مەن بىر ئوماق قىساسكار ( ئايچىن ) [ئۇلانما كۆچۈرۈش]

سەھەردە تېلىفون ئۇرۇپسەن  بايقۇش ،

بىر كېچە چۈشۈڭدە يىغلاپتىمىشمەن .

قۇلىقىڭ تۈۋىدە مۇڭلۇق بۇقۇلداپ -

بىر كېچە ئۇيقۇڭنى بۇزۇپتىمىشمەن .

‹‹ چۈشۈمگە كىرمەي قوي ، ياشىغىلى قوي ،

ۋىجدانىم ھەر كۈنى قىلىدۇ سوراق .

ئۆتمۈشتە ساڭا مىڭ ئۇۋال قىلساممۇ -

سەن ھازىر بەختىڭنى تاپتىڭغۇ بىراق ؟ ››

سۆزۈڭدىن ۋاپاسىز ، ئېزىلدى باغرىم ،

مەن ئازاپ چەككەندە سەن قەيەردىتىڭ ؟

ئەللەرنىڭ ئالدىدا بېشىم ئېگىلىپ -

بۇ جاندىن تويغاندا سەن قەيەردىتىڭ ؟

تۇتارمىش قىرىق يىل قىزنىڭ قىساسى ،

مىڭ ئۆلۈپ - تىرىلىپ ياشايسەن تېخى .

دەردىڭدە تۆكۈلگەن بىر تامچە يېشىم -

ئاققۇسى كۆزۈڭدىن دەريا بوپ تېخى ....

ئوڭايغا چۈشتىمۇ بەختىمنى تاپماق ،

ياشىدىم تالاي يىل باغرىمنى تىلغاپ .

ئايلاندى گۈل چېھرىم سېرىق سەبدىگە ،

زۇلمەتتە ياشىدىم زارۇ-زار يىغلاپ .

مەن شۇنداق ئاخىرقى ئوماق قىساسكار ،

ئوڭۇڭدا خىيالىڭ قىلىمەن قامال .

ئاللاھتىن گۇناھىڭ تىلەشتىن ئۆزگە -

ۋىجدانسىز سەن ئۈچۈن يوقتۇر ھىچ ئامال .

بۇلاق كۆز ، شېرىن سۆز ئوماق بىر قىزنى ،

تالاي يىل ياد ئېتىپ ياشىشىڭ بەرھەق .

ئۇيقۇسىز ئۆتىسەن مىڭ -مىڭلاپ كېچە -

دەردىمدە سەكپارە بولۇشۇڭ بەرھەق .

2012- يىل 24 - ئاپرىل ( ئايچىن )