سۈرەتتە: بازا تەشكىلاتىنىڭ سابىق رەھبىرى بىن  لادېن    


  كورېيە «مەركەز گېزىتى»دە يېقىندا ئەنگلىيە ئاخبارات ۋاسىتىلىرىنىڭ خەۋىرىدىن نەقىل كەلتۈرۈلۈپ ئېيتىلىشىچە، ئامېرىكا دېڭىز ئارمىيەسىنىڭ «تيۇلېن» زەربىدارلار ئەترىتى بىن لادېننىڭ پاكىستاننىڭ ئەببوتئابادتىكى يوشۇرۇنغا جايىغا ھۇجۇم قىلىشتىن بۇرۇن، ئامېرىكا بۇ يەردە تۇرۇشلۇق كىشىنىڭ سالاھىيىتى، ئۆيىنىڭ ئورنى قاتارلىق ئۇچۇرلارنى ئىگىلەپ بولغان، بۇنىڭدىن ئامېرىكا ئاخبارات ئىدارىسى جاسۇسلىرىنىڭ بۇ تۇرالغۇغا يوشۇرۇن كىرگەنلىكى ھەم بىن لادېن بىلەن بىللە تۇرغان بولۇشى مۇمكىنلىكىنى كۆرۈۋالغىلى بولىدىكەن. خەۋەر قىلىنىشىچە، «تيۇلېن» زەربىدارلار ئەترىتىنىڭ ئەزاسىنىڭ نەق مەيداندا يىتتۈرۈپ قويغان بىر خاتىرە دەپتىرىدىكى مەزمۇنغا قارىغاندا، زەربىدارلار ئەترىتى ئەزالىرى بۇ جايدا تۇرۇشلۇق كىشىنىڭ سالاھىيىتىنى ئىگىلەپ بولغان. خەۋەردە: خاتىرە دەپتەرگە ھەتتا بىن لادېننىڭ ياقتۇرىدىغان كىيىملىرى قاتارلىق تەپسىلىي مەزمۇنلار خاتىرىلەنگەن، بۇنىڭدىن ئامېرىكا مەركىزىي ئاخبارات ئىدارىسى جاسۇسىنىڭ بىن لادېننىڭ تۇرالغۇسىغا كىرىپ، ئۇنىڭ بىلەن بىللە تۇرغانلىقىنى كۆرۈۋالغىلى بولىدۇ، دېيىلدى. خەۋەردە يەنە: خاتىرە دەپتەرگە بىن لادېن بىلەن تۇرمۇش كۈچۈرگەن ئۈچ خوتۇنى، بالىلىرى ۋە نەۋرىلىرىنىڭ رەسىملىرى ھەم ئۇلارنىڭ ئىسملىرى، دۆلەت تەۋەلىكى، يېشى قاتارلىق شەخسىي ئۇچۇرلىرى خاتىرىلەنگەن. ئۇنىڭدىن باشقا، ئۇلارنىڭ لەقىمى، تەشكىلات ئىچىدىكى مۇھىملىق دەرىجىسى، بوي ئېگىزلىكى، تەن ئېغىرلىقى، كۆز ۋە چاچلىرىنىڭ رەڭگى، ئائىلە مۇناسىۋىتى ۋە يوشۇرۇنغان جايغا كىرگەن ۋاقتى قاتارلىق ئەھۋاللار ئىنتايىن تەپسىلىي خاتىرىلەنگەن. بۇنىڭدىن قارىغاندا، بىرەر كىشى ئامېرىكا مەركىزىي ئاخبارات ئىدارىسىغا خەۋەر يەتكۈزگەن بولۇشى مۇمكىن، دېيىلدى.
  ئىگىلىنىشىچە، خاتىرە دەپتەرگە بىن لادېننىڭ ئادەتتە سۇس رەڭلىك ئەنئەنىۋى مۇسۇلمانچە كىيىم، ئۈستىگە قېنىق رەڭلىك جىلىتكە كىيىدىغانلىقى ھەم بېشىغا دائىم دۇئا قىلغاندا كىيىدىغان بۆك كىيىۋالىدىغانلىقى خاتىرىلەنگەن. خاتىرىدە يەنە بىن لادېننىڭ ئەڭ ياش خوتۇنى ئامال(28 ياش) ۋە يەنە بىر خوتۇنى شىھا ئابدۇللا بىن ھۇسەيىن ئارشېرىف(54 ياش)تىن تۇغۇلغان ئوغلى قارلىدنىڭ رەسىمى بار ئىكەن. خاتىرىگە يەنە بىن لادېننىڭ يەنە بىر خوتۇنى قايىلىيە ۋە ئوغلىنىڭ بۇرۇن ئىراندا قامالغانلىقى، بۇلتۇر 7-ئايدا قويۇپ بېرىلگەنلىكى يېزىلغان. ئۇنىڭدىن باشقا، بۇ يىل بىن لادېننىڭ خوتۇنى ئامالنىڭ قوشكېزەك تۇغقانلىقى خاتىرىلەنگەن. خەۋەردە: ئامېرىكا دائىرىلىرى تەپسىلىي ئاخباراتقا ئېرىشكەندىن كېيىن، ئەببوتئابادتىكى تۇرالغۇدا تۇرۇۋاتقان كىشىنىڭ بىن لادېن ئىكەنلىكىنى جەزملەشتۈرگەن. دېيىلگەن.
  ئىلگىرىكى پاكىستان فېدېراتسىيە تەكشۈرۈش ئىدارىسىنىڭ باشلىقى، ھازىرقى ئىچكى ئىشلار مىنىستىرى رەھمان مالك: بىن لادېن يوشۇرۇنغان جايدىكى مەلۇم بىرەيلەن ئامېرىكا ئارمىيەسىگە ئۇچۇر يەتكۈزگەن، ئەگەر بۇ ھەل قىلغۇچ ئاخباراتقا ئېرىشەلمىگەن بولسا، ئامېرىكا ئارمىيەسىنىڭ ئالاھىدە جەڭ قىلىش ئەترىتى ئەزالىرى بىن لادېننىڭ ئۆيىگە ئۇدۇل باستۇرۇپ كىرەلمىگەن بولاتتى، دېدى. ئامېرىكا زۇڭتۇڭى ئوباما بىن لادېننىڭ ئېتىپ ئۆلتۈرۈلگەنلىكى ھەققىدىكى ئۇچۇرنى ئېلان قىلغاندا: شۇ چاغدا بىزدە بىن لادېننىڭ شۇ جايدا ئىكەنلىكى ھەققىدە ٪45 دىن ٪55 گىچە ئىشەنچ بار ئىدى، دېدى. ئاخبارات ۋاسىتىلىرىدە: بىن لادېننىڭ سەئۇدى ئەرەبىستانلىق ئىككى خوتۇنى يەمەنلىك خوتۇنى ئامالنى ئامېرىكا دائىرىلىرىگە خەۋەر يەتكۈزدۇڭ، شۇڭا ئامېرىكىلىقلار بىن لادېننىڭ يوشۇرۇنغان جايىنى تېپىۋالدى، دەپ ئەيىبلەۋاتىدۇ، دېيىلدى. لېكىن، CIA نىڭ سابىق ئەمەلدارى كىلەن كار: ئامېرىكا ئاخبارات دائىرىلىرى نەچچە يىلدىن بۇيان توپلىغان ئاخباراتلاردىن خاتىرە تەييارلىغان بولۇشى مۇمكىن، دېدى.