دېھقان
غۇلامجان قادىر قۇتبىلىگ
سەھەر بولماستىن سۈبىھىدە ئېتىزغا يول ئالار دېھقان،
تەبىئەت قوينىدا چوغدەك لاۋۇلداپ زەپ يانار دېھقان.
مېھىر بىرلە ئېچىپ يەرنى، تۆكىدۇ ساپ-ھالال تەرىنى،
ئاشۇ ئەجرى بىلەن خۇش، ئۇ زېمىنىغا دان سالار دېھقان.
شەھەرلەردە ياشاپ يۈرگەن پۇچەك بايۋەچچىلەر بەزەن،
گېپى يا ھەركىتى چانسا، مازاقلارغا دۇچار دېھقان.
تومۇرۇڭدا قېنىڭدۇر ئۇ، ھاياتلىقتا جېنىڭدۇر ئۇ،
ھاقارەتلەشكە ھەققىڭ يوق، سېنى ئۈچ ۋاق باقار دېھقان.
قورساقنىڭ توق بولۇشىغا ھەم كۆڭۈلنىڭ شوخ بولۇشىغا،
سېلىنغان كاتتا داستىخان، ھۆسن-زىننەت قوشار دېھقان.
ساناپ كەلسەم تۈگىمەس ھېچ ئۇنىڭ بەرگەنلىرى ئەلگە،
سانىغانچە ئاڭا ھۆرمەت تېخىمۇ ئاشار دېھقان.
ھايات باغرىغا گۈلخان ئۇ، كۆڭۈللەر تەختىدە خان ئۇ،
تۆھپىلەر بابىدا ھەر چاغ جۇلالاپ نۇر چاچار دېھقان.
روزى سايىت بەلەن يازغان، ساڭا دۇردانىلەر قازغان،
پېقىر يازساممۇ مىڭ داستان، تەرىپى كەم قالار دېھقان.
___ شىنجاڭ قانۇنچىلىق گېزىتى
