يۈرەكتىكى ئارمانلار [ئۇلانما كۆچۈرۈش]

كونا مۇنبەردىن يېڭى مۇنبەرگە

ئۆز تىلىمنى قاناتتىم چىشلەپ


گۈل بېغىڭغا سالىمەن قۇلاق،

كاككۇك يىغلار، يىغلايدۇ گۈللەر.

ناتونۇشتۇر سەندىن باشقىسى،

دەرد ئىچىدە يىغلايدۇ كۆزلەر.



ئۆز تىلىمنى قاناتتىم چىشلەپ،

ئۆلۈم ھىدى تەرەپ-تەرەپتە.

كۆزلىرىمدە دەريا ئاقىدۇ،

تولۇپ كەتكەن  غەزەپ-نەپرەتكە.



تەشنا قەلبىم شىرىن دەملەرگە،

يىغلار ئۆكسۈپ ، يىغلار بۇقۇلداپ.

ھەسرەتلىرىم مۇجار يۈرەكنى،

ئازابلىرىم باغرىمنى غاجاپ.



ئۆرۈم-ئۆرۈم چاچلىرىڭ دادۇر،

ئۆرۈم-ئۆرۈم چاچلار سىرتماق.

قاناتلىرى قايرىلغان شادلىق،

ئىگىسىنى ئىزدەيدۇ ھەر ۋاق.



ھەر تال چېچىڭ بىر ئەزىم دەريا



كۆيدۈرمەكتە چوغدەك لەۋلىرىڭ،

كۆيمەكتىدۇر باغرىمدا قوقاس.

ھەر تال چېچىڭ بىر ئەزىم دەريا،

دولقۇنلىرى ئۆزىگىلا خاس.



ئۇ دەريانىڭ سۇلىرى سۈزۈك،

جان-جېنىمغا تارار دولقۇنلاپ.

جان قېتىڭدىن تۆكۈلگەن مېھىر.

يۈرىكىمنى قويغان قوقاسلاپ.


يۈرىكىمدە تىترىمەكتە جان

داۋا يوقتۇر كۆيگەن يۈرەككە،
ئىنتىزار مەن سېنى كۆرمەككە.
غازاڭ بولدى سەنسىز گۈلىستان،
توشۇپ كەتتى يۈرىكىم دەردكە.

كىزىپ يۈردىم ھىجران چۆلىنى،
چۈشىنەر كىم ئاشىق دىلىنى.
زىمىستاندۇر كۈنلىرىم مېنىڭ،
يىغلاپ يۈرەر قەلبىم ھەر كۈنى.

ئۇچرىشالماي ئۆتمەكتە كۈنۈم،
چۈشۈپ كەتتى ئىچىمگە ئۈنۈم.
ھاياتىمنىڭ كالتىسى قالدى،
غۇنچىسىنى تۆكمەكتە گۈلۈم.

يوللىرىڭغا تەلمۈرۈپ كۈندە،
يۈرىكىمنى يىرتماقتا ھىجران.
سېنى توۋلاپ مۇساپىر ئۈندە،
توشۇپ كەتتى ئىچىمگە پىغان.

نېمە ئامال شۇ ئىكەن تەقدىر،
ئىچ-ئىچىمگە پاتمىدى پىغان.

كېتىدىكەن ئادەملەر بىر-بىر،
يۈرىكىمدە تىترىمەكتە جان.


تاشتىن قاتتىق سەنسىز بۇ كۈنلەر

كۆڭلۈم تارتماس سەندىن باشقىنى،
كىم چۈشىنەر سېنى مېنىڭدەك.
يۈرىكىمدە ئىشقى-پىراقىڭ،
پورەك-پورەك ئېچىلدى گۈلدەك.

سەن يادىمغا يېتىسەن پات-پات،
يۈرىكىمگە سانجىلار تىكەن.
ئازابلىرىڭ باغرىمدا قات-قات،
سۆيگۈ دېگەن ئەسلى مۇشۇكەن.

باغدا مۇڭلۇق سايرىسا كاككۇك،
زەينەپ يىغلار بۇقۇلداپ ئۆكسۈپ.
ھىجران يېشى شاخلاردا قاتقان،
غازاڭلىرى كەتكەن تۆكۈلۈپ.

دىلىم سۇنۇق باغرىم يارا ،قان،
يۈرىكىمدە تۈمەنمىڭ دەردىڭ.
سەۋدالىقىم بېشىمدا چاقماق،
شادلىق دېسەم قايغۇنى بەردىڭ.

سەن قەلبىمدە قالدۇرغان ھەسرەت،
خۇددى شەمشەر گوياكى خەنجەر.
قان تامىدۇ ئارمانلىرىمدىن،

تاشتىن قاتتىق سەنسىز بۇ كۈنلەر.

