كۆيۈپ بىر ئوت بىلەن ھەردەم شېئىر يازماقنى ئىزدەيمەن،
شۇڭا مېھنەت تېغىدىن دۇر-گۆھەر قازماقنى ئىزدەيمەن.
قاداق باسقۇنچە پۇتلارنى ياياق يۈرمەسكە نە چارە؟
تېرىشكە مەنىۋىي گۈللەر گۈزەل يايلاقنى ئىزدەيمەن.
غىزالار تېتىماي كۈندۈز،كېچە بىدار ساناپ يۇلتۇز،
كۈنۇ-تۇن ئالدىراپ ئىلھام كېلەر پەيت-ۋاقنى ئىزدەيمەن.
قاچامنىڭ ئۇزلۇقى بىر گەپ،تائامىمنى تېتىپ كۆر يەپ،
چىنەمدە تۇتقىلى، خەلقىم، ھەسەل قايماقنى ئىزدەيمەن.
تىلىمدىن ياخشىغا-مەردكە سۇنۇپ گۈلدەستىلەر كۆركەم،
ئۇرۇشقا ئادىمىي ھايۋان تىكەن يانتاقنى ئىزدەيمەن.
گۈزەل مەنزىل يىراق، ئەمما ئۈمىدىم يۇلتۇزى چاقناق،
شېئىردا بولسا پەرۋازىم، ئۇچاي قانداقنى ئىزدەيمەن.
