11-نۆۋەتلىك مەملىكەتلىك خەلق قۇرۇلتىيى دائىمىي كومىتېتى 22-قېتىملىق يىغىنى 25-ئاۋغۇست 2-قېتىملىق ئومۇمىي ئەزالار يىغىنى ئاچتى.گوۋۇيۈەننىڭ ھاۋالىسى بويىچە،دۆلەت ئىسلاھات-تەرەققىيات كومىتېتىنىڭ مۇدىرى جاڭ پىڭ بۇ يىلدىن بۇيانقى خەلق ئىگىلىكى ۋە ئىجتىمائىي پىلاننىڭ ئىجرا قىلىنىش ئەھۋالىدىن دوكلات بەردى.
دوكلاتتا مۇنداق دېيىلدى:بۇ يىلدىن بۇيان،مەملىكىتىمىزنىڭ خەلق ئىگىلىكى سىجىل يۆنىلىشتە تەرەققىي قىلىپ،ھەر قايسى جەھەتلەردىكى خىزمەتلەردە يېڭى نەتىجىلەر قولغا كەلتۈرۈلدى.تۈرلۈك سىياسەتلەرنىڭ تۈرتكىسىدە،ئىقتىسادنىڭ سۈرئىتى مۇقىم بولدى.دەسلەپكى تەكشۈرۈشتىن قارىغاندا،ئالدىنقى يېرىم يىلدا دۆلىتىمىزنىڭ ئىچكى ئىشلەپچىقىرىش ئومۇمىي قىممىتى ئوخشاش مەزگىلدىكىگە سېلىشتۇرغاندا 9.6 پىرسەنت ئاشقان.بۇنىڭ ئىچىدە،1- ۋە 2-پەسىلدە ئايرىم-ئايرىم ھالدا 9.7 پىرسەنت ۋە 9.5 پىرسەنت ئاشقان،بۇ ئۆتكەن يىلىدىكى 3- ۋە 4-پەسىلدىكى 9.6 پىرسەنت ۋە 9.8 پىرسەنتلىك ئېشىش بىلەن ئاساسەن تەڭلەشكەن.
باھا ئومۇمىي سەۋىيىسىنىڭ ئۆسۈشى مۇقىم بولغان.ئالدىنقى يەتتە ئايدا ئاھالىلەرنىڭ ئىستېمال باھاسى ئوخشاش مەزگىلدىكىدىن 5.5 پىرسەنت ئۆرلىگەن.
قىسمەن شەھەرلەرنىڭ ئۆي باھاسىنىڭ ئۆسۈشى كۆرۈنەرلىك تۆۋەنلىگەن.نۆۋەتتە،بىر قىسىم شەھەرلەرنىڭ ئۆي باھاسىدا چۈشۈش كۆرۈلگەن.70 چوڭ-ئوتتۇرا شەھەر ئىچىدە،7-ئايدا 14 شەھەرنىڭ تۇرالغۇ ئۆي باھاسى 6-ئايغا سېلىشتۇرغاندا چۈشكەن.17 شەھەرنىڭ تۇرالغۇ ئۆي باھاسى مۇقىم بولغان.
پاتېنت ئىلتىماسى كۆرۈنەرلىك ئاشقان.ئالدىنقى 7-ئايدا دۆلەت ئىچىدىن 200 مىڭ پارچە پاتېنت ئىلتىماسى تاپشۇرۇۋېلىنغان بولۇپ،ئوخشاش مەزگىلدىكىدىن 43.9 پىرسەنت ئاشقان،پاتېنت بېرىلگەن كەشپىيات 62 مىڭ پارچە بولۇپ،50.7 پىرسەنت ئاشقان.
ئىشقا ئورۇنلاشتۇرۇش ۋە ئاھالىلەرنىڭ كىرىم سەۋىيىسى كۆرۈنەرلىك ئاشقان.ئالدىنقى يېرىم يىلدا،شەھەر-بازار ئاھالىلىرىنىڭ ئوتتۇرىچە كىرىمى 11مىڭ 41 يۈەن بولغان بولۇپ،باھا ئامىلىنى چىقىرىۋەتكەندە 7.6 پىرسەنت ئاشقان.يېزا ئاھالىلىرىنىڭ ئوتتۇرىچە ساپ پۇل كىرىمى 3706 يۈەن بولغان بولۇپ،ئوخشاش مەزگىلدىكىدىن 13.7 پىرسەنت ئاشقان.
كاپالەت خاراكتېرلىك ئولتۇراقلاشتۇرۇش قۇرۇلۇشى سالمىقى زورايتىلدى.نۆۋەتتە ئەرزان ئىجارىلىك ئۆي،ئاممىۋى ئىجارە ئۆي ۋە باشقا تۈرلۈك كەپىلىك ئۆيلەرنى ئۆزگەرتىش قاتارلىق ۋەزىپىلەرنى ئورۇنلاشتۇرۇش ئومۇميۈزلۈك ئەمەلىيلىشىپ بولدى.مەركەز ئاجراتقان مەبلەغمۇ ئەمەلىيلىشىپ بولدى.7-ئاينىڭ ئاخىرىغا قەدەر،مەملىكەت بويىچە كاپالەت خاراكتېرلىك تۇرالغۇ ئۆي ۋە كەپىلىك ئۆيلەرنى ئۆزگەرتىش قۇرۇلۇشى ئېلىپ بېرىپ،جەمئىي 7 مىليون 218 مىڭ يورۇش ئۆي قۇرۇلۇشىدا ئىش باشلىدى،ئىش باشلاش نىسبىتى 72 پىرسەنتكە يەتتى.