كۈتەلمەيمەن
(بىريىگىتنىڭ تىلىدىن)
ئۇزۇن بولدى،ئازلاپ قالدى سالىمىڭ،
يامان چۈشلەر ئەگىپ قالدى مېنىمۇ.
تۇتۇپ قاپتۇ قونالغۇغا،ئاڭلىسام،
مېھمانساراي،مەيخانىلار سېنىمۇ.
ھەيراندۇرمەن شۇ ئىشلارغە،نىگارىم،
چىقىپ قاپتۇ چىرايىڭنىڭ بازىرى.
بىلەتتىڭغۇ مېنىڭ سەندىن كۈتكىنىم،
ئەمەستىغۇ مۇھەببەتنىڭ مازىرى.
ئورۇن ئاپسەن سەتەڭلارنىڭ سېپىدىن،
بىلىۋاپسەن پۇلنى ئاسان تېپىشنى.
سۈزۈك تاڭدەك بىر قىز تۇرۇپ قانداقچە،
راۋا كۆردۈڭ ئەگگىزلەردە ئېقىشنى؟
مەن ئوتلىغان جىنەستىدەك لېۋىڭدە،
ئۈزۈپ يۈرەر ئاچچىق ھىدى شارابنىڭ.
تال چىۋىقتەك بەللىرىڭدە سوغۇق قول -
سوغۇق سۇنداق،ئاقىۋىتى خارابنىڭ.
تېنەپ يۈرەر تەبەسسۇمىڭ نەلەردە،
ئەۋج ئاپتۇ بۇلۇڭلاردا قاقاقلاش.
خۇشاللىقىڭ مەيخانىدا بولسىلا،
بىھاجەتكەن ئەقىدەمنى ۋاراقلاش.
يېتەلمەيمەن ھالىڭغا مەن،بولدى بەس،
يول قويمايدۇ قەلبىم سېنى ئاقلاشقا.
خەيرلىشەي مەجنۇنلارچە كۈتۈشتىن،
يوقتۇر سەۋەب سېنى يەنە ساقلاشقا!
مەنبە:شىنجاڭ ئاياللىرى
