(قىستۇرما رەسىم)

     لاتارىيە دېگەن ئاجايىپ نەرسىكەن، 10 يىلدىن كۆپرەك ۋاقىت ئويناپمۇ بىرەر قېتىم تۈزۈكرەك مۇكاپات چىقىپ باقمىغانلارمۇ بار ئىكەن، يەنە شۇنداق تەلەيلىك ئادەملەرمۇ بولىدىكەن، ئۇلار كۆڭلىدە بۈگۈن بىر چوڭ مۇكاپات بار دەپ ئويلاپلا بىر نەچچە يۈەنلىك لاتارىيە ئېلىپ قويسا راست مۇكاپات چىقىپ بىر كېچىدىلا بىرەر مىرلىياد، بىرەر مىليون ياكى يوق دېگەندىمۇ بىرەر يۈزمىڭ يۈەننىڭ ئىگىسى بولۇپ قالىدىكەن، خۇددى چۈش كۆرگەندەكلا. لاتارىيە ئوينايدىغانلارنىڭ ئىچىدىمۇ ھەرخىل ئادەملەر بولىدىكەن، بايلار، گادايلار، ئوقۇتقۇچى-ئوقۇغۇچىلار، دوختۇرلار...ۋاھاكازلار.  ھەتتا ھېچ ئىش قىلماي كۈنلەپ-كۈنلەپ لاتارىيە دۇكىنى ياكى لاتارىيە تور بېكەتلىرىدىن چىقماي تەھلىل قىلىدىغانلارمۇ بولىدىكەن. مېنىڭ ئەتراپىمدىمۇ شۇنداق لاتارىيە ھەۋەسكارلىرىدىن بىر قانچىسى بار، ئۇلارنىڭ تارىخمۇ ئانچە قىسقا ئەمەس، لېكىن ھازىرغىچە بىرەر قېتىم چىرايىغا كۈلكە يۈگۈرگۈدەك مۇكاپات چىقىپ باققانلىقىنى ئاڭلاپ باقمىدىم. ئاندىن لاتارىيە ئوينايدىغانلار ئارىسىدا ھەر خىل گۇرۇپپىلار بولىدىكەن، مەسىلەن : ئاتا-بالا، ئانا-بالا(قىزبالا)، ئاشىق-مەشۇق، ئەر-ئايال، دوست...دېگەندەك. بۇلارنىڭ ئارىسىدىمۇ ئاجايىپ ئادەم ھەيران قالغۇدەك رىۋايەت تۈسىنى ئالغان ئىشلار يۈز بېرىپ تۇرىدىكەن. بۈگۈن بىز تۆۋەندىكى بىر قانچە لاتارىيە رىۋايەتلىرىگە قاراپ باقايلى:

    1-رىۋايەت:  ئاتا-بالا ئوخشاش ساندا بىر مىليون 370 مىڭ مۇكاپاتقا ئېرىشكەن
     شىيەنياڭلىق ئاتا-بالا ئېرىشكەن بۇ مۇكاپات 2-دەرىجىلىك مۇكاپات بولۇپ، لاتارىيە بېلىتىنى ئوغلى ئالغان. ئوغلىنىڭ سۆزلەپ بېرىشىچە، مۇكاپات چىققان نومۇرلارنى ئوغلى تاللىغان بولۇپ ئىزچىل ئوخشاش نومۇرنى ئېلىۋاتقىلى 5 سان بولغانىكەن. سېتىلىشتىن توختايدىغان كۈنى ئاتىسى ئوغىلىغا تېلېفون بېرىپ ئۆزىگە لاتارىيە بېلىتى ئېلىپ قويۇشنى تاپىلىغان، لېكىن قايسى ساننى ئېلىشنى ئېيتمىغان، شۇنىڭ بىلەن ئوغلى ئۆزى ئالغان ساننى 5 ھەسسىلەپ قايتا ئېلىپ قويغان. مۇكاپات ئېچىلغان كۈنى كەچتە ئۇلار بىرلىكتە مۇكاپات ئالغىلى كەلگەن. ئاتىسى: « گەرچە كۈندە بىر ئۆيدە ياشاۋاتقان بولساقمۇ كۈتۈلمىگەن زىددىيەتلەرنىڭ كېلىپ چىقىشىنىڭ ئالدىنى ئېلىش ئۈچۈن، مۇكاپاتنى ئايرىم ئېلىشنى ئويلاشتۇق، مەن بۇ پۇللارنى ساقلاپ قويىمەن، ئاخىرىدا بۇ پۇللار يەنىلا باللىرىمنىڭ بولىدۇ. » دېگەن.

     2-رىۋايەت: ئاتا-بالا بىرلىشىپ لاتارىيە ئويناپ 5 مىليون مۇكاپاتقا ئېرىشكەن
     2010-يىلى 5-ئاينىڭ 26-كۈنى، جىياڭسۇ ئۆلكىسىنىڭ مەلۇم بىر مۇكاپات نەقلەشتۈرۈش زالى ئاتا-بالىدىن تەشكىل تاپقان لاتارىيە گۇرۇپپىسىنى قارشى ئالدى، چۈنكى ئۇلار 5 مىليون مۇكاپاتقا ئېرىشكەنتى.
      بۇ ئاتا-بالىنىڭ فامىلىسى سۈن بولۇپ، شۈجۇلۇق ئىكەن. سۈن فامىلىلىك بۇ ئاتا لاتارىيە ئويناۋاتقىلى 10 يىلدىن كۆپرەك ۋاقىت بولغان كونا لاتارىيىچى ئىكەن. ئەمما ئوغلى ئەسلىدە بۇنداق ئىشلارغا قىزىقمايدىغان بولۇپ، ئاتىسىنىڭ تەسىرىدە ئويناۋاتقىلى ئەمدى ئۈچ يىل بولغان «يېڭى ئۈگەنچى» ئىكەن. كۆپىنچە ھالدا ئوغلى تاللىغان نومۇرلارنى ئاتىسى كۆرۈپ ئانچە-مۇنچە پىكىر-تەكلىپلەرنى بېرىپ تۇرىدىكەن، 5 مىليون مۇكاپات چىقىشنىڭ ئالدىدا ئوغلى ئالغان بىر قانچە ساندا ئاز بولسىمۇ مۇكاپات چىقىپ تۇرغان بولغاچقا ئاتىسىنىڭ خۇي سەل تۇتۇپ ئوغلىغا كىم كۆپ مۇكاپاتقا ئېرىشەلەيدۇ دەپ جەڭ ئېلان قىلغان، نەتىجىدە ئۇزۇن ئۆتمەيلا ئاتا-بالا ئىككىسى ئۆزلىرى تاللىغان نومۇرلار بويىچە 5 مىليون مۇكاپاتقا ئېرىشكەن.

     3-رىۋايەت: ئاتا-بالا ئۈچەيلەن بىرلىشىپ 6 مىليون 720 مىڭ فوندستېرلىڭ مۇكاپاتقا ئېرىشكەن
      ئەنگلىيەلىك ئاتا-بالا ئۈچەيلەن : ئاتىسى لېس، ئاكسى32 ياشلىق ئىئان ۋە ئىنىسى 28 ياشلىق مارك ئىزچىل بىرلىشىپ لاتارىيە ئوينىغان. ئۇلار ئاخىرى 6 مىليون 720 مىڭ فوندستېرلىڭ مۇكاپاتقا ئېرىشىپ 2 مىليون 240 مىڭدىن بۆلۈشكەن. ئىئان تېلېۋىزوردىن مۇكاپات چىققانلىقىنى بىلگەندىن كېيىن تازا ئىشىنىپ كېتەلمەي ئىنىسىغا تېلېفون قىلغان. ئىنىسىمۇ ئىشەنمەي ئاخىرى لاتارىيە نەقلەشتۈرۈش مەركىزىگە تېلېفون بېرىپ ئاندىن كۆڭلى خاتىرجەم بولغان. ئۇلار بېلەتنى بىر ئەسكى پىرەنىك قۇتىسىدا ساقلايدىغان بولۇپ، مۇكاپات چىققاندىن كېيىن بىرەر ئىش بولۇپ قالمىسۇن دەپ مەخسۇس كۆزەتكەن ۋە دائىم ئورۇن ئالماشتۇرۇپ تەكشۈرۈپ تۇرغان.
      مۇكاپاتنى نەقلەشتۈرۈپ بولغاندىن كېيىن ئاكسى ئىلگىرىكى خىزمىتىدىن ئىستېپا بېرىپ ئىنىسىنىڭ سودىسىغا قارىشىپ بېرىشكە قوشۇلغان. مارك: « راستىنى ئېيتسام ئاكامغا قوش خۇشاللىق بولدى، بىرى ئۇ چوڭ مۇكاپاتقا ئېرىشتى، يەنە بىر بولسا بۇ يىل 10-ئاينىڭ 25-كۈنى ئۇلارنىڭ توي قىلغان خاتىرە كۈنى ئىدى. ئاكامنىڭ ئىككى بالىسى بار، ئۇلار ئەمدى يېڭى ئۆيگە، يېڭى ئۆسۈپ يېتىلىش مۇھىتىغا ئېرىشىدۇ. » دېدى.

     4-رىۋايەت: دەھشەت ئاتا-بالا! ئىككى يىلدا جەمئىي 15 مىليون 480 مىڭ يۈەن مۇكاپاتقا ئېرىشكەن
      11075-ساننىڭ مۇكاپاتنى نەقلەشتۈرۈش مەيدانىدا لاتارىيە مەركىزىدىكى مۇناسىۋەتلىك خادىملارنى بىر كىشى قورقۇتۇۋەتكەن. ئۇ كىشىنىڭ ئېيتىشىچە، بۇ قېتىمقى 7 مىليون 240 مىڭ يۈەن مۇكاپات ئېلىشى ئۇنىڭ 1-قېتىم مۇكاپات ئېلىشى ئەمەسكەن. ئالدىنقى يىلى ھازىرقىدىن كۆپ مۇكاپاتقا ئېرىشكەن بولۇپ مۇكاپات سوممىسى 8 مىليون 240 مىڭ يۈەن ئىكەن. بۇ كىشىنىڭ فامىلىسى ئىلى بولۇپ، ئۇ دائىم ئاتىسى بىلەن ئۆيىدە لاتارىيە توغرىلىق پىكىر ئالماشتۇرۇپ تۇرىدىكەن.

    5-رىۋايەت: بۇ رىۋايەت ئەمەس، بۇ تەھرىرنىڭ سەمىمىي ئەسكەرتمىسى !
      لاتارىيە ئويناش خاتا ئەمەس، ئەمما يوتقانغا قاراپ پۇت سۇنۇش كېرەك.  باشقىلارنىڭ يۇقىرىقىدەك مۇكاپاتقا ئېرىشىش خەۋەرلىرىنى ئاڭلىغاندا مەنمۇ جىقراق ئويناپ قويسام ئىتتىكرەك چوڭ مۇكاپاتقا ئېرىشىپ قالغۇدەكمەن... دېگەندەك بىمەنە قاراش بىلەن قارىغۇلارچە لاتارىيە ئوينىماسلىق كېرەك. كەلمىگەن تەلەيدە ھېچ كىمنىڭ ھەققى يوق، ئەگەر تەلەي كەلسە توسۇۋالغىلىمۇ بولمايدۇ، شۇڭا لاتارىيىگە سوغۇق قانلىق بىلەن مۇئامىلە قىلىش كېرەك.