جۇڭگو ئاخبارات تورىنىڭ 5-ئاينىڭ 4-كۈنىدىكى خەۋىرى: «بازا»تەشكىلاتىنىڭ كاتتىبېشى بىن لادېن ئۆلتۈرۈلگەندىن كېيىن، ئاق ساراي  ھۇجۇمغا مۇناسىۋەتلىك تېخىمۇ كۆپ ئۇچۇرلارنى ئېلان قىلغان، ئىسمى ئاشكارلانمىغان ئەمەلدارنىڭ ئاشكارلىشىغا قارىغاندا، ئوق  بىن لادېننىڭ سول كۆزىنىڭ ئۈستىنكى قىسىمىغا تەگكەن بولۇپ، قىسمەن باش سۆڭىكى ئاجراپ كەتكەن.
بۇ قېتىمقى ھۇجۇمنى ئېلىپ بارغان ئامېرىكا دېڭىز يىلپىزى گازارما ئەترىتى 6-كىچىك ئەترىتىدىكى 24 نەپەر ئەسكەر، پاكىستان ۋاقتى 1-ماي يېرىم كېچىدە 4 تىك  ئۇچار ئايروپىلانغا ئولتۇرۇپ، پاكىستاننىڭ شىمالىي قىسمىدىكى ھاۋا ئارمىيە بازىسىدىن يولغا چىقىپ، ئىككىنچى كۈنى سەھەر سائەت 1 دىن ئاشقاندا بىن لادېن يوشۇرۇنغان ئەببوتئابادقا ئۇچۇپ بارغان.
بۇنىڭ ئىچىدىكى بىر تىك ئۇچار ئايروپىلاندىن كاشىلا چىققاچقا، بىن لادېننىڭ تۇرالغۇسىنىڭ ئەتراپىغا پاراشوت بىلەن چۈشۈپ، سىرتقى مۇستەھكەم ئىستىھكامىغا ھۇجۇم قىلغان، ئامېرىكا ئارمىيسى تۇرالغۇغا كىرىپ، ئىككىنچى قەۋەتتىن بىن لادېننى تاپقان ھەمدە تەسلىم بولۇشنى ئېيتقان، بىراق بىن لادېننىڭ رەت قىلىپ قارشىلىق كۆرسىتىشىگە ئۇچرىغاچقا،  بىن لادېننىڭ كۆكرەك قىسمى ۋە سول كۆزىنىڭ ئۈستىگە ئوق ئېتىپ ئۆلتۈرگەن.
بۇ قېتىمقى ھۇجۇمدا بىن لادېندىن باشقا يەنە 3 ئەر، 1 ئايالمۇ ئېتىپ ئۆلتۈرۈلگەن، بۇنىڭ ئىچىدە بىن لادېننىڭ ئوغلى ھەم ئەڭ ئىشەنچىلىك ئادىمى ئەھمەد ۋە ئۇكىسىمۇ بار ئىكەن. بىن لادېننىڭ يەنە بىر ئۆيىدە 9 ئايال ۋە 23 ئۆسمۈر بالا بار بولۇپ، ئامېرىكا تەرەپ ئۇلارنى پاكىستان دائىرىسىگە ئورۇنلاشتۇرغان.
ھۇجۇم قىلىشقا قاتناشقان دېڭىز يىلپىزى گازارما ئەترىتى بىن لادېننىڭ تۇرالغۇسىنى تەكشۈرگەندىن كېيىن،  بىن لادېننىڭ كومپيوتېر قاتتىق دېسكىسى، DVD ۋە باشقا سانلىق مەلۇماتلارنى بىن لادېننىڭ جەسىتى بىلەن قوشۇپ ئېلىپ كەتكەن. قاتتىق دېسكا ۋە ئالاقىدار سانلىق مەلۇماتلارنى ئامېرىكا مەركىزىي ئاخبارات ئىدارىسىنىڭ تەتقىق قىلىشىغا تاپشۇرۇپ بەرگەن، ئۇلار بۇ ماتىرىياللار ئارقىلىق «بازا»تەشكىلاتىنىڭ ئىككىنچى ئاتامانى زاۋاھىرىنىڭ يۇشۇرۇنغان جايىغا مۇناسىۋەتلىك يىپ ئۇچىغا ئېرىشىشنى ئۈمىد قىلىدىكەن.

ئامېرىكا فىدراتسىيە تەكشۈرۈش ئىدارىسىنىڭ ئېيتىشىچە، بىن لادېننىڭ جەسىتىنىڭ رەسىمىگە تەقلىد قىلىپ ياسالغان رەسىملەردە ۋىروس بار ئىكەن

بىن لادىننىڭ ئېتىپ ئۆلتۈرۈلۈشى پۈتۈن دۇنيانىڭ دىققىتىنى تارتقان بولغاچقا، ئامېرىكا فىدراتسىيە تەكشۈرۈش ئىدارىسى تورداشلارنى ئەگەر بىن لادىننىڭ ئېتىپ تاشلانغانلىقىغا تەقلىد قىلىپ ياسالغان سۈرەت ۋە كىنو قاتارلىق ئېلخەتلەرنى تاپشۇرۇپ ئالسا ھەرگىز قوزغاتماسلىققا ئاگاھلاندۇرغان.
 ئامېرىكا فىدراتسىيە تەكشۈرۈش ئىدارىسىنىڭ بىلدۈرۈشىچە، بۇ خىل ئېلخەتلەردە ۋىرۇس بولۇپ،  بۇ ۋىروسلار ئارقىلىق سانلىق مەلۇماتلارنى ئوغرىلايدىكەن ۋە كومپيۇتىرنى يۇقۇملاندۇرالايدىكەن.
ئامېرىكا فىداتسىيە تەكشۈرۈش ئىدارىسى بايانات ئېلان قىلىپ، بۇ خىلدىكى يامان نىيەتلىك يۇمشاق دىتاللار بەلكىم دوستلار ۋە ئائىلە ئەزالىرى بىلمىگەن ئەھۋال ئاستىدا تارقىلىشى مۇمكىنكەن.
ئامېرىكا فىداتسىيە تەكشۈرۈش ئىدارىسى كۆپچىلىكنى تور بەتنىڭ تۈزۈلمىسىنى تەڭشەپ، يامان نىيەتلىك نەرسىلەرنىڭ بۆسۈپ كىرىشىدىن ساقلىنىشنى تەشەببۇس قىلغان.