ۋىسال خىيالىدىن كۆڭلۈم گۈلىستانلىققا يول ئالدى ،
شەپەق كۈلگەن سەھەرلەردە ۋاپا خەندانىدىن كەلدىم.

قۇياشنىڭ باغرى قان بولسۇن لىۋەن كۈلكەيۇ-خۇلقىڭدىن ،
سىنى ئاتەش دىسەم يارىم ئۆزۈم پەرۋانىدىن، كەلدىم .

قاچانكى مۇپتىلا بولدۇم پىراقىڭ ئۆرتىدى تىنماي ،
يۈرەرمەن دەشتى ھىجراندا غېرىپ سەرسانىدىن كەلدىم .

غەزەپلەنمە كېچە ناخشام بۇزۇپ سالسا ئارامىڭنى ،
تىلەپ سۆيگۈ قوشاق قاتقان ساياق دىۋانىدىن كەلدىم .

رەھىم ئەيلەپ بۇ ھالىمغا ئاچارسەنمۇ ئىشىكىڭنى ،
سىنىڭسىز ئەپتىدىن مۇزلار تۆكۈلگەن خانىدىن كەلدىم .

مەگەر ۋەسلىڭگە يەتكۈزمەي مىنى ھىجرانغا قۇل ئەتسەڭ ،
تاپار بۇ جان ئارامىنى ئەجەل پەرمانىدىن، كەلدىم .

2011.7.4 (خوتەن)

قارا كۆز

ئايشەم ئىسمايىل تەبەسسۇم

بېغىڭىز سەھرادىكەن بارسام بولامدۇ قارا كۆز ؟
سۇنسىڭىز ئالما،ئانار ئالسام بولامدۇ قارا كۆز ؟

بىر بېسىپ ئىككى بېسىپ،باغقا كىرىپ سىزنى تېپىپ،
مۇھەببەت شارابىغا قانسام بۇلامدۇ قارا كۆز ؟

كۆيمىگەن كۆڭۈل ئەمەس ،تەشنا يۈرەكتە چوغ پەۋەس ،
ئىشقىڭىزدا ئوت بولۇپ يانسام بولامدۇ قارا كۆز ؟

بىللە بارايلى بەزمىگە،نەغمە قېتىلسۇن نەغمىگە ،
چىن ۋىسالنىڭ سازىنى چالسام بولامدۇ قارا كۆز ؟

كۆڭلۈمدە شۇنداق بىر تېلەك،ماڭا پەقەتلا سىز كېرەك ،
مەڭگۈلۈك ھەمرا قىلىپ ئالسام بولامدۇ قارا كۆز ؟

يالغۇزۇم بىر گۈلمۇسىز ؟ گۈل تۇتۇپ كىلۇرمۇسىز ؟
يېنىڭىزدا بىر ئۆمۈر قالسام بولامدۇ قارا كۆز ؟

يۇرتۇم خوتەنگە كەلسىڭىز

   
ئايشەم ئىسمايىل تەبەسسۇم

سىزگە دوستۇم سالمىساق بولماس پايانداز كەلسىڭىز،
<<مەرھابا>>دەپ چىھرى ئۇز گۈل-ئايغا ئەنداز كەلسىڭىز.   

يۇرتىمىز خوتەن گۇيا جەننەت مىسال بىر باغ ئىرۇر،
ھۆسنى يەتتى ۋايىغا كەلگەچ گۈزەل ياز كەلسىڭىز.   

خەلقى مېھماندوست خوتەننىڭ باشلىغاي دىل تۆرىگە،
كۆرمىگەيسىز پەيلىدىن زەررە كىبىر-ناز كەلسىڭىز.   

زەپ ئىسىل مەشرەپ ساماسى ئۈزگىلى بولماس كۆڭۈل،
شەنىڭىزگە ياڭرىتارمىز كۈي-مۇقام-ساز كەلسىڭىز.   

قوي سويۇپ توي-تويلىغاچ قارشى ئېلىپ ھۆرمەت بىلەن،
نەچچە قات سالماقچىمىز مامۇق يەكەنداز كەلسىڭىز.   

<<نەكى بۇ>>دەپ قالىسىز ھەيرەتتە بۇ لاپ گەپ ئەمەس،
شانۇ-شەۋكەتتە خوتەن يىگانە تەنناز ،كەلسىڭىز.   

ئۆم-ئىناقلىق بەھرىدە ھەممە ياشايدۇ بەختىيار،
تېخى كۆلدە شادىمان ئۆردەك بىلەن غاز ،كەلسىڭىز.   

تنچ -ئاسايىش دەۋرىدە گۈللەندى يۇرتۇم جانلىنىپ،
قىلدى مەمنۇنلۇق شۇڭا دىللادا پەرۋاز،كەلسىڭىز.   

كىرىيە،گۇما،قاراقاش،چىرا،لوپ،نىيە،خوتەن،
سەيلىگە ماستۇر ئەزەلدىن ياخشى ھەمراز كەلسىڭىز.   

بىر كىلىپ دوستۇم چۇقۇم ئويناپ كۈلۈپ يايراپ كىتىڭ،
چىن قەلىپ ئىزھارى بۇ،يوق قىلچە پەرداز .كەلسىڭىز.   

ماختىدى دەيسىز چۇقۇم،راست يازغىنىم غەزەل،بىراق،
پۈتكىچە داستاننى قانچە كۈيلىسەم ئاز ،كەلسىڭىز.   

كۆپ يېزىپ كەتتىم،لىكىن يۇرتۇمنى كۈيلەپ ھارمىدىم،
توختىماي چاپتى قەلەم،مەن بىر چەۋەنداز،كەلسىڭىز...   

كىنايىدىن ئىككى غەزەل

ئايشەم ئىسمايىل تەبەسسۇم

ئويناڭ

زامانەم كەڭ دېڭىز ئەرمىش،قېنى،كىتتەك ئۈزۈپ ئويناڭ ،
شاراپ سەيناسىغا سەپراس بۇلۇپ سورۇن تۈزۈپ ئويناڭ .

<<ھاياتنىڭ نۆۋىتى بىررەت،پاراغەتتە ياشاي>> دەپسىز،
چاۋاك ئوغلان،چوقۇم دەھشەت ھوزۇر پەيزى سۈرۈپ ئويناڭ .

<<نىمە نەپ بەردىڭىز ئەلگە؟>> دىسە << ۋايتاڭ >>دىگەن سىزغۇ ؟
بىراق نەپ تەكتىدىن كاتتا گۆھەر-مارجان سۈزۈپ ئويناڭ .

ئۆمۈر بىھۇدە ئۆتمەكتە ، قېرىيسىز تاڭلا ئاز كۇندە ،
بېسىپ ئۆتكەن قەدەملەر ھەم كالىندارنى كۆرۈپ ئويناڭ .

ئويۇن ئەسقاتتى دەپ كىمگە قۇلاق ئاڭلاپ ، كۆرۈپتۇ كۆز ؟
ئارا غەپلەت خورەك تارتماي ، ئەقىل بىرلە يۈرۈپ ئويناڭ .

كۈلەرسىز ئىھتىمال سۇسلا ، ياراتماي ئۇشبۇ سۆزلەرگە ،
پۇشايمان پەنجىسى ئەزگەندىمۇ ئايھاي ...كۈلۈپ ئويناڭ .

زابوي ، لۈكچەك ، بىكارچى دەپ قالار نامە ئەمەلىڭىز ،
ئاۋام قەلبىدىكى تۆردىن ئۈمۈدلەرنى ئۈزۈپ ئويناڭ .

ساقلىسۇن

يار مىنى كۆرمەكچىمىش ، دەڭلار بېغىمدا ساقلىسۇن ،
ئاشمىقى تەسمىش داۋان ، ھىجران تېغىمدا ساقلىسۇن .

<<مەن بارالمايمەن ئۆزى كەلسۇن>> دىگەنمىش ئاڭلىدىم ،
ئەندىكىپ كەتتىم چۆچۈپ ھەيرانلىقىمدا ساقلىسۇن .

ھالىنى چوڭ قىلغۇچە كەلمەمدۇ ناخشا توۋلىغاچ ،
مەن كۈتۈپ تۇرماسمىدىم بوستانلىقىمدا ، ساقلىسۇن .

<<كەلمىسە مەيلى، ماڭا ئازمۇ نىگار>> دەيمىش تېخى ،
بىلمىسە گۈل قەدرىنى ئازغانلىقىمدا ساقلىسۇن .

قىلمىسا بۇنچە كۆرەڭلىك بارمىقىمغۇ تەس ئەمەس ،
قىلغىلى ئىش يوق بىكار قالغان چېغىمدا ساقلىسۇن .