تەۋقىڭنى چاقار بولساڭ،سەۋدايى جۇنۇن بولغىن،
لەيلىگە ياقار بولساڭ،شەيدائى جۇنۇن بولغىن.
كۆيۈكتىن ۋۇجۇدۇڭ چوغ،كۆتۈرگەچ ئىشقتىن تۇغ،
خاھ كۆزلەر تىكىلسۇن سوغ،رەسۋايى جۇنۇن بولغىن.
مەشرەپنى قىلىپ ھەيران،شەۋقىڭدىن ياساپ تۇغيان،
قاينىتىپ پاراڭ ھەريان،سازايى جۇنۇن بولغىن.
قىلساڭمۇ جاھاننى بۆك،يوق سەندە كېبىردىن يۈك،
دوختۇرمۇ قىلالماس شۈك،تەرسائى جۇنۇن بولغىن.
ئەركىڭگە تالاپەت يوق،سۆزۈڭگە جىنايەت يوق،
پىكرىڭدە ئاسارەت يوق،ساماۋىي جۇنۇن بولغىن.
بولغىچە ئەجەل ساقى،سەبىلىك ساڭا باقى،
ئەسلىڭدۇر كۆڭۈل پاكى،ھەق رايى جۇنۇن بولغىن.
قەۋمىڭدىن چىقىپ ئۈلگە ، يات قىلسا سېنى گۈلگە،
بوستاندىن قېچىپ چۆلگە، ياۋايى جۇنۇن بولغىن.
بەردەم بول ئاھانەتكە،مەھكەم بول ئامانەتكە،
روھ يەتسۇن بالاغەتكە،پۇر شانى جۇنۇن بولغىن.
