چەكلەنگەن شېئىر   [ئۇلانما كۆچۈرۈش]

چەكلەنگەن شېئىر

مەن ئىچىمدىكى چەكلەنگەن شېئىر
قىينىلىمەن يازماي ئۆزۈمنى
مەن تۈرمىدىكى بىر مەھبۇس گويا
قېچىشنى ئويلايمەن ئۆزۈمدىن بىر رەت
مەن ھەتتاكى سائەتلىك بومبا
پارتلاپ كېتىمەن ھەرۋاقىت بەلكىم


مەن شاخلىرى ساڭگىلاپ تۇرغان شېئىر دەرىخى
كۆتۈرەلمەيمەن ئەمما شېئىرنى
مەن مۇھتاج ئەمەس ھېچنىمىگە
يوللار سۇنۇپ كەتسە كەتسۇن دەيمەن
مەن ئۈچۈن بەرىبىر
ئادەم ئىزدەش ئېلانى
پەمىدۇر توغراش


ئەڭ خەتەرلىك ئىش ئۈستىدە ئۆلۈپ كەتسەم دەيمەن
بارماقلىرىم پاتتى بۇلۇتقا
مەن يىغىۋاتقان يامغۇر تامچىلىرى
توشۇپ كەتتى نۇر ئىدىشلىرىغا
كاللام سېپىل دەرۋازىسىغا ئېسىقلىق تۇرغاندەك
قاراپ تۇردۇم تاملاردىن-تاملارغا
كامارلارغا
ئازراق ئاچچىقسۇ ئىچكۇم كېلىدۇ
ئۆلۈمنى ئۆلمەي تۇرۇپ ھېس قىلىشقا ئۇرۇنىمەن
جىمجىت ماڭدىم ئورمانلاردا
يۈرىكىمدەك تاش يۇپۇرماق لەيلەپ قالدى ئىچكى بوشلۇقتا
مەن مۇشۇنداق چەكلەنگەن شېئىر
يىڭنە تۆشۈكىدىن يىپ ئۆتكۈزۈپ
تىكىۋەتكەن تېرىلىمنى

سۇ كەلدى

يۈرىكىڭىزدە نەچچە تال تاش بار
ساياھەت قىلىشنى ياخشى كۆرىمەن
دەريا بويىدا ئاغزىمنى ئېچىپ ئولتۇرسام
كىرىپ كەتتى ئىچىمگە قىپقىزىل شامال
مەجنۇنتالنىڭ ئەمدىلا بىخ چىقارغان ئۇچلىرى
دەريا سۈيىگە چىلىشىپ ئاستا-ئاستا ئىرغاڭلايتى
ئۇزۇن بىر پويىز كۆۋرۈكتىن ئۆتمەكتە
بۈگۈن قىلماقچى بولغان ئىشلىرىمنى تاشلاپ قوياتتىم
بارغانسىرى قورقماس بۇلۇپ كەتتىم
بىردەم تاشلاپ كەتسەم دەيمەن
ھېچيەرگە بارمىسام
ھېچكىم بىلەن كۆرۈشمىسەم...
قەھۋە كەلتۈرەيمۇ
ئۆستەڭگە سۇ كەلدى...

بۇ يازمىنى ئاخىرىدا   خۇما تەھرىرلىگەن. ۋاقتى  2012-4-24 12:17  

سۈيدۈك خالتىسى ئېسىلىش

پەرىشانلىق كۈنلەر پەرەنجىسىنى ئېچىپ تۇرغان
                                      ...ھاۋا
                             ...سۇ
                    ...تۇپراق
            ...ئوت
   بىر-بىرلەپ ئىشىكلەر قۇمۇرۇلماقتا
تۆمۈرنىڭ داتلىشىش خۇسۇسىيىتىگە ئىگە ئىكەنلىكىنى بىلىش كېرەك
شۇ كۈنى بىر بوۋاي
ياتاقلارغا
ئىشخانىغا
كىرىپ-چىقىپ يۈرەتتى
كارىدۇردا مېڭىپ يۈرەتتى
ئۇ ئېسۋالغان سۈيدۈك خالتىسىدا
سۈيدۈك چايقىلىپ تۇراتتى
كۈنلەرنىڭ يەنە بىر تەرىپىگە چىققاندا
پەرەنجىنى يېپىپ تۇرغان
بىر ئاللاھنىڭ قولى

مەن تارىخنىڭ 13-بېتىدە

كۆزىتىش ئاپىراتى ئورنىتىلغان
... دەۋىتى بىلەن
كۈنلۈك ئاستىغا كىرىۋالىمەن
باش سۆڭىكىمگە مىخ قېقىلىدۇ
بارىلىق جىنايەتلىرىم خاتىرلەنگەن
بىر كىچىك قۇتا
ھەسرەت شارابىنى تەڭ ئىچىمەن
ئۇنىڭ بىلەن ئۆلتۈرۈلىمەن
يېرىم كېچىدە ھەممىنى سۆزلەپ بېرىمەن
ئاي زوڭزىيىپ قاراپ تۇرىدۇ
پاراڭلاشقاچ ئەسنەپ كېتىمەن
دېرىزەم ئوچۇق
كۆزۈمنى يۇمساملا قاراڭغۇ بېسىۋالاتتى
بارا-بارا قىينىلىپ
قەھۋەگە ئۇيقۇ دورىسىنى چىلايمەن
شۇنداق يېزىلغان
مەن تارىخنىڭ 13-بېتىدە

بۇ يازمىنى ئاخىرىدا   خۇما تەھرىرلىگەن. ۋاقتى  2012-4-24 12:17  

ئادەم ئاناتومىيىسىنىڭ رەڭلىك ئاتلىسى

پىشقەدەم قاتىللار
گۆش بازىرىدىكى بىر كۆرۈنۈش
مەن ئىككى يىلنىڭ ئالدىدا غالىبىيەت يولىدىكى بىر كىتابخانىدىن
سېتىۋالغان
ئادەم ئاناتومىيىسنىڭ رەڭلىك ئاتلىسى
كېتىپ قېلىش

مەندىن يىراق تۇرغىن

مەندىن يىراق تۇرغىن
بولمىسا سېنى كۆيدۈرېۋېتىمەن
چاچلىرىمدا قىرىق كەچمىش بار
ئۆزۈممۇ ھەم كۆيۈپ كېتىمەن

ھۈنىرىم پەقەت كۆيۈش كۆيۈشلا مېنىڭ
كۆيدۈرگۈم يوق لېكىن ھېچكىمنى
شامال قانداق چىداپ كەلگەندۇ
ھىدىمنى سۆرەپ بارسا لېۋىڭغا

مەندىن يىراق تۇرغىن ئورمىنىم
يىراق تۇرغىن سەنمۇ ھەم دەريا
يۈرىكىمنى بىلىپ قالساڭمۇ
سۆرىتىمنى بىراقلا  تاشلا

دوڭغاق سۆگەت ئاستىغا كىرىپ
ساقلاپ يۈرمە كېلىشىمنى
بەدەنلىرىڭ بىر باغلام ئوتۇن
سېلىۋەتتىم كىيىملىرىمنى...

بىچارە ،پاخلىنىم

پاخلىنىم
بۈگۈن ئەتىگەن تۇيۇقسىز
ئاناڭنىڭ ئەھۋالى ئېغىرلىشىپ كەتتى
ئۇنىڭ كېسىلىنى مەنمۇ بىلمىدىم
بەلكىم نورمىدىن ئارتۇق بىر ماددا(بىر خىل ھەسرەت) نى يەۋالغاندۇ

دادام ئاناڭنى ھارام بۇلۇپ قالمىسۇن دەپ
پىچىقىنى بىلىگىنىچە ئاناڭنىڭ گېلىغا سۈرگىلى تۇردى
ئاناڭنىڭ بىر خىل ئۆلۈمگە تەسلىم بولغۇسى يوقتەك تۇراتتى
قان تۆكۈلىشى بىلەن تەڭ قاتتىق تىپىرلاپ كەتتى...
ئاناڭنىڭ بەدىنى يەرگە چىڭ بېسىقلىق تۇراتتى
ھازىر ئۇنىڭ ھېچنىمىگە كۈچى يەتمەس بۇلۇپ قالدى
تاڭنىڭ شەپەق نۇرلىرى بىلەن ئاناڭنىڭ قىپقىزىل قانلىرى بىرلىشىپ
ئۆلۈمنىڭ ۋېرتىكال يۆلىنىشنى ھاسىل قىلاتتى

بىچارە، پاخلىنىم
سەن ئۇ ۋاقىتتا دادامدىن قورقۇپ
ئاناڭنىڭ قېشىغىمۇ كېلەلمىدىڭ
كۆزلىرىڭ مۆلدۈرلەپ تۇراتتى
ھەي...
مانا يىراقتىن قارا
ئاناڭنىڭ تېرىسى سويۇلۇپ بۇلۇپ
ئىچ قارنى ئېچىلىۋاتىدۇ
روھ روھقا قاراپ ئېقىۋاتىدۇ

بىچارە،پاخلىنىم
سەن تېخى بىر ئايغىمۇ توشمىغان ئىدىڭ
كەچتە ساڭا كالىنىڭ سۈتىنى قاينىتىپ
ئۇكامنىڭ كىچىك ۋاقتىدىكى ئەمزىكى بىلەن ساڭا ئەمدۇردۇق
ئۆي ئىچىگە قاراپ ھېتىرقايتىڭ
دۇمبەڭنى سىلىغاچ "ئەمگىن" پاخلىنىم دېدىم
جىمجىت بۇلۇپ قالدىڭ
سېنى چىڭ قۇچاقلىغۇم كەلدى

بىچارە، پاخلىنىم
ئۇ يەرگە پات-پات قاراپ  قۇياتتىڭ...

