ئەھەدى--- غەزەللەر [ئۇلانما كۆچۈرۈش]

                                
                         غەزەللەر

ئەھەدى

ئەي سابا شاھى سەنەمدەك بىر گۈزەل  كەلتۈر  ماڭا ،
نە گۈزەل، قان – ياش بىلەن پۈتكەن غەزەل كەلتۈر ماڭا .

مەيلى كەلتۈر بىر قەدەھ شارابى ئەنتۈر ، مەست بولاي
ۋەسلى ئەييامدەك شىرىن  بالۇ – ھەسەل كەلتۈر ماڭا .

ئاھ ، كۆڭۈل دەشتىم قاقاس  تەشنائى زار تامچە سۇغا،
بىر پىيالە ئۇسسۇلۇق سىنچاي ئەۋەل كەلتۈر   ماڭا .

كەتسە مەيلى جانۇ – جىسمىم ئوت بولۇپ ھىكمەتتە  گاھ،
پانى ئالەم سىرى- ئەسرارىن تۈگەل كەلتۈر  ماڭا .

مەن بۈگۈن ئەشئارغا چىن ئىشقىم بىلەن  بولدۇم خۇمار ،
ۋەزنى بارماق بىرلە ئارۇزدىن زۇھەل كەلتۈر   ماڭا .

بىر قۇچاق ھەشقى پىچەكتىن  بەرگى رەيھان ياخشىراق ،
زەر – گۈھەردەك چاقنىغان بەھرى رەمەل كەلتۈر ماڭا .

ھىجرى ئەشئار ئىشقىغا بولدى ئەھەدى مۇپتىلا ،
يا شىئېر كەلتۈر بۇدەم ، ياكى ئەجەل كەلتۈر ماڭا  !
                              (2)
ئەي پەرى ، ئىشقىڭدا ئۆچمەس چوغ بولۇپ ياندى يۈرەك ،
زار بولۇپ ۋىسالغا ، ھىجران  ۋەسلىگە  قاندى   يۈرەك .

جۈپ ئانار مەي باغلىغان ئالتۇن لىگەندۇر  كۆكسىڭىز ،
بۇندا باغرىم بىر قەپەس، تۇتقۇنغا   ئايلاندى  يۈرەك .

بىر دەقىق جىم تۇرسا كاشكى ، يۇلقۇنۇپ بەرمەس ئارام ،
قانچە كىشنەپ چاپچىغانچە  شۇنچە داغلاندى يۈرەك .

تاش كۆمۇرگە ئوتنى ياقسا كۈل بىلەن داشقال قالۇر ،
بىقەدىر جىسمىمدا ئوت كۆيگەنچە چوغلاندى يۈرەك .

مەن تۆرەلدىم قايسى كۈن ئىشقى -پىراق سەيناسىدا،
سۆڭرى ھىجرانغا بەنت - زەنجىردە باغلاندى يۈرەك
.
نە ئەجەپتۇر ئەيلىسەڭ كۆكسۈمنى خۇمدانغا قىياس ،
شۇ ئەزىم خۇمدان ئارا يالقۇنغا ئايلاندى يۈرەك .

بەس!كۆتۇر باشىنى ئەھەدى  ياتما غەپلەت ئۇيقىدا ،
چاچ ، ساقالىڭغا  قىرو قۇنغاندا  ئويغاندى  يۈرەك  !
                               (3)
ئەي نىگارا ، كۆيمىدىم مەن ساڭا كۆيگەندىن بۆلەك،
ئەزبىرايى سۆيمىدىڭسەن، مېنى سۆيگەندىن  بۆلەك .

سەن كەبى گۈل نازىنىنلار كۈندە  ئۇچرايدۇ ، بىراق
كۆيدۈرەلمەس مېنى ھېچكىم سەن كەبى سەندىن بۆلەك .

مەن قاچان كۆردۈم سېنى  كۆيدۈم ئىشىقنىڭ ئوتىدا ،
سۆڭرى ئىمكان تاپمىدىم ھېچ ئىشتىياق ، غەمدىن بۆلەك .

كۆيگىنىمگە يوق پۇشايمان مەيلى كەتسەم كۈل بولۇپ ،
بەلكى يوقتۇر ساڭا شەيدا  قۇلمۇ ھەم مەندىن بۆلەك .

كۈنۈ- تۈن ۋەسلىڭ كويىدا  ئۆرتىنەرمەن ئاھ ئۇرۇپ ،
قالمىدى جىسمىمدا تاقەت بۇ زەئىپ تەندىن بۆلەك .

مۇپتىلا بولدى  ئەھەدى     بۇ ئىشىق     سەۋداسىغا ،
يوق شىپا لوقمان لېۋىڭ قىلغان داۋا- ئەمدىن بۆلەك .

قۇياش ئۇپۇق باغرىنى يېرىپ، جىمى كائىناتقا يېڭى بىر تاڭدىن خەۋەر بېرىۋاتقان شۇبۇ دەقىقىدە،ئۇستاز شائىر ئەھەدىنىڭ دىللارنى قۇياش كەبى نۇرلاندۇرغۇچى نادىر غەزەللىرىنى كۆڭۈل كۆزۈمىزگە چىراق قىلىپ ياغقانلىقىدىن ئالەمچە سۆيۈندۈم. شائىرنىڭ ئەزىز تېنىگە ساقلىق،ئىلھام بۇلاقلىرىغا بەرىكەت تىلەيمەن.

بولدى ماڭا بو غەزەل،ئەتىگەنلىك ناشتىلىق.
سىز ئۇچۇن دۇئا قىلىپ، مەن تىلىدىم ياخشىلىق.

داۋاملىق مۇشۇنداق نادىر غەزەللەرنى يوللاپ تۇۇرشىڭىزنى ئۈمىت قىلىمەن.

ئۇستازنىڭ ئاشۇ غەزەل يازغان قوللىرىنى چىڭ سىقىپ تۇرۇپ دىدارلاشقۇدەك پۇرسەت نېمىشقا كەلمەيدۇ ماڭا ؟

غەزەللىرىدىن سۆيۇندىم ، ئىلھاملىرى بوز ئارغىماقتەك چاپچىپ تۇرسۇن . غەزەلدىگەن مۇنداق بولمامدۇ . پىكىرلىشىپ تۇرايلى ...

غەزەللەر تولىمۇ پاساھەتلىك چىقىپتۇ ،  شۇنداق زوق ئالدىم . ئۇستازنىڭ ئەجرىگە تەشەككۈر .