سىز كىلەمسىز بۇياققا،
مەن بارايمۇ ئۇياققا.
ئۆيلەنمىسەم بولمايدۇ،
سىزدەك گۈزەل ئۇماققا!
يارىم ناخشا ئېيتىدۇ،
ئەجەپ مۇڭلۇق، يېقىملىق.
ئايرىلغاندا بىلىندۇ،
كۆڭۈلدىكى يېقىنلىق.
ئېرىقتا بېلىق يارىم،
گەپ - سۆزى سىلىق يارىم.
ساڭا بولغان مۇجەسسەم،
بارچە ئۇز قىلىق يارىم.
بازاردىكى ماللارنىڭ،
ساختا ئىكەن بەزىسى.
راستمىدۇ يالغانمىدۇ،
سەن يارىمنىڭ ۋەدىسى.
تۈن كېچىدە تولدۇردۇم،
قۇشاق يېزىپ دەپتەرنى.
يارىم بىلسۇن بۇنىڭدىن،
ئىچىمدىكى دەرتلەرنى.
ئىككى - ئۈچ تۈپ چىڭگىلىك،
يامىشىپتۇ يۇلغۇنغا.
ئاغرىمىدى ئىچىڭىز،
مەندەك كۆڭلى سۇلغۇنغا.
قارىسايغا كىرگىچە،
ئونيەتتە يەردە مەدرىسە،
مەن يارىمنى چاقىرچام،
ئۇمۇ دەرھال ھە دېسە.
گەپ قىلمىسام،زېرىكمەڭ،
چاقچاق قىلسام تېرىكمەڭ.
ۋەدىلەشكەن ۋاقىتتىن،
ئۆتكەنكىدەك كېچىكمەڭ.
ئاخشىمى قاراڭغۇدا،
ئارزۇ قىلىمەن ئاينى.
سەن يادىمغا يەتكەندە،
ئىچمەي قويىمەن چاينى.
يارىم كۆينەك كىيىپتۇ،
ئاق تاۋاركەن گۈلى يوق.
ئىشقىڭىزدا يۈرىكىم،
كۆيۈپ بولدى كۈلى يوق.
قوشنىمىزنىڭ قىزى بار،
بويى زىلۋا چىۋىقتەك.
جاننى ئېلىپ قاچىدۇ،
قەددى مەغرۇر كېيىكتەك.
ئالتۇن باغلىق سائىتىم،
كۈمۈش باغلىق سائىتىم.
يارىم بولسا ۋاپادار،
كەلگىنى شۇ ئامىتىم.
ئاڭلىنىدۇ يىراقتىن،
ترەكتورنىڭ شەپىسى.
ھەرگىز يالغان بولمىسۇن،
ئىككىمىزنىڭ ۋەدىسى.
ئاخشىمى قاراڭغۇدا،
ئوت كۆرۈندى يىراقتا.
قاچانغىچە يۈرەرمىز،
بۇ ھىجراندا - پىراقتا.
قوغۇننىڭ پىلىكى بۇ،
تاۋۇزنىڭ پىلىكى بۇ.
سىزگە تۇتقان قىزىلگۈل،
ئاشىقنىڭ يۈرىكى بۇ