بۇ يازمىنى ئاخىرىدا   خۇما تەھرىرلىگەن. ۋاقتى  2012-4-24 12:18  

زېرىكىش خاراكتىرلىك شېئىر كېسىلى

نەتىجىسى مۇسبەت چىقىپتۇ
ئاتوم بومبىسىنىڭ بىر زەررىسى چۈشۈپ كەتكەن يارا
ئەھۋالنىڭ ئېغىرلىقىنى بىلگەن بۆلۈم باشلىقى
تامغىنى بېسىپ بېرىپلا چىقىپ كەتتى

باقمىچىلىق مەيدانىدىكى يۇۋاش قويلاردەك
بەكرەك مەرەپمۇ سالمايتۇق
ھەسرىتىمىزنىڭ كۆپلىكىدىن زېرىكمەكتىمىز
زېرىكىپ كەتتۇق جىمجىتلىقتىن
زېرىكىپ كەتتۇق رېئاللىقتىن

كەم بىر نەرسىمىزگە مۇھتاج بولماقتىمىز
يوغىناپ-يوغىناپ چىققىمىز كېلەر
بىر دۆۋە تېشىمىزغا
بىر بۇغۇم-بىر بۇغۇمدىن زېرىكىپ
بىر جۈملە زېرىكىپ كەتتۇق

بۇ يازمىنى ئاخىرىدا   خۇما تەھرىرلىگەن. ۋاقتى  2012-4-24 12:18  

خۇمار بايرىمى

«بۇنداق تىياتىرلار دائىم ئوينالغان»
شام يورۇقى
تىرنىقىنى ئېلىش ھەركىتى

تۈنۈگۈندىن مەڭگۈلۈك ئايرىلىپ
ئاھ،بۈگۈننى ھاياجاندا ئۆتكۈزىۋەتتىم
شىلدىرلىماقتا تەن يۇپۇرماقلىرىم
مەن يەنە ئون يىلدىن كىيىنمۇ بۇ شېئىرنى ئوقۇپ
قاتتىق قاقاقلاپ كۈلىدىغاندەك
خاتىرجەم ئولتۇرىۋەردىم

بۇ يۈرەك سېغىنىشنى ئېغىرلاشتۇردى
بۈگۈننىڭ بوران-چاپقۇنلىرى
ھەسرىتىم يالداما
ھېچكىم ئۇنتۇلۇپ قالغان بۈگۈنگە

بۈگۈن ئاڭلىمىغان ئاۋازىڭنى
ھېچنىمە قىلىۋېتىمەن
مەن ھېچنىمەڭنى ياخشى كۆرمەيتىم
ھېچنىمەمنى ئايىمايتىم
بىپەرۋالىقىڭ تۈپەيلى بولدۇم ھېچنىمە

قىيپاش ھالىتىمدە
بايرىمىمنى تەبرىكلەۋاتىمەن
ئاستا-ئاستا تېنىمدىن چىقىپ كېتىۋاتىمەن

2012-يىلى3-ئاينىڭ12-كۈنى

بۇ يازمىنى ئاخىرىدا   خۇما تەھرىرلىگەن. ۋاقتى  2012-4-24 12:18  

سەل يانتۇ كەتتى

بىر قېتىم قارىسا تۈپتۈز
ئىككى قېتىم قارىسا تۈز
ئۈچ قېتىم قارىسا يانتۇدەك
ئەمەلىيەتتە
سەل يانتۇ كەتتى
بالىياتقۇدىكى بىر پارچە شەھەر...

قان ئىچكەن يۈرىكىڭ سوقۇپ گۈپپىدە

مەشھۇردۇر بۇ ئازاب لەززىتى بىلەن،
چىڭقالغان جېنىڭدىن تامچىيدۇ ھېسسىيات.
چۆمۈلۈپ چىشلارنىڭ غالجىرلىقىغا،
نەپرەتتەك يۇمۇلار كۆزلىرىڭ پات-پات.

خىيالدەك پارچىلاپ تەننىڭ تېمىنى،
قۇم بولدى ساھىلدا تاشنىڭ بارچىسى.
تۈگمەڭنى جېنىڭدىن ئۈزۈپ تاشلايدۇ،
ياۋايى ئىتىڭنىڭ تىنماي قاۋىشى.

بىر ئېرىق سەۋدانى قويۇپ مەيلىگە،
ئورماندا تېرەكلەر قويۇشتى ساقال.
قان ئىچكەن يۈرىكىڭ سوقۇپ گۈپپىدە،
ئوغۇزدەك ئېتىڭغا مىنىسەن دەرھال.

بۇ يازمىنى ئاخىرىدا   خۇما تەھرىرلىگەن. ۋاقتى  2012-4-24 12:19  

ھالىم غارايىپ

مەن چۈش كۆرمەيدىغان كېچە يوق
يۇلتۇزمىكىن كۆزلىرىمگە قادالغان
ئاسماننىڭ ئاستىدىكى كىچىك مەۋجۇتلۇقۇم
ئاران بىر "جان"دەپ ئاتالغان

ئاڭلىرىمدا جانابىمنىڭ خىتابى بار
يىغلاۋاتقان كىتابىمنىڭ كىيىمى تار
پەردىنىڭ ئارقىسىدىكى
يىرتىلىۋاتقان پەريادلارنىڭ  بارچىسى
چىشلارنىڭ ئۇششاق ئۇۋىلىپ كېتىشى
خانىشلىق تەختىدىكى مەپىلەرنىڭ سەرسان بۇلۇشى
بۇ ھېچ گەپ ئەمەس
يامان بولغىنى سېنىڭ كېتىۋاتقىنىڭ ھېچ يەرگە

ھېلىقى كۈنىدىكى غالجىر ئاپتاپ ئىدى
يۈرۈكىمنى كۆيدۈدى قاباھەت
ئوپراتسىيە قىلىشقا توغرا كەلدى
...
ھالىم غارايىپ،ھالىم غارايىپ
ھازىرقى ھالىتىمدە

ئاھ،سېنىڭ ئېشىپ قالغان ھەسرەتلىرىڭ

بىر ئۆمۈر خەجلەپ بولالماسلىقىم ئېنىق
يۈرىكىمدىكى لىققىدە بوشلۇقنى
بىر كۈندە نۇرغۇن ئىش يۈز بېرىۋاتىدۇ
قىستاڭچىلىق ئىچىدە
غېرىپ بولىۋاتقان ئاياغ ئىزلىرىم

مەن نېمىشقا قولۇمدىكى سەرەڭگىدە
ئورمانغا ئوت قويالمايمەن
چوغنىڭ رەڭگىمۇ قىزىل
لەۋنىڭ رەڭگىمۇ قىزىل
يۈرەكنىڭ رەڭگىمۇ ...

بىر تال پېيى چۈشۈپ قالغان قۇشنىڭ
ئۇۋىسىدۇر-بىر تال كېمە
... ئۇ تەرىپىدە
دېرىزىگە ئۇرۇلاتتى شامال

بەدىنىمنىڭ جەنۇب تەرىپى بىلەن شىمال تەرىپى
بىرلىككە كېلەلمەيدۇ
كۆزلىرىمدىن ئاقىدۇ
ئاھ،سېنىڭ ئېشىپ قالغان ھەسرەتلىرىڭ


بۇ يازمىنى ئاخىرىدا   خۇمار تەھرىرلىگەن. ۋاقتى  2012-2-17 00:57  

جىددىي قۇتقۇزۇش بۆلىمىدىكى قىزىقارلىق ئىشلار

بىر ئىستاكان قەھۋەنىڭ سوۋۇپ قېلىشىغا قارىماي
بۇلۇشىغا يۈرەك كېسىلى بولۇۋاتقان كىشىلەر
دائىم كېچىدىلا قوزغىلىدىغان
تەن خەرىتىسىدىن ھالقىيالمايۋاتقان
سوزىلىۋاتقان سەۋەب-نەتىجە كۆرىشى

نۇرغۇنلىغان تۇيۇقسىزلىق
تۆت چاقى بار ئادەملەر
ئاھ،سوقۇشۇپ كېتەر ھاياجانلار
ئاھ،سېنىڭ«خەتەر»ماركىلىق يېڭى سېتىۋالغان چاپىنىڭ
ئاھ،سېنىڭ ھېسسىياتىڭنىڭ ئىچ كىيىمى قان

جىددىي قۇتقۇزۇش ماشىنىسىدىن تامشىپ تۇرار
مۇنچاق-مۇنچاق تەر
ھېلىقى سۈننىي نەپەسلەندۈرۈش ئەس قاتمىغان
ئۆلۈپ تۇردى بىر ياكى بىر نەچچە ئازاب

چىۋىن ئۆلتۈرۈش بايرىمى قاچانمۇ كېلەر
قۇلاقنى گاس قىلىپ يىغلايتىم تازا

جان بىلەن جاننىڭ ئارىلىقى


بىر توپلام سېغىنىش
بىر پارچە ھاياجان
بىر كوبلىت تاقەتسىزلىنىش
بىر مىسرا قەدەم
يېقىنلاشماقتا
جان بىلەن جاننىڭ ئارىلىقى