سايراپ كاككۇك ،يىغلايدۇ زەينەپ،
قات-قېتىدىن يىرتىلار يۈرەك.
بۇ ھاياتنىڭ قىسمىتى ئەجەب،
تەنھالىقىم قىلماقتا بوزەك.


پايانىمدا ئۆركەشلەر سۆيگۈ،
قاينام بولدى مېھرىڭ تىلەكتە.

قاقشال بولغان ئەقىدەم كۆكلەپ،
ئىشقىڭ گۈلخان بولدى يۈرەكتە.


ئەركەك دېگەن


ئەركەك دېگەن ۋەتەن ، خەلق ، ئەل دەيدۇ،
ئەگىتمەيدۇ سۆزلىرىنى دەل دەيدۇ.
جاپالاردا كۆكرەك كىرىپ ئالدىدا،
بىرلىك بىلەن مۇشەققەتلەر ھەل دەيدۇ.


ئەركەك دېگەن تۈرۈپ ياشا يەڭ دەيدۇ،
تاپقىنىنى ئايىمايدۇ تەڭ دەيدۇ.
ھەقتىن يانماي دۇرۇس، ھالال ياشاشنى،
كەسكىن ئۇرۇش بىر ئۆمۈرلۈك جەڭ دەيدۇ.

ئەركەك دېگەن ۋىجدانىنى ساتمايدۇ،
نەپنى كۆزلەپ قالايمىقان چاپمايدۇ.
ئىمانىنى بۇلغىمايدۇ گالنى دەپ،
خاتا يولغا ھەرگىز قەدەم باسمايدۇ.

ئەركەك دېگەن مىسكىنلەرنى ئويلايدۇ،
ئۆز ئۆيىنى جاننى تىكىپ قوغدايدۇ.
قىزغانمايدۇ باشقىلاردىن بەختىنى،
يامان خىيال ، يامان ئويدا بولمايدۇ.


ئەركەك دېگەن دۈشمىنىگە يۈكۈنمەس،
نەپ ئالدىدا ئىرادىسى پۈكۈلمەس.
پۇختا ئويلار باشلىغاندا ھەر ئىشنى،
ئارقىسىدىن پۇشايماندا ئۆكۈنمەس.


ئەركەك دېگەن نامەردلەرنى رەڭ دەيدۇ،
ئازغۇنلۇقنى ئۆلۈم بىلەن تەڭ دەيدۇ.
(ئۆزى ئالماي گۆھەر ياغسا ئاسماندىن،)
پېقىرلارغا ئۈلىشىڭلار تەڭ دەيدۇ.

ئەركەك دېگەن ئەل يىغلىسا كۈلمەيدۇ،
نامەردلەرنىڭ دېگىنىگە كۆنمەيدۇ.
ھەر بىر نەپەس دۇرۇس ياشاش مىزانى،
ئاۋام بەختى ،كەلگۈسىنى كۆزلەيدۇ.

ئەركەك دېگەن بۆرىلەرنى ئوۋلايدۇ،
قۇۋ تۈلكىنى ئۆز مەيلىگە قويمايدۇ.
ئالدانمايدۇ ھىيلىسىگە شەيتاننىڭ،
غورۇرىنى جاننى تىكىپ قوغدايدۇ.

ئەركەك دېگەن ھەقىقەتنى سۆزلەيدۇ،
غېرىب دەيدۇ مىسكىن ئۈچۈن غەم يەيدۇ.
كۆمۈچىگە دۆۋلىمەيدۇ چوغلارنى،
ئاجىزلارنىڭ ئوتلىرىنى پۈۋلەيدۇ.

ئەركەك دېگەن مەڭگۈ ئەلنى ئويلايدۇ،
تۇزكورلارنى ئارامىدا قويمايدۇ.
پېقىرلاردىن ئايىمايدۇ مېھرىنى،
توڭلىغاننىڭ ئوچىقىنى چوغدايدۇ.

ئەركەك دېگەن ئەل بەختىنى كۆزلەيدۇ،
( خەققە قىلغان ياخشىلىقىنى « ھەج » دەيدۇ.)
ئالدانمايدۇ كىرمەس شەيتان كەينىگە ،
ھاياتىنى ھەق يولىغا خەجلەيدۇ.

ئەركەك دېگەن غورۇرىنى جان دەيدۇ،
ئازغانلارنى ھەق يولىغا يان دەيدۇ.
غادايمايدۇ غېرىبلارنى كۆرگەندە،
قۇشلارغىمۇ يەڭلار مانا دان دەيدۇ.

ئەركەك دېگەن ئاجىزلارنىڭ قولدىشى،
غېرىبلارنىڭ يۆلەكدىشى ،مۇڭدىشى.
ئەركەك دېگەن يەڭەلەيدۇ ئاچچىقنى،
دەردمەنلەرنىڭ دىلكىشى ھەم سىردىشى.

ئەركەك دېگەن ئەل-ۋەتەننىڭ غورۇرى،
تۇپراق بىلەن تۇتاش ئۇنىڭ تومۇرى.
لولىلىقىنى راۋا كۆرمەس ھەرگىزمۇ،
ئەل شادلىقى ئۇنىڭ بەختى ھۇزۇرى.

ئەركەك دېگەن ئانىلارنىڭ تىلىكى،
ئەركەك دېگەن دادىلارنىڭ يىلىكى.
داۋام قىلار يوللىرىنى ئەجدادنىڭ،
ئەركەك دېگەن ئەل-ئاۋامنىڭ تۈۋرۈكى.


قانىغان گۈللەرنىڭ چوغدەك لەۋلىرى

چىرايلىق تېنىڭدە ئۇخلىغان كېچە ،
ئويغىنىپ كەتتى ئاھ چۈشى بۇزۇلۇپ.
كۆزۈمگە قارىدى چالا ئۇيقىدا،
كۈزەتتى تېنىتمىنى ئەسنەپ ،تولغۇنۇپ.

كۆڭۈلنىڭ غارىدا مۇزدەك جىمجىتلىق،
كېچىنىڭ كۆكسىدە يۇلتۇزلار كۆيەر.
ئاينىڭكى باغرىدىن تۆكۈلمەكتە قان،
چېقىلغان ئەينەكتە قۇياش ئېسەدەر.

جاراھەت چېچەكلەپ كەتكەن كۆك ئاسمان،
قۇياشنى يىغلىتار ئاينى قۇچاقلاپ.
يۇلتۇزلار تۆكۈلەر كۆكنى يىغلىتىپ،
ھەددىدىن ئاشماقتا باغرىمدا ئازاب.

بۇلبۇلنىڭ ھالى ۋاي يۈرىكى يارا،
قان ئاقار گۈللەرنىڭ تاتلىق لېۋىدىن.
قانىغان ئۇپۇقنىڭ لەۋلىرى زىدە،
ئۆزۈمنى قاتىل دەپ ئاھ ئۇردۇم بىردىن.






گۈلخان بولدى مېھرىڭ يۈرەكتە،

ۋولقان بولدى ئىشقىڭ يۈرەكتە.

كۆل بويىدا غېرىب بىر دەرەخ



بىر تۈپ دەرەخ تۇرار سۈكۈتتە
قىشنى قۇچاقلاپ .
باھارنى چۈشەپ
يازنى سېغىنىپ
كۆل بويىدا غېرىبسىنىپ
ئازابلىرى قىلىقلىنىپ .

قېنى ئۇ بۇقۇلداپ سايرىغان قۇشلار
ئۇسۇل ئوينىغان يېشىل ياپراقلار

قېنى؟!....
                قېنى؟!!...

                      قېنى؟!!!...
يېتىمسىرىگەن كۆل بويى بەكمۇ
كۆز ياشلىرى سۈزۈك شۇقەدەر
يۈرىكىگە چوغلار لىق تولغان
ئارمانلىرى گۈرۈلدەپ كۆيەر
قاينىغان كۆز ياشلىرى تاش بولۇپ قاتقان.

كۆل بويىدا مىسكىن بىر دەرەخ
بۇ دەرەختە مىڭ يۈرەكنىڭ دەردۇ-زارى بار
مىڭ ئالەملىك ئاھلار ،پىغانلار
قوقاستەك ئازاب ، چوغدەك چۇقانلار...

كۆل بويىدا يالغۇز بىر دەرەخ
يۈرىكىدە چوغدەك پىراقلار
ئۇزاق قىشتىن زېرىككەن بەكمۇ
يېقىنلاپ كەلمەكتە ئوتتەك بىر تىۋىش
ئويغانماقتا شاخ-تاللىرى
سۇندۇرالماس جۇدۇن-چاپقۇنلار...

كۆل بويىدىكى تەنھا دەرەختە
ئاي مۇڭلىنىپ يىغلار ئېسەدەپ  
قونۇۋېلىپ ئۇنىڭ شېخىغا
تىنىدىكى قاراڭغۇلۇقتا
بىر تال چوغ يانماقتىدۇر چېچەكلەپ...

كۆل بويىدا تەنھا بىر دەرەخ
كۆلگە تۆكەر دەردى ، سىرىنى
كۈي تىلى بىلەن
قانىغان ئاۋازى...
ئىچ-ئىچىدىن كۈيەر تىك تۇرۇپ
( يىلتىزىنى شاخلاتماق بولۇپ )
تەتۈر قاراپ دۇنياغا
تۆكۈلۈپ كەتكەن يېشىل يوپۇرماقلىرىنى سېغىنىپ
قات-قېتىدا سۈپسۈزۈك ھىجران
بۇلدۇق-بۇلدۇق تۇرماقتا ئېقىپ...

كۆل بويىدا غېرىب بىر دەرەخ
ئوت يۈرەك ئەركەكتەك...
نومۇسچان قىزدەك...
ئۇنى سۆيۈپ قويساڭچۇ باھار !...