ئەھەدى---غەزەللەر [ئۇلانما كۆچۈرۈش]

                        غەزەللەر

ئەھەدى
                                  (1)

بىلىپ ئوتقا ئۆزىن ئۇرغان  گويا پەرۋانىدۇر كۆڭلۈم ،
ساماۋى بىر گۈزەل قىسسىسە ۋەيا ئەپسانىدۇر كۆڭلۈم .

توسۇن ئاتتەك تۇتۇق بەرمەي چېپىپ ھەريانە - ھەريانە ،
ئۆزى تاپقان  بالالارغا  ھامان   ھەيرانىدۇر  كۆڭلۈم .

قولۇلە قارنىدا پىنھان  ياتارمىش ئۈنچە - مەرۋايىت ،
دېمەڭكىم ، سىرتىدىن داشقال ، ئىچى دۇردانىدۇر كۆڭلۈم .

كىيىپ جەندە كۇلاھ، چالسام ساپايى كۆپ ئەيىپ ئەتمەڭ ،
جۇدالىق دەشتىدە سەرسان ، غېرىپ دىۋانىدۇر كۆڭلۈم .

پايانسىز كەڭرى بىر ئالەم ، سىغار ئالەمگە مىڭ ئالەم ،
بىراق ، ئارتۇق ئازار سىغماس  كىچىك بىر خانەدۇر كۆڭلۈم .

ئىكەنمەن ئاقكۆڭۈل ، ساددا  نېتەي قالسام يامان ئاتقا ،
ئۆزۇمدەك ئۆزگىنى چاغلاپ  ئەجەپ ۋەيرانىدۇر كۆڭلۈم .

ئاۋايلاڭكى ، ئەھەدى نىڭ جانان پىيالەسى    نازۇك ،
ئۇنى چۇل - چۇل قېلىۋەرمەڭ ، ئاران بىر دانەدۇر كۆڭلۈم !
                                  (2)

فۇرقىتىڭدە  ئەي نىگارا ئاھ ئۇرۇپ  قان  يىغلىدىم ،
گاھ  ساراڭدەك   كوچىلاردا، گاھى پىنھان  يىغلىدىم .

كۆز يېشىمدىن ئۆزگە كۆڭلۈم تاپمىغاچ تەھسىن، شىپاھ
ئىچ- ئىچىمدىن يىغا قايناپ تاشتى، ھەرئان يىغلىدىم .

يىغلىماستىم گەر ۋىسالنىڭ مەيىدىن    بىر ئوتلىسام ،
بىمۇرادمەن ، شول سەۋەپتىن كۈندە گىريان يىغلىدىم .

دەر ئىكەن:‹‹شۇملۇق،بالانىڭ بائىسى كۆپ يىغلىماق››،
مەندە ئەمما ساڭا يەتمەك بىرلا ئارمان ، يىغلىدىم .

دۆتلىكىمدىن تۆكمىدىم ياش، تامچىدىن ھاسىل ئېقىن ،
بەلكى  كۆز ياش قۇدرىتىدىن ھەرنە گۈمران ، يىغلىدىم .

سەن ئۈچۈن ياش ئاققۇزۇپ يار مەيلىمۇ بىر كۈلمىسەم ،
بىر كۈلەرمەن ئاقىۋەت  دەپ ئۇپرىتىپ جان  يىغلىدىم .

ئەھەدى،ئالدىڭ خالايىق ئىچرە نام‹‹ يىغلاڭغۇ›› دەپ ،
نە ئەجەپكىم كۆز يېشىمدا پۈتسە ھىجران ، يىغلىدىم .  
                                (3)

يار مېنى چۆل - دەشت ئارا بارخانىلەردىن ئېزدىسۇن ،
يا گۈلەخ، گۈلخان ... ۋەيا مەيخانىلەردىن ئېزدىسۇن .

مۇڭ تۆكۇپ تىترەر ئىمىش  تۈندە ساتارنىڭ تارىسى ،
تەلۋە مەشرەپتىن بەتەر    دىۋانىلەردىن   ئېزدىسۇن .

ئۈنلىسە  دەمدەر  بۇقۇلداپ  تاشنىمۇ  تۇتقاي  يىغا ،
ئوتقا  ئوتتەك  ئاشىنا   پەرۋانىلەردىن    ئېزدىسۇن .

سۈبھىدەم چاقناپ كۈمۈشتەك تامسا رەيھان بەرگىدىن ،
شۇ سۈزۈك شەبنەم كەبى دۇردانىلەردىن  ئېزدىسۇن .

‹‹يار ئەكسىن مەيدە كۆردەپ جامدىن چىققاي سادا››،
خەمسىدك ئالەمشۇمۇل   ئەپسانىلەردىن   ئېزدىسۇن .

گەر ۋىسال قۇچماي تۇرۇپ كىم يەشسە بەل ئاشىق ئەمەس ،
لەۋزىدىن يانمايدىغان مەردانىلەردىن   ئېزدىسۈن .

گەر ئەھەدى تاپمىسا  يارىڭ  ئىشىق    دەرگاھىدىن ،
ئېيت ئاڭا ، ۋىسال ئۈچۈن ئاۋارىلەردىن   ئېزدىسۈن !
بۇ يازمىنى ئاخىرىدا   ئەھەدى تەھرىرلىگەن. ۋاقتى  2012-4-20 23:22  

غەزەللەردىن كۆپ زوقلاندىم.

ئەدەبىي تەخەللۇس ئىككى غەزەلدە‹‹ نىمجان›› بويىچە، بىر غەزەلدە ‹‹ئەھەدى›› بويىچە ئېلىنىپتۇ. مۇمكىن بولسا بىر خىل ئېلىنغان بولسا ياخشى بولاتتىكەن.

بىر بېرىدىن ئېسىل غەزەللىرى بىلەن دىللارغا زوق ئاتا قىلىپ كېلىۋاتقان ئەھەدىنىڭ ئەزىز تېنىنىڭ سالامەت بولىشىغا تىلەكداشمەن،شۇغىنىسى كۆز ياشلىرىدىن ئەنسىرەپ قالدىم.«كۆز ياش قۇدرىتىدىن ھەرنە گۈمران» نېمەدىگەن چىڭ گەپ بۇ! بۇ يازمىنى ئاخىرىدا   hojakabiz تەھرىرلىگەن. ۋاقتى  2012-4-20 18:05  

پاساھىتى تويۇنغان غەزەل كىشىنى تولىمۇ خۇرسەن قىلىدۇ . ئەھەدىنىڭ بۇ ئۇچ غەزىلى  مېنى سۆيۇندۇردى . بىراق ، ئاخىرقى غەزەلدىكى <<نىمجان>> بۇ تولىمۇ پىچارە ئىبارىدۇر . ئامال بولسا ئەھەدى دېگەن تەخەللۇس بىلەن ئالماشسا ، جانلىنۋاتقان ھاياجان شۇ مىسراغا كەلگەندە ئاجىزلىشىپ بارىدىكەن . نىمجانلىقنى يىراق تاشلايلىچۇ ؟ ... قەلىمىڭىزگە بەركەت تىلەيمەن . بۇ يازمىنى ئاخىرىدا   شەۋكەت ئىبراھىم تەھرىرلىگەن. ۋاقتى  2012-4-20 18:28  

ئابدۇلئەھەد قادىرى ئەپەندىنىڭ تېنىگە سالامەتلىك، قەلىمىگە بەرىكەت يار بولغاي!

     ھەزرىتى مىرزا ئەلىشىر ناۋايىدىن مىراس قىلىپ قولىمىزغا ئالغان غەزەل شېئىرىيىتىمىزنىڭ بىباھا گۆھرى ئارۇزۋەزننىڭ مىزانلىرىغا تولۇق ئەمەل قىلىپ، خۇددى زاغۇن يېغىدا ئېرىكنىڭ گۆشى ۋە بىھى بېسىپ ئەتكەن پولودەك ھوزۇرلۇق غەزەل يازاليدىغان شائىرلىرىمىز كەم تېپىلىدىغان بولۇپ قالدى. ئەھەدىي ئاكىمىز مۇشۇ كەم تېپىلىدىغانلارنىڭ بىرى.

ئۇستاز شائىر  ئابدۇلئەھەت قادىرىنىڭ  غەزەللىرىنى  ھەر قېتىم  ئوقۇغىنىمدا،غەزەلگە  بولغان ئىشتىياقىم بىر پەللە  ئۆرلەيدۇ.سالامەت بولۇڭ.

مەدەت ۋە ئىلھام بەرگەن دوستلۇرۇمغا تەشەككۈر .

ئەزىزلەرنىڭ سەمىمى تەكلىۋىنى بىجا كەلتۇرۇپ،1-، 3-غەزەلنىڭ ئاخىرقى بىيتىنى تۈزۈتۈپ كويدۇم .
بۇ يازمىنى ئاخىرىدا   ئەھەدى تەھرىرلىگەن. ۋاقتى  2012-4-20 23:26  

     غەزەللەر

ئەھەدى

         (1)

بىلىپ ئوتقا ئۆزىن ئۇرغان  گويا پەرۋانىدۇر كۆڭلۈم ،
ساماۋى بىر گۈزەل قىسسىسە ۋەيا ئەپسانىدۇر كۆڭلۈم .

توسۇن ئاتتەك تۇتۇق بەرمەي چېپىپ ھەريانە - ھەريانە ،
ئۆزى تاپقان  بالالارغا  ھامان   ھەيرانىدۇر  كۆڭلۈم .

بۇ مىسرالارنى  شۇنچىلىك ياختۇرۇپ ئوقۇدۇم...ئۇستازنىڭ تىنىگە ساقلىق قەلىمىگە بەركەت تىلەيمەن!

مەنمۇ كۆپ زوق ئالدىم.نېمىدىگەن ئېسىل شېئىر بۇ....

بۇ ئۈچ پارچە غەزىلىڭىز ئىنتايىن ياخشى چىقىپتۇ، بۇندىن كىيىن  تېخىمۇ نادىر غەزەللەرنى ئىجاد قىلىشىڭىزغا تىلەكداشمەن.