ئىبراھىم نىياز : روھ پىچىرلىشى [ئۇلانما كۆچۈرۈش]

روھ  پىچىرلىشى



ئىبراھىم  نىياز



                   1

ھەي .... !!!!

ئاستا  تاراسلاپ  يېرىلماقتا  مۇز

كۆيۈۋاتقان ئادەمنىڭ  

يۈرىكىگە  يېقىنلا  يەردە ....



ئۇزۇن  بولدى

توختاپ قالغىلى  سائەتنىڭ  تىلى

يوق  ھېچكىمدە  ۋاقىت سېزىمى ،

چۆچەكچى  موماينىڭ چۆچەكلىرىمۇ

خېلى  بولدى تۈگەپ  قالغىلى .

ئاڭلىساڭ يەنە  شۇ  چىن تۆمۈر  باتۇر

كاپ - كاپ  كۈچۈكى  قويىدۇ  قاۋاپ  .

ئاڭلىغۇڭ  كېلىدۇ  ئاڭلىغانسېرى

خىيالىڭدا  قالماس  كونىراپ .



خېلى  زامان  بولۇپمۇ  قالدى

قالغىنىغا  قۇمنىڭ  چېچەكلەپ

تۈگىنىڭ قۇيرۇقى يەرگە  تەككىلى ،

پاختەكلەرمۇ  

بۇ  شەھەرنىڭ  ئاسمىنىغا  كەلگىلى .

سايراپ  تاشلىسا  ناۋادا  پاختەك

ھويلاڭدىكى تېرەككە  قۇنۇپ .

تەشۋىش  ئارا  باقىسەن  ھەريان

قوغلىماقچى  بولىسەن  ھەتتا

تاش  تۇتقانچە  ئورنۇڭدىن  تۇرۇپ .....



تېخىچىلا  يېرىلماقتا  مۇز

ئەمما  سائەتنىڭ   تىلى ...

زارلىنار  ئۆكسۈپ

.......         ........

ھەي ، بىزدە  يوقالدى  ۋاقىت سېزىمى

پاختەلەرمۇ  چارچىدى  كۈتۈپ  .

رېستوراننىڭ  ئالدىدىكى  قىز

تېخىچىلا  تۇرىدۇ يالغۇز

كېتىۋاتقان  ئەرلەرگە  كۈلۈپ ....

                     2

ناخشا  توۋلاپ كەلمەكتە  سادىر  !

بىر - بىرىدىن

سورىشىدۇ  يۇلتۇزلار :

_ ئۇ  كىم ؟

_ ئۇيغۇر !

جاۋاب  بەردى قۇياش

سىلاپ ئاپپاق  ساقاللىرىنى  .

_  بەش بالىسى  قېنى سادىرنىڭ  ؟

_  چاقىرماقتا  ناخشىسى  بىلەن

يىتىم قالغان بەش  بالىسىنى  ...

_ سادىر ئەجەپ  ئادەم  ئىكەن -  ھە ؟

_ چۈنكى  ئۇ  ئۇيغۇر - دە !

يۇلتۇزلار

قۇياش  بىلەن  پىچىرلىشىپ  بىر  ھازا

چۈشىنىشتى  ئاخىر  ئۇيغۇرنى ...

                        3

چۆچەككە  ئامراق  شائىر

كىرىپ كەتتى   يېرىلغان تاشقا

" دوست خېنىم " غا  غىڭشىغان پېتى ...

ئۇ  يەردىكى قەشقەر  كوچىسى

قولى قاداق خوتەنلىك دېھقان

بەرمەكتە  سالام .

ئۇچتۇرپاننىڭ  مۆلجەر  تېغىدا

شەمشەر  تۇتقان يەتتە قىز

يېرىلغان تاش  ئىچىدە

ئايلانغان  يەتتە  گۈلگە  .

شائىر

شېئىرغا  ئايلىنىپ قالدى بىردىنلا

"  يېرىل  تېشىم " دا  .....





بۇ  شېئىر  11 -  قېتىملىق "  خانتەڭرى  ئەدەبىيات  مۇكاپاتى "  غا  ئېرىشكەن .

" مايبۇلاق " ژورنىلىنىڭ  2000 - يىللىق 1 - سانىدا  ئېلان  قىلىنغان  .

ئەجەپ تەسىرلىك ھەم ي€قىشلىق ھە !

ئىبراھمكامنىڭ بۇ شېئىرىنى «خانتەڭرى ئەدەبىيات مۇكاپاتىغا ئېرىشكەن شېئىرلار» ناملىق توپلامدىن كۆرۈپ ناھايىتى ياخشى ئىستېتىك زوق ئالغانىدىم، بۇ  يەردە كۆرۈپمۇ شۇنچە ياخشى ھوزۇرلاندىم. ئەيبۇكامنىڭ خالىس ئەجرىگە تەشەككۈر، ئىبراھىمكامنىڭ يەنىمۇ مول ئىجادىيەت نەتىنجىلىرى بىلەن، تېخىمۇ كۆپ مۇكاپاتلارغا ئېرىشىشىنى تىلەيمەن.

روھنىڭ پىچىرلىشى.....
مۇشۇنداق پىچىرلاشلارنىڭ ئۇلغۇيىشىنى تىلىدىم .

ئۇستازنىڭ ئەدەبىيات  ھەۋەسكارلارغا قويىدىغان تەلەپلىرىدىمۇ   مېھرى -مۇھەببەت ، سەۋىرچالىق بىلەن يۇغۇرلاپ كەتكەن  قايىل قىلغۇدەك پىچىرلاشلىرى بار .

ئىجادىيەتلىرىڭىز   ئاقكۆڭۈل قەلبىڭىزدەك  جۇلالىنىپ تۇرسۇن ئۇستاز !

ئىبراھىم نىياز ئاكىنىڭ ئىجادىيىتىگە تېخىمۇ قۇد بولسۇن! مەن ئاكىمىزنىڭ شېئىرلىرىدىن ئۆزگىچە بىر مۇڭنى، مۇھەببەتنىڭ چىرايلىق ئازاپلىرىنى، تەكلىماكان بىلەن تۇتىشىپ كەتكەن روھىنىڭ نازۇك شىۋىرلاشلىرىنى ھېس قىلالىغانلىقىم بىلەن تولىمۇ سۈيۈنىمەن. ئىشقىلىپ ئىبراھىم نىياز ئاكا نەزىرىمدە ئۆز خاسلىقىنى داۋاملىق قۇرۇۋاتقان شائىر.

ئىبراھىم نىيار ئاكىنىڭ ئىجادىيىتىگە بەركەت تىلەيمەن.

شىئېر بولسا مۇشۇنداق بولسا،ئوقۇپ-ئوقۇپ قانمىساق.ئىبراھىم ئاكامنىڭ قولىغا دەرت بەرمىسۇن.

بۇ  شىېرنى بەلكىم پۇتۇن  كۈن  پىچىرلايمەن . قەلىمىڭىزگە بەركەت ، تېنىڭىزگە سالامەتلىك يار  بولغاي .

بۇ  شىېرنى بەلكىم پۇتۇن  كۈن  پىچىرلايمەن . قەلىمىڭىزگە بەركەت ، تېنىڭىزگە سالامەتلىك يار  بولغاي .

نېمە ئۈچۈنكىن،ئىبراھىم نىيازنىڭ ھەر بىر شىئېرىنى ئوقۇساملا ئۆزۈمنى باشقا بىر دۇنياغا بېرىپ قالغاندەك،ئۆزۈممۇ باشقا بىر شەيئىگە ئايلىنپ كېتىپ بارغاندەك ھىس قىلىمەن.مەنمۇ ئاشۇنداق شىئېرلارنى يازالارمەنمۇ؟.....