ئاينۇرى:ھاياجان تىنىقلىرى [ئۇلانما كۆچۈرۈش]

سۈبھىنىڭ قىزارغان چوغدەك لېۋىگە،
زەر قۇياش سۆيگەندە ئوتلۇق لېۋىدە.
ھاياجان ئىچىدە توزىدى ھىجران،
جۆر بولۇپ سەھەرنىڭ ئويغاق كۈيىگە.

قىزارغان بۇلۇتلار كېتىشتى ئۇزاپ،
شامالغا ئولتۇرۇپ شۇنداق خىرامان.
ھاياتلىق بېغىدا بۇلبۇل خۇش ناۋا ،
كۆڭۈللەر شېخىدا ئېچىلدى ئارمان...

يۈرەكتىن يۈرەككە ئاقار دولقۇنلاپ،
سۆيگۈدىن باشلانغان بىر ئەزىم دەريا.
زۇمرەتتەك چەشمىدىن ياشاردى قايتا،
ئازابلار ئىلكىدە قاخشىغان دۇنيا.

باھارىم كېلىدۇ چېچەكلەپ ئەتە،
بەختنىڭ ئىشىكى ئېچىلدى ئۇلۇغ.
ئاي نۇرى يۇيىدۇ زېمىننى نۇردا،
كېچىمۇ كۈندۈزدەك بولىدۇ نۇرلۇق.

بىۋاپا يىللارنىڭ ھەر بىر كۈنىدە،
ۋاپادار ياشايمىز بولۇشۇپ قوشماق.
سەن بولساڭ چوغلۇقتەك ئېچىلغان بىر گۈل،
مەن بولۇپ شېخىڭدا يېشىل يوپۇرماق.

2012-يىلى 29-مارت