ئەي قىز ئاگاھ بولۇڭ – ئىللەت تۈزەلمىسە ، مىللەت تۈزەلمەيدۇ
1. ھاكاۋۇرلۇق ، مەنمەنلىك ، ماختانچاقلىقتىن ساقلىنىڭ .
2. قوشنا – قولۇم ، دوست – بۇرادەر ، خىزمەتداشلىرىڭىزنىڭ كەينىدىن غەيۋەت قىلماڭ .
3. سەۋىر – تاقەتلىك بولۇڭ . ھەر قانداق جايدا باشقىلارنىڭ سۆزى تۈگىمىگۈچە ئالدىراپ گەپنىڭ بېلىگە تېپىپ ، قوشۇق سالماڭ .
4. ئۆزىڭىزگە تەلەپچان بولۇڭ ، كۆڭۈل – كۆكسىڭىزنى كەڭ توتۇڭ .
5. مېھماندارچىلىققا بارغاندا ، ئۆزئارا قۇلاقنى – قۇلاققا يېقىپ پىچىرلاشماڭ . ئەگەر يېنىڭىزدا ئولتۇرغان كىشىگە مۇھىم گېپىڭىز بولسا ، ئايرىم خالىي جاينى تېپىپ قىلىڭ .
6. ياشانغانلارنى ھۆرمەتلەڭ . مىللىتىمىزنىڭ ئەنئەنىۋىي قائىدىللىرىنى ھەر ۋاقىت ، ھەر جايدا ئېسىڭىزدە چىڭ توتۇڭ .
7. سۆز قىلغاندا مۇلايىم ، سەمىمىي ، كەمتەر بولۇڭ . قولىڭىزنى شىلتىپ ، ۋارقىراپ گەپ قىلىشتىن ساقلىنىڭ . گەپنى قىسقا ، مەزمۇنلۇق قىلىشقا ئادەتلىنىڭ ، بىر گەپنى تەكرارلاۋەرمەڭ .
8. يول يۈرگەندە ياكى بىرەرسى بىلەن سۆزلەشكەندە ، ئىككى قولىڭىزنى كەينىڭىزگە تۇتۇپ تۇرماڭ ، بۇنداق تۇرۇش كىشىلەرگە ھاكاۋۇردەك تۇيغۇ بېرىدۇ . شۇنىڭدەك بىر نەرسە يەپ ، سېغىز چايناپ مېڭىشتىنمۇ ھەزەر ئەيلەڭ .
9. ئەرلەر بار سورۇندا سەت چاقچاقلارنى قىلىشتىن ساقلىنىڭ
10. تاماق يەۋاتقاندا ، بۇرۇن – قۇلاق كوچىلىماڭ ، تۈكۈرمەڭ ، بۇرۇن قاقماڭ ، بېشىڭىزنى قاشلىماڭ ، تىرناق ئالماڭ ، تىرنىقىڭىزنى چىشلىمەڭ .
11. باشقىلاردىن نەرسە – كېرەكلەرنى تولا سورىماڭ ، ئۆتنە ئالغان نەرسىلەرنى ئۆز ۋاقتىدا قايتۇرۇپ بېرىڭ .
12. يالغانچىلىق قىلماڭ ، راستچىل بۇلۇڭ ، ئۆز ئارا گەپ تالاشماڭ .
13. ئىشىك ماراپ ، گەپ تىڭشىماڭ .بۇ ، قولۇم – قوشنىلار ئارا ئىتتىپاققا تەسىر يەتكۈزىدىغان سەت قىلىق .
14. ياش قۇرامىڭىزغا قارىماي ئاجايىب – غارايىب كىيىنىشتىن ، دەرىجىدىن تاشقىرى ھۆسىن تۈزەشتىن ساقلىنىڭ .
15. ھەسەتخورلۇق ، ئىچى تارلىق كېسىلىنى يۇقتۇرۇۋالماڭ . بۇ ، قان چىقارماي جان ئالىدىغان ئەڭ يامان كېسەللەرنىڭ بىرى .
16. دوستىڭىزنىڭ سىزگە ئىشىنىپ دېگەن مەخپىيەتلىكىنى ئىچىڭىزدە چىڭ ساقلاڭ ، ھەرگىز ئاشكارلاپ قويماڭ .
17. خۇشامەتچىلىك ، تەخسىكەشلىك قىلماڭ . بۇ كېسەل سىزنى ئاممىدىن ، دوست – بۇرادەرلىرىڭىزدىن يىراقلاشتۇرۇپ قويۇپلا قالماي ،يەنە سىزنى جامائەتچىلىكنىڭ نەپرىتىگە قويىدۇ .
18. باشقىلارغا قىلغان ياردىمىڭىزگە مىننەت قىلماڭ . مىننەت قىلسىڭىز قىلغان ياخشىلىقىڭىزنى يۇيۇۋېتىسىز .
19. ئالدىدا بىر خىل ، كەينىدە بىر خىل ، ئىككى يۈزلىمە بولماڭ ، سۆزىڭىز بىلەن ئەمەلەيتىڭىز ، تىلىڭىز بىلەن دىلىڭىز بىردەك بولسۇن .
20. ۋىجدانغا ھۆرمەت قىلىڭ ، غۇرۇرىڭىز بىلەن ياشاڭ . ئازغىنە مەنپەئەتنى دەپ تۇيۇق يولغا كىرىپ قالماڭ .
21. ئۆزىڭىزنى تولىمۇ ئىقتىدارسىز ، يارىماس چاغلاپ روھىڭىزنى چۈشۈرمەڭ . ئۈمىدۋار بولۇڭ . دۇنيادا مۇكەممەل ئىنساننىڭ بولمايدىغانلىقىنى ئېسىڭىزدە تۇتۇپ ، غەيرىتىڭىزنى ئۇرغۇتۇپ ، تىرىشىپ ئالغا ئىلگىرىلەڭ .
22. باشقىلار مىنىڭ ھۆرمىتىمنى قىلمىدى ، مېنى ۋاي دېمىدى ، كۆزىگە ئىلمىدى دەپ زارلانماڭ . ئۆز ھۆرمىتىڭىزنى ئۆزىڭىز ساقلاڭ . چۈنكى ھۆرمەت ، ئىناۋەت دېگەننى سېتىۋالىدىغان نەرسە ئەمەس . ئۇ پەقەت ھەر بىر ئادەمنىڭ ئۆز ئەمەلىيتى بىلەن تىكلىنىدىغان ئالىيجاناب ، ئۇلۇغ پەزىلەت .
23. زىبۇ زىننەتنى زىيادە چوڭ ياكى مۇرەككەپ تاقماڭ . بۇ خىل ھالەت چوڭلارغىمۇ ئېغىر كېلىدىغان بولۇپ قىزلارغا ئەسلا ماس كەلمەيدۇ .
24. كىيىم – كېچەكنى زىيادە چاكىنا كەيمەڭ . رەڭگە ۋە پاسونى چاكىنا كىيىملەرنى كەيگەن قىزلارنىڭ ئىستىقباللىق يىگەتلەر بىلەن ئۇچرىشىش پۇرسىتى بولمايدۇ . بۇنداق كىيىملەر بىلەن يۈرىيدىغان قىزلار كېيىن بەختلىك بولالمايدۇ
