پۇتى سۇلۇق ئىششىيدىغان خانىملار بەك جىددىيلىشىپ كەتمىسىمۇ بولىدۇ ، چۈنكى پۇتنىڭ سۇلۇق ئىششىشىنىڭ كېسەللىك بولۇشى ناتايىن . تەخمىنەن %40 ئوتتۇرا ياشلىق خانىملاردا ئوخشاشمىغان دەرىجىدە پۇت ئىششىقى كۆرۈلىدۇ . بۇ تەندىكى ئانىلىق گورموننىڭ رولى پەيدا قىلغان بىر خىل فىزىئولوگىيىلىك ھادىسىدۇر .
ئانىلىق گورمون بىلەن ھامىلدارلىق گورمونىنىڭ ھەيز دەۋرىنىڭ ھەرقايسى مەزگىللىرىدىكى ئاجرىلىپ چىقىش مىقدارى ئوخشىمايدۇ ، ئادەتتە ئالدىنقى قېتىملىق ھەيز توختىلغاندىن كېيىنكى ئون كۈن ئىچىدە تۇخۇمدان تۇخۇم چىقىرىشقا باشلايدۇ ، بۇ چاغدا كۆپ مىقداردا ئانىلىق گورمون قويۇپ بېرىلىپ ، ھەيزنىڭ ئۇلغىيىپ كېلىشى سەۋەبلىك چۈشۈپ كەتكەن بالىياتقۇ ئىچكى پەردىسى تولۇقلىنىدۇ . شۇنىڭ بىلەن بىللە ، ئانىلىق گورمون يەنە تەندە ئالدوستېرون گورموننىڭ كۆپلەپ ئاجرىلىشغا تۈرتكە بولۇپ ، ناترىي ئىئونىنىڭ تەندە يىغىلىپ قېلىشغا سەۋەب بولىدۇ . تەن سويۇقلۇقىدا ناترىي ئىئون ئېشىپ كەتسە ، سۇ تەركىبىنىڭ ھۈجەيرىنىڭ ئىچكى قىسمىدا كۆپلەپ تۇرۇپ قېلىشغا سەۋەب بولىدۇ ، شۇ ئارقىلىق سۇلۇق ئىششىق شەكىللىنىدۇ . ئادەمنىڭ پۇتىدىكى ۋېنادا ۋېنا كلاپىنى ئاز بولغاچقا ، ھەمىشە پۇتتا قان يىغىپ قالىدۇ ، شۇڭا ئادەم سۇلۇق ئىششىسا ، كۆپىنچە پۇتى ئىششىيدۇ .
بۇنداق سۇلۇق ئىششىق ھەمىشە ھەيز كېلىشتىن ئىلگىرىكى يەتتە كۈندىن 14 كۈنگىچە بولغان ئارىلىقتا كۆرۈلىدۇ ، بولۇپمۇ ھەيز كېلىشتىن ئىلگىرىكى ئىككى – ئۈچ كۈندە ئەڭ ئېغىر بولىدۇ ، ھەيز توختىغاندىن كېيىن تېزلا يېنىپ كېتىدۇ ، شۇنىڭدەك ئايمۇ ئاي شۇنداق بولۇپ ، نەچچە يىل ، ھەتتا ئون نەچچە يىل داۋاملىشىپ ، تاكى ھەيز كېسىلگەندە توختايدۇ . شۇڭا پۇتى سۇلۇق ئىششىيدىغان خانىملار تۆۋەندىكى بىر نەچچە نۇقتىغا دىققەت قىلىشى ھاجەت :
ئوتتۇرا ياشلىق خانىملارنىڭ پۇتى سۇلۇق ئىششىسا ، دوختۇرخانىدا تەكشۈرتۈپ ، پۇتىنىڭ سۇلۇق ئىششىنىڭ سۈيدۈك يولى ياللۇغى ، دوۋساق ياللۇغى ۋە بۆرەك ياللۇغى سەۋەبىدىن بولغان – بولمىغانلىقىنى ئايرىتىشى كېرەك .
پۇتى سۇلۇق ئىششىيدىغان ئاز ساندىكى خانىملار ھامىلدارلىقتىن ساقلىنىش دورىسى ئىشلىتىپ داۋالانسا ، دورا مەنبەلىك سۇلۇق ئىششىق كۆرۈلىدۇ ، ئۇنداق دورىلارنى ئىشلىتىشنى توختاتقاندىن كېيىن ، ئىششىق ئاستا – ئاستا يېنىپ ، داۋالىتىشنىڭ ھاجىتى قالمايدۇ .
پۇتى سۇلۇق ئىششىيدىغان خانىملار ئادەتتە تۇزى كەمرەك ئوزۇقلانغىنى مۇۋاپىق ، ھەيز كېلىشتىن ئىلگىرى ياكى ھەيز مەزگىلىدە ئاش – تاماقنى تۇزسىزراق يەپ ، سۇ ۋە ناترىينىڭ تۇرۇپ قېلىشنى ئازايتقاندا ، سۇلۇق ئىششىقىنى يەڭگىلەتكىلى ۋە ئۇنىڭ كۆرۈلۈشىنىڭ ئالدىنى ئالغىلى بولىدۇ .
