(ساتىرا)
سىدىق قاۋۇز
يۇرتداشلارغا ئايان ئەزەلدىن،
ئاپتاپپەرەس مۇبارەك ئىسمىم.
بويۇم ئېگىز، تۇرقۇممۇ كۆركەم،
دەرەخ بىلەن ئوخشايدۇ بەستىم.
مېھرىم چوڭقۇر بولغاچ قۇياشقا،
شۇ سۈپەتنى بېرىشكەن ئاۋام.
ئالغاچ كۈندىن گۈلدەك چىراينى،
كۈندە كۈنگە بېرىمەن سالام.
يېتىپ كېلەر دوستلار قاتارى،
ئالتۇن كۈزدە ھوسۇللۇق پەسلىم.
گازىر ئاتلىق رەڭدار ئۈنچىلەر،
بىلىسىلەر ئىپتىخار...نەسلىم.
زىياپەتتە، چاغان، ئايەمدە،
شىرەلەرنىڭ زىننىتى بولدۇم.
ئايلانغاندا مېغىزىم مايغا،
بۆلەكچىلا شادلىققا تولدۇم.
دەر تېۋىپلار: ‹‹شىپالىق گىياھ››،
‹‹دەستۇر››لارنىڭ ئىچىدە تەختىم.
دىتسىزلارنىڭ قولىدا خارمەن،
ئاقىللارنىڭ ئۆيىدە بەختىم.
پەزىلەتسىز بەزىلەر ئەپسۇس،
نامىمغا كۆپ تەگكۈزۈشتى داغ.
تۈگەپ تاقەت، كەلدى ھە مانا،
شىكايەتكە ئېغىز ئاچار چاغ.
ئەخلەت پۈركۈپ كەلسە بەزىلەر،
رەستىلەرنى باسىدۇ چاپاق.
ئۆكسىمەيمەن يېنىدىن ھەرۋاق،
ئۇلار ماڭا شۇ قەدەر ئامراق.
زېرىككەندە، بىكار بولسىلا،
خۇمارىنى باسىدۇ چېقىپ.
يەر تاللىماس قەيەر بولسىلا،
شۆپىكىمنى ماڭىدۇ چېچىپ.
كىنوخانا، باغچا...مەيدانلار،
شۆپىكىمدە بۇلغىنار كۈندە.
توسالمىدى تازىلىق ئىشچىسى،
توۋلىسىمۇ يۇقىرى ئۈندە.
شۆپەكلىرىم بۇلغىسا يەرنى
ئەمەس بۇ ھال مېنىڭ گۇناھىم.
بىراق مېنى ئۆلتۈردى نومۇس،
ئەخلاقسىزغا يەتسىچۇ ئاھىم.
قۇلاق سېلىڭ قىز – يىگىت سىزگە،
ئىلتىجادىن سۆز ئاچتى گازىر.
يارانلىقنى بىلسىڭىز ئەلا،
زۆرۈر شەرتنى تەق قىلىڭ ھازىر.
بىپەرۋالىق ئەپتىدە خانقىز،
پاكىز بولۇڭ، مۇھىتنى ئاسراڭ.
زېمىن بىزنىڭ ئىنىك ئانىمىز،
ئۆرتىنەر دىل باسسا ئۇنى چاڭ.
ئوبرازىمنى تىكلەڭ قايتىدىن،
بولسۇن مېنىڭ تەخسىدە جايىم.
پاكىزلىققا بولايلى كېپىل،
پاسىبانلار يېمىسۇن ۋايىم
