| نۇرمۇھەممەت ئابلىز 1991 – يىلى شىنجاڭ سەنئەت ئىنىستىتۇتىنىڭ گۈزەل سەنئەت فاكولتېتى ماي بوياق تولۇق كۇرس سىنىپىنى پۈتكۈزگەن . 2001 – يىلىدىن 2003 – يىلىغىچە ، ئاتاقلىق رەسسام تۇردى ئىمىننىڭ جۇڭگوچە رەسىم تەتقىقات ئىشخانىسىدا بىلىم ئاشۇرغان . ئۇ ھازىر شىنجاڭ سەنئەت ئىنىستىتۇتى گۈزەل سەنئەت فاكولتېتىنىڭ لېكتورى : تاڭشەن ئىنىستىتۇتى رەسساملار ئاكادېمىيىسىنىڭ تەكلىپلىك رەسسامى .
ئۇ ، ئالدىنقى ئەسىرنىڭ 90 – يىللىرىنىڭ باشلىرىدا گۈزەل سەنئەت ئىجادىيتى بىلەن شوغۇللانغان بولۇپ ، مول مىللىي ئالاھىدلىك ۋە يەرلىك ئالاھىدلىككە ئىگە ئەسەرلەرنى ئىجاد قىلىپ ، كۆزگە كۆرۈنەرلىك نەتىجىلەرگە ئېرىشكەن . ئۇنىڭ ‹‹ تەكلىماكاندىكى كەنت ›› ، ‹‹ قەشقەر كوچىسى ›› ، ‹‹ قايتىش ›› ، ‹‹ تاقىچى ›› ، ‹‹ سوۋغات ›› ، ‹‹ ئايال سازەندىلەر ›› ، ‹‹ قەشقەر تەسىراتلىرى ›› ، ‹‹ نەغمە – ناۋا ›› ، ‹‹ بازار ›› ، ‹‹ توي ›› ، ‹‹ تۆمۈرچىلىك دۇكىنى ›› ، ‹‹ يىللار ئىزناسى ›› ، ‹‹ مەشرەپ ›› قاتارلىق ماي بوياق رەسىم ، جۇڭگوچە رەسىم ، تام رەسىملىرى ئەسەرلىرى ئاپتونوم رايونىمىزدا ئۆتكۈزۈلگەن تۈرلۈك گۈزەل سەنئەت كۆرگەزمىلىرىگە تاللانغان ، ھەمدە بىر قىسىم ئەسەرلىرى ئالتۇن مېدال ، 1 – دەرىجىلىك مۇكاپات ، ئىلمىي مۇكاپات ، ۋە مۇنەۋۋەر ئەسەر مۇكاپاتلىرىغا ئېرىشكەن .
ئۇنىڭدىن باشقا ، ئۇنىڭ 80 پارچىدىن ئارتۇق ئەسىرى دۆلەت ئىچى ۋە سىرتىدىكى نوپۇرلۇق گېزىت – ژورناللاردا ئېلان قىلىنغان . ئۇنىڭ 50 پارچىغا يېقىن ئىجادىي ئەسىرى « ئۇيغۇر خەلق ئېغىز ئەدەبىياتى قامۇسى » غا كىرگۈزۈلگەن . جۇڭگو رەسساملىرى جەمئىيتى ، « جۇڭگو گۈزەل سەنئەت گېزىتى » ، شەرق خەنفىڭ سەنئەت تەتقىقاتى ئاكادېمىيىسى بىرلىكتە نەشىر قىلغان « نۇرمۇھەممەت ئابلىزنىڭ ئەسەرلىرى توپلىمى » ناملىق بىر يۈرۈش پوچتا ئاتكېرتكىسى تارقىتىلغان .
|
