يۈرىكىمدىن - يۈرىكىڭگە پويىز قاتنايدۇ ( ئايچىن ) [ئۇلانما كۆچۈرۈش]

يۈرىكىمدىن-يۈرىكىڭگە پويىز قاتنايدۇ ،

بەك ئاستا ، بەك ئاستا پويىز .

ئوغلىمىز بەزىدە-

پويىز شوپۇرى بولۇپ قالىدۇ .

جىق -جىق گەپلىرىمىزنى

ئېغىر-ئېغىر دەردلىرىمىزنى-

ۋاگونغا قاچىلاپ ،

گاھ سەن تامان

گاھ مەن تامان  شۇڭغۇيدۇ .

مەڭگۈ توختاپ قالمايدىغان پويىز بۇ ،

توختاپ قالسىلا رېلىستىن چىقىپ كېتىدۇ .

پويىز شوپۇرىمىز ھېرىپ قالغان چاغلار بەك قىزىق

سۈرەن سېلىپ يىغلايدۇ ،

ئۆزىنى يەرگە ئاتىدۇ ،

ئىككى بېكەت ئۇچرىشىپ قالىمىز ئۇنىڭدا .

بارماقلىرىمىز پىنھاندا پىچىرلىشىدۇ...

شاماللارغا قىلمىدۇق ئېرەن ،

بورانلاردىن يېمىدۇق ۋايىم .

زارلانمىدۇق يامغۇر ياغقاندا -

ۋايسىمىدۇق ئاپتاپ چىققاندا.

يولوچىمۇ بولدۇق گاھىدا ،

رېلىسلارنى ياساپمۇ باقتۇق .

گۈدۈكىنى چالدۇق ئۆزىمىز -

گۇڭۇر-مۇڭۇر كۈلۈشۈپ باقتۇق -

شوپۇرىمىز ۋايساپ ياتقاندا ....

جېنىم

يۈرىكىڭدىن-يۈرىكىمگە پويىز قاتنايدۇ ،

قىيداپ باقىمەن بەزىدە ،

يىغلاپ باقىمەن بەزىدە.

سەن پاراۋۇزنى يەلكەڭدە كۆتېرىسەن  ،

مەن ۋاگونلارغا لىققىدە شىېئىر يازىمەن ...

ئۇزۇن مۇساپە بۇ

بەكمۇ ئۇزۇن .

كۆز يەتمەس ناگان ...

قىسقىراپمۇ قالىدۇ تۇيۇقسىز -

بىر تىنىق ئارىلىقىدەك يېقىنلىقتا

ئۇيۇپ قالىدۇ قارچۇقلىرىمىز ....

2012-يىل 21- ئاپرىل ( ئايچىن )