ئالاھىدىن ئابدۇرېشىت: ئۇيغۇر شارىدا... [ئۇلانما كۆچۈرۈش]

ئۇيغۇر شارىدا...

ئالاھىدىن ئابدۇرېشىت

         كەل ساتارىم، لەھزە تەننىڭ دارىدا مەرغۇللىناي،
       بوزلىسۇن تەمبۇر، بۇ جاننىڭ زارىدا مەرغۇللىناي.
            ئۆتتى بىر ئاخشام يېنىمدىن سىردىشىپ دۇتار بىلەن،
      مۇڭىدىن تاش تىترىگەن زىلتارىدا مەرغۇللىناي.
      كېتىمەن ئەپسانىگە، يولدا ساپايەم يىغلىسۇن،
كوھىقاپلار دەھشىتى-دىشۋارىدا مەرغۇللىناي.
           كۆرمىگەي كۈننىڭ كۆزى، قايدا تولۇن ئاسمان ماڭا؟
  قاپقاراڭغۇ ئۆتكۈلەرنىڭ غارىدا مەرغۇللىناي.
               سۇ بولۇپ كەل، مەيلى ئوت قىسمەتلىرىمنىڭ بارىسەن،
  ئاشىقى سەرگەشتىلىك ئىزھارىدا مەرغۇللىناي.
               «ئاھ ئۇرارمەن، ئاھ ئۇرارمەن، ئاھلىرىم دەرياچە بار»،
  ھۆكىرەپ دولقۇنلىرىمنىڭ بارىدا مەرغۇللىناي.
           خەيرىيەت، ئۆلسەم ئۆزۈمنىڭ باغرىغا لىق كېلىمەن،
    ئۆلمىسەم، بىر پەدە ئۇيغۇر شارىدا مەرغۇللىناي